भगवानेन छाचला बुल
युहन्ना 14
ईसुत वाट छाचली ने जीवन छे
“तुंद्रु जीव घाबरायणु नी चाहजे। भगवान पर भुरसु करु, ने मारे पर बी भुरसु करु।” मारा भगवान बासेन घर मां रहणे करीन बेसकु जागु छे, कदी नी रहतु ती तुहुंक पेहलुत कय देतु। मे तुंद्रे वाटे घरेन तज्बु करने करीन जाणे हींड र्यु। ने मे जाय्न तुंद्रे वाटे आखो तीयार कर दीस ती तुहुंक लेणे करीन अळी पछु आवीस। ने तुहुंक मारेन्चां असु करीन ली जायस की जां मे रहो चां तुहुं बी रहु। मे जां जाणे हींड र्यु, चां जाणेन वाट तुहुंक मालुम छे।
थोमा ईसुक कह्यु, “ए मालीक! हामुक ज बी मालुम नी हय की तु कां जाणे हींड र्यु ती हामुक चां जाणेन वाट1 कसा काय जाणसुन?” ईसु थोमा काजे कह्यु, “वाट, छाचली ने जीवात मेत छे। मारेन्चां नी आवे ती तीनाक भगवान बासेन्चां नी जावाये।” कदी तुहुं मेसेक उळखी लेता, ती मारा बासेक बी उळखी लेता, “बाकुन ज छाचलीन छे, की तीनाक तुहुं देखला छे, ने हाय सी मारा भगवान बासेक उळखी बी लेसु।”
फीलीप्पुस ईसुक कह्यु, “ए मालीक! हामु काजे तारु बास देखाड़ दे, हामरे वाटे अतरोत घणो।”
ईसु फीलीप्पुस काजे कह्यु, “ए फीलीप्पुस! मे अतरा दाहड़ा लग तुंद्रे पुठ्ये र्यु, ने तेबी तुहुं मेसेक नी उळखु? जु मेसेक देखलु छे। चु भगवान बास काजे बी देखलु छे। तु असु काहा कह्यु की हामु काजे बास देखाड़ दे। तुसेक भुरसु नी आवतु काय की भगवान बास मारे मां छे, ने मे भगवानेन बास मां छे, मे जे बुले तुहुंक कह्वो चे बुले मारा नी हय बाकुन बास मारेम रवीन बुले ने मारे सी तेरा मटा काम करे। मारी ईनी वात पर भुरसु करु की मे भगवान बास मां छे, ने भगवान बास मारेम छे, कदी मारी ईनी वात पर तुहुंक भुरसु नी आवतु ती कम सी कम ईना मटा कामे मारे सी हवे। तीनु कामेक देखीन ईनी वात पर भुरसु करु।” मे तुहुं काजे छाचलीन ज कहं, जु मारे पर भुरसु करे, ने च बी मे करो चे काम करसे। मेते भगवान बासेन्चां जाणे बाजी र्यु। ने मार पर भुरसु करन्या ईनु कामे सी बी मटा काम करसे। ने तुहुं ज काय मारे नावे भगवान बास सी दुवा करीन मांग्सु, च काम मे करीस तेरेसी पुर्यान सी मतलब मारे सी भगवान बासेन ईज्जत जड़े। तुहुं ज बी मारे धड़े मार नाव सी दुवा करीन मांग्सु च मे काम करीस।
ईसु चुखला-आत्मा काजे मकेलनेन बारामां वात करे
कदी तुहुं मारे सी परम करसु ती मारा हुकुम काजे बी पाळसु। ने मे बास सी दुवा करीस ने चु तुंद्रेन्चां मारी आवजी पर एक दीसरु सात देण्यु मकलसे चु जलम तुंद्रे पुठ्ये रवसे। मतलब छाचली जीव-आत्मा काजे मकलसे। तुहुं ते तीनाक जाणु, काहाकी चु तुंद्रे साते रहे बाकुन आवणे वाळा दाहड़ाम चु तुंद्रेत मां रवसे। बाकुन भगवानेन काम रुकण्या कळीन माणसे छाचली जीव-आत्मा काजे आपसा जीव वाटे जागु नी आपे काहाकी चे तीनाक देख्या बी नी ने उळखे बी नी।
“मे मरीस बाकुन तुहुं काजे एखला नाखीन नी जाम मे तुंद्रेन्चां अळी आवीस। ईतरीक वार अळतेन ईनी कळीन माणसे जे मारे पर भुरसु नी करे चे मेसेक अळी नी देखे बाकुन तुहुं मेसेक अळी देखसु मे अळी जीवतु हय जायस ने जीवतेलु रवीस ने तुहुं बी जीवतेला रवसु। मे पछु जीवतु हय जायस तीने दाहड़े तुहुं समजी जासु की मे मारा बासेम छे, ने तुहुं मारेम छे, ने मे तुंद्रेम छे।
“तींद्रे भीणी मारी हुकुम छे, चु मारी हुकुम जाणे ने तीनुक पाळे, ने चु मारसी परम राखे, तीनाक मारु बास बी परम राख्से ने तीनाक मे बी परम करीस ने मे आपसा काजे तेरे अगळ उजेंतु करीस।”
तत्यार ईस्करीयोती यहुदा नी बाकुन एक दीसरु यहुदा, ईसु काजे पुछ्यु “ए मालीक तु हामरे अगळ आपसाक उजेंतु करीस ने ईनी कळीन मनख्या पर उजेंतु नी करे?” ईसु तीना यहुदा काजे कह्यु, “कदी काहनुक मारे सी परम राख्से ती चु मारी सीकाड़ली वात काजे मानीन जीवसे ने मारु भगवान बास तेरे सी परम राख्से ने हामु तेरेन्चां आवसुन ने तीनाम रवसुन। जी सीकाड़ली वात तुहुंक आप्यी र्यु ची आखी वात सीकाड़ली वात मारे वात मारे वावड़ते नी हय बाकुन मेसेक मकलन्या भगवान बास सी छे। चु मारे सी परम राखे चु मारी सीकाड़ली वात काजे मानीन नी जीवे ने मे आपसा काजे तेरे अगळ उजेंतु नी करो।”
“मे जी आखी वात तुंद्रे पुठ्ये रय्न तुहुंक कह्लु छे। बाकुन चु सात देण्यु चुखली-आत्मा तीनाक भगवान बास मार नाव सी मकेलसे चु तुहुंक आखी2 वात सीकाड़से ने ज काय बी मे तुहुंक कह्लु छे, च आखो हेर कराड़से।”
मे तुहुंक जीवेन सांती आपीन जाम मारी सांती तुहुंक आपी जाम, जसा ईनी कळीन माणसे सांती आपे, तसली सांती तुहुंक नी आप्तु; ने तुहुं तुंद्रा जीवेन घुण घाबरायजु ने घुण बीहजु। मे जाणे बाजी र्यु, मे भगवान बासेन्चां जाणे बाजी र्यु, चु भगवान बास मारे सी मटु छे, कदी तुहुं मार सी परम राखु ती जी सामळीन खुस हवजु। मे ज आखो हवणेन पेहलुत तुहुंक कय देदलु छे। मे असु करीन कय देदु की, ज मे कहलु च हय जाय, तत्यार तुहुं मारी वात पर भुरसु करु। हय ईनी कळीन मुख्यु भुतड़ु मेसेक मारने करीन आवणे बाजी र्यु, ने तुंद्रे साते जादा वार लग वात नी करो ने चु मेसेक कब्जाम नी कर सके। तेबी मे तेरा कब्जाम हय्न मर जाम काहाकी मारा भगवान बासेन जीत मरजी छे; असु करीन की ईनी कळीन माणसे ज जाण लेय की मे बास सी परम राखो ने बास मेसेक ज काय हुकुम आप्लु, मे तसु की तसु करो।
उठ! हय आपणु जां सी जाजे।
Source notes (2)
- Footnote मार्ग
- Footnote सब
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.