नेवताळा 26

पोलुस राजा अग्‌रीपा अगळ उबु हवे

1अग्‌रीपा राजु पोलुस काजे कह्‌यु, “तुसेक खुद तारे बारामां कह्‌णेन हक छे।” तत्‌यार पोलुस आपसुत बचणे करीन आपसे भीणी असु कह्‌णे बाजी गुयु।

2ए राजा अग्‌रीपा, जतरी वातेन यहुदी माणसे मारे पर गुनु लागाड़े। तीनी वातेन आज तार अगळ जपाप आपणे मां मे वारु समजो। 3खास करीन जी वात अतरी खरली छे, काहाकी तु यहुदी माणसेन आखी रीती-भाती ने तींद्‌री वात काजे जाणो। अतरामा चु लीलघाय्‌न कह्‌यु की तु गम खाय्‌न मारी वात सामळ।

4मे नानलु हतलु ती सीत मारा भाय-बेटा मां ने यरुसलेम मां कसु जीव्‌यु, ची वात देस वाळा ने यरुसलेम वाळा आखा यहुदी जाणे। 5कदी चे ईनी वातेन गवाय देणे हींडे ती गवाय दी सके, काहाकी मे हामरा धरमेन अनसारे एक हामरा काठला फरीसी माणसेन अनसारे जीवाय जीवलु छे। 6भगवान हामरा डाहा-डाहा साते मर्‌या-सर्‌याम सी पछा जीवता करनेन जु वायदु करलु छे, ने चु वायदु भगवान पुरु करसे असु मे आस करो ने तीनात वायदान वाटे मारु नीयाव हवणे बाजी रयु। 7हामरी बारे कळीन माणसे मर्‌या-सर्‌याम सी पछा जीन्‌दा हवणे जी आस कर रया, तीनीत आसे वाटे भगवानेन रात दाहड़ु सेवा-भक्‌ती कर रया। ए राजा। हीनुक मर्‌या-सर्‌याम सी पछा जीन्‌दा हवणेन आसेन बारामां यहुदी माणसे मारे पर गुनु लागाड़ रया। 8जत्‌यार की भगवान मर्‌या-सर्‌या माणसे काजे जीन्‌दा करे। असी वात मे कहं ती तुहुं काजे ईनी वात पर भुरसु काहा नी आवतु? 9मे बी समजतेलु की ईसु नासरी नावेन वीरुद मां मेसेक बेसको काय करनु चाहो। 10ने मे यरुसलेम मां बी ईसुन माणसेन वीरुद कर्‌यु; ने मंदीरेन डाहला पुजारा जाय्‌न ईसुन माणसेक वेला पाड़नेन हक मांग लेदु ने बेसका ईसुन चुखला माणसेक जेल मां कुंड देदु। तत्‌यार दीसरा तींद्‌री वीरुद करीन तीनुक मारतेला ती मे बी तींद्‌री वातेक हुकारतेलु। 11ने मे तीनु आखा काजे तींद्‌रा यहुदी माणसेन भक्‌तीन घर मां वेला पाड़तेलु ने तीनुक जुर करीन कह्‌वतेलु की तुहुं ईसुन वाक नीकाळु, नीते मार नाखीस। ने मे तींद्‌रे पर अतरु रीसवाय गुयु की दीसरा सहरेम रहण्‌या ईसुन माणसे काजे बी वेला पाड़ने बाजी गुयु।

पोलुस आपसान बदलेन बारामां बताड़े

(नेवताळा 9:1-19; 22:6-16)

12ईसु पर भुरसु करन्‌या माणसेक मारनेन धुन मां मे मंदीरेन डाहला पुजारा धड़े हकेन चिट्‌ठी लीन मे दमीस्‌क जाणे बाजी रवलु। 13ए राजा, मे दीसु माथेक दाहड़े, दाहड़ा सी बी जादा जुरे वीजाळो बी धपीन सरगे सी आवतेलो देख्‌यु, जो मेसेक ने मारा साती काजे घेर लेदलो। 14हामु आखा भुयमां हीट पड़्‌या ती मेसेक ईब्‌रानी बुली मां एक बुल सामळायु, “ए सावुल ए सावुल तु मेसेक काहा वेला पाड़े? तारे वाटे कुरहाड़ पर लात देणु काठो छे।” 15ने मे कह्‌यु, “मालीक! तु कुण छे?” मालीक कह्‌यु, “मे ईसु छे, तीनाक तु वेला पाड़े। 16बाकुन हय तु उबु उठ जां; तारा पाय पर उबु हव; काहाकी मे तुसेक जसु देखलु च आखो माणसेक कवणे करीन मारु पावर्‌यु ने गवा बणावीन ठेहरावलु छे, ने अळी आवणे वाळी वात देखाड़ने करीन तुसेक देखाड़ीस। 17मे तुसेक तारा माणसे सी ने नी-यहुदी माणसे सी बचाड़ीन राखीस, तींद्‌रे धड़े मे तुसेक तेरेमां मकलो। 18तु हींद्‌रा जीवेन डुळा उघाड़जी। ने तीनुक जीवेन आंदारला मां सी जीवेन वीजाळा भीणी वाळजी। ने भुतड़ान हक मां सी छुड़ावीन भगवानेन हक मां लावजी; ने असा करीन चे पापेन माफी हात करीन ईसु पर भुरसु करन्‌या चुखला माणसे मां भेसकाय जासे।”

पोलुस हेरे कामेन बारामां बताड़े

19“ए राजा अग्‌रीपा! ती सी आज लग मे तीनी सरगेम सी आवली वातेक कदी नी टाळ्‌यु। 20बाकुन मे पेहले दमीस्‌कुसेन, यरुसलेमेन, ने तत्‌यार यहुदी आखा देसेन रहणे वाळा ने नी-यहुदी माणसेक ज समजाड़तु रयु, की तुहुं पाप भीणी सी मन फेरवीन भगवान भीणी वळु ने भगवान काजे गमे तसों काम करु।” 21ईनी वातेन वाटे यहुदी माणसे मेसे काजे मंदीर मां धर लेदा, ने मारीन नाख देणेन कुसीत कर्‌या। 22बाकुन भगवानेन मदत सी आज लग मर्‌यु नी ने नानला मटला आखा अगळ गवा दम। ने तीनीत वातेक कहतु रयु जी वात भगवानेन अघली वात बताड़ने वाळा माणुस ने मुसु कहलु की हवणे वाळी छे। 23की ईसु मसी काजे दुख झेलनु पड़से ने चु आखा मरला मां सी पेहेल जीवतु हय्‌न आपणा माणसेक ने नी-यहुदी माणसेक जीवनेन वीजाळान खुस-खबर सामळावसे।

24जत्‌यार पोलुस हीनी रीती सी जपाप दी रवलु, ती फेस्‌तुस जुर सी आयड़ीन कह्‌यु, “पोलुस, तु संकाय गुयलु छे! ने तु जादा भणीन गांडु हय गुयु।”

25बाकुन पोलुस कह्‌यु, “ए ओबरादार फेस्‌तुस! गांडु नी हय, बाकुन सय ने अक्‌कल वाळी वात कहं। 26ने तीनी वातेक मे बीहे बीगुर राजा अगळ कहणे बाजी रयु, तीनी वातेक राजु जाणे। ने मेसेक भुरसु छे हीनी वात मां सी कुय वात सातायली नी हय, काहाकी ईसु साते जो काय हयो च कांखुर धरतीन खुणे-कुपरे नी हयो। 27ए राजा अग्‌रीपा, तु भगवानेन अघली वात बताड़ने वाळा माणसेन कहली वात पर भुरसु करे काय? हव, मेसेक मालुम छे की तु भुरसु करे!”

28हेरेसी अग्‌रीपा पोलुस काजे कह्‌यु, “तु कम समजणे सी मेसेक मसी बणावणे हींडे।”

29पोलुस कह्‌यु, “मे भगवान सी दुवा करो की भले ईतरीक वात सामळावीन ने भले जादा वात सामळावीन, तु अतरुत नी बाकुन जतरा बी मारी वात सामळी रया, चे आखा मारेन तसा ईसु पर भुरसु करन्‌या बण जाणो चाहे। बस, तीनुक मारेन तसा हात कड़्‌या अतरा नी लागणु चाहजे।”

30तत्‌यार राजा अग्‌रीपा ने राजा अग्‌रीपान बहणीस बेरनीस ने तेरे धड़े बस रवला आखा उबा हय गुया। 31ने अलग जाय्‌न आपसात कहणे लाग्‌या, जु माणुस जेलेम जाय असु ने मरनेन डंड जड़े असु काहनु बी गुनु नी कर्‌यु। 32अग्‌रीपा फेस्‌तुस काजे कह्‌यु, “कदी तु असु नी कवतु की ‘केसर राजा अगळ मारु नीयाव हवणु चाहजे’ ती जे तुसेक जेल मां सी बरी कर देदा।”