भगवानेन छाचला बुल
नेवताळा 25
पोलुस केसर अगळ नीयाव वाटे वीन्ती करे
फेस्तुस चु तीन दाहड़ा हय गुया ने अळतेन केसर्या सी यरुसलेम मां पुग्यु। तत्यार मंदीरेन डाहला पुजारी ने यहुदी माणसेन नेता आवीन पोलुस पर गुनु लागाड़ीन तेरु वाक नीकाळ्या। ने चे माणसे फेस्तुस काजे दया मां हयन कह्या की तु पोलुस काजे यरुसलेम बुलाय ले। काहाकी चे वाट्येत पोलुस काजे मारनेन जाळसांदी बणाय रवला। फेस्तुस जपाप आप्यु, “पोलुस केसर्या सहरेन जेलेम छे। ने सीपायड़ा तेरु पेहरु दीन राखवाळी कर रया। ने मे छाटुस पछु जायस। पछेन कह्यु, तुहुं तुंद्रा मुख्या काजे मारे पुठ्ये केसर्या मकली देवु ने कदी चु माणुस काहींग गुनु कर्यु हसे, ती चे चां तेर पर गुनु लागाड़ीन वाक नीकाळे।”
फेस्तुस अळी तींद्रे ईचमां आठ-दस दाहड़ा रहणीदीन पछु केसर्या गुयु। ने तेरे पुठ्ये सात यहुदी हकदार्या बी गुया। दीसरे दाहड़े फेस्तुस नीयावेन गादी पर बसीन सीपायड़ाक हुकुम आप्यु की, “पोलुस काजे बुलाय लावु।” जत्यार पोलुस आयु, ती यरुसलेम सी आवला यहुदी हकदार्या, तेरे चारेमेर उबा हय्न तेरे पर बेसका गुनु लागाड़ीन वाक नीकाळ्या। ने तीना गुनान पुरावु चे दी नी सक्या। बाकुन पोलुस जपाप आप्यु, “मे यहुदी कायदान बी वाक नी नीकाळ्यु, ने मंदीरेन बी वाक नी नीकाळ्यु, ने मटला राजान बी वाक नी नीकाळ्यु। असु करीन मे काय बी गुनु नी कर्यु।”
बाकुन फेस्तुस यहुदी माणसे पर गीण-दया करने करीन पोलुस काजे कह्यु, “तु यरुसलेम जाणे तीयार छे काय, ने चां मारे अगळ ईनी वातेन बारामां तारो नीयाव करो?”
पोलुस कह्यु, मे केसरेन नीयावेन गादी अगळ उबु हय रयु, मारु नीयाव जात हवणु चाहजे। जसों तुसेक बी वारु रीती सी मालुम छे की मे यहुदी माणसेन वाक नी नीकाळ्यु। कदी मे गुनाळु हय, ने मरनेन डंड जड़े असु गुनु कर्यु हय, ती मे मरने तीयार छे; बाकुन कदी तीनी वातेम जे मारे पर गुनु लागाड़ रया, ची वात खरली नी हय ती, कुय बी मेसेक तींद्रे सुपरुत नी कर सके। मे मटला राजा अगळ नीयाव धड़े उबु हवणेन वीन्ती करो।
तत्यार फेस्तुस बसकेन मंत्री धड़े वीच्यार नीकाळीन जपाप आप्यु, “तु मटला राजा अगळ नीयाव धड़े उबु हवणेन वीन्ती करलु छे, तु केसर धड़े जासी।”
राजा अग्रीपा अगळ पोलुसेन
थुड़ाक दाहड़ा हय गुया ने अळतेन धड़ेवाळा ईलाकान राजा अग्रीपा, तेरी बहणीस बेरनीस पुठ्ये यहुदा जीलान नवला राजा फेस्तुसेक वारु छे की? पुछणे ने आव-भाव करने करीन केसर्या आया। चे बेसका दाहड़ा रय लेदा ने अळतेन फेस्तुस पोलुसेन बारामां राजा काजे ज कह्यु “एक माणुस छे, तीनाक फेलीक्स जेल मां छुड़ गुयु। जत्यार मे यरुसलेम मां हतलु, ती मंदीरेन पुजारी ने यहुदी माणसेन पुडारी तेरे पर गुनु लागाड़्या; ने कह्या की हीनाक डंड आप। बाकुन मे तीनुक जपाप आप्यु, रोमी माणसेन जी रीती नी हय की गुनु लागाड़न्याक ने गुनु करन्याक आंबा-सांबा उबा करीन तींद्री आंबी-सांबी सुणवाय करे बीगुर गुनु करन्या काजे डंड आप देय। जत्यार चे जां भेळा हया, ती जादा वार नी लागाड़्यु, बाकुन दीसरे दाहड़े नीयावेन गादी पर बस गुयु, ने सीपायड़ाक कह्यु, ‘तीना माणसेक लावणेन हुकुम आप्यु।’ जत्यार गुनु लागाड़न्या उबा हय्न तेरे पर गुनु लागाड़्या, ती चे, मे समजी रवलु असु काहनु बी गुनु तेरे पर नी लागाड़्या। बाकुन चे तींद्रा भुरसान धरमेन बारामां ने ईसु नावेन माणसेन बारामां चु मर गुयलु ने पोलुस तीना काजे जीवतु छे करीन बताड़लु, ने वातेन जखड़ी मां पड़ रवला। मे चक्कर मां पड़ रवलु की ईनी वातेन पतु कसु लागड़ो? तेरेमां मे तीनाक पुछ्यु, काय तु यरुसलेम जासी काय, ईनी वातेन तारु नीयाव हवसे? बाकुन पोलुस कह्यु, की ‘मे मटला राजा अगळ नीयाव उबु हवणेन वीन्ती करो।’ ती मे सीपायड़ाक हुकुम आप्यु की जत्यार लग मे ईनाक केसर धड़े नी मकलो, ती लग तुहुं जलम हेरी राखवाळी करु।”
तत्यार अग्रीपा, फेस्तुस काजे कह्यु, “मे बी तीना माणसेन वात सामळने हींडो।”
ती फेस्तुस कह्यु, “तु काल हेरी वात सामळी लेजी।”
दीसरे दाहड़े राजु अग्रीपा ने तेरी बहणीस बेरनीस सी धुम-धाम सी हेरा सीपायड़ा सुबेदार्या भेळा ने सहरेन मटला माणसे बसक भेळे चां आय लाग्यु। तीने टेमे फेस्तुस सीपायड़ाक हुकुम आप्यु, “पोलुस काजे जां ली आवु।” फेस्तुस कह्यु, “ए राजा अग्रीपा, ने आखा माणसे, जे जां आय र्या चे। तुहुं ईना माणसेक देख रया, तेरे बारामां आखा यहुदी माणसे यरुसलेम सहर मां ने जां बी आयड़ी-आयड़ीन मारे धड़े लीलघाय्न कह्या, ‘ईनाक मार नाखु। ईना काजे धरती पर जादा दाहड़ा जीवतेलु रहणु वारु नी हय।’ बाकुन मे पारखी लेदु की चु मरनेन डंड जड़े असु काहनु बी गुनु नी कर्यु; तेबी चु आपसुत असु वीन्ती कर्यु की ‘मे मटला राजा अगळ नीयाव वाटे उबु हवणु छे।’ ती मे ईनाक मटला राजा धड़े मकलेन तज्बु कर्यु। बाकुन मे हेरे बारामां लिखीन दी मकेलने मारे धड़े काय बी पुरावु नी जड़्यु। अतरामा मे तीना काजे तारे अगळ ने खास करीन ए राजा अग्रीपा तारे अगळ लावलु छे। हेरेन करीन की लिखणे करीन काय ने काय पुरावु जड़े। मारु वीच्यार छे की तीनाक माणसे गुनाळु समजीन धरीन हात कड़ी लागाड़ला छे, तेरे बारामां जु छाचलीन गुनाळु छे, असु करीन चिट्ठी लिखे बीगुर मटला राजा धड़े मकेलनु वारु नी हय।”
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.