भगवानेन छाचला बुल
नेवताळा 24
पोलुसेन फेलीक्स अगळ सुनवाय
पांच दाहड़ा हय गुया ने पछेन मंदीरेन डाहलु पुजारु हनान्यु थुड़ाक पुडारी ने तेरतुल्लुस काजे पुठ्ये लीन केसर्या आयु। जु तेरतुल्लुस एक वकील हतलु। चे आखा नीयाव करन्या अगळ पोलुस पर गुनु लागाड़ीन तेरु वाक नीकाळ्या। जत्यार तीनाक बुलाया ती तेरतुल्लुस तेरे पर गुनु लागाड़ीन कवणे लाग्यु,
“ए मटला फेलीक्स मालीक! हामु ते तु छे करीन वारु सुकना जीवणे बाजी रया, तु नांबे सी देखीन चाले तेरेमां आपणो आखो देस वारु सुदरी गुयलो छे ए आखा सी वारु फेलीक्स! हामु तारे साहरे सुदारली वातेक हामु मांजे ने तुसेक वारु कह्जे। बाकुन तेरेमां की तुसेक अळी दुख नी देणे चाहतु चु तीनाक लीलघाय्न कह्यु, दया करीन तु हामरी दुय वात सामळी ले। काहाकी हामु हीना माणुस काजे भड़कावण्यु छे। जु आखी कळीन यहुदी माणसे मां लड़ाय कराड़न्यु छे, ने आपसा काजे नासरी टुळान मुख्यु कह्वे। जु यरुसलेम मंदीर काजे बी वीटाळनेन कुसीत करलु पर हामु हीना काजे धर पाड़्या। हामु मुसान कायदान अनसारे हेरु नीयाव करने हींडतेला। बाकुन डाहलु सुबेदार लुस्यु आवीन हीनाक जबरान हामरा हातेम सी हापकी लेदु। ने असु करीन गुनु लागाड़न्या काजे बी चु हुकुम आपीन कह्यु की तुहुं हीनी आखी वातेन बारामां जु गुनु हामु हेरे पर लागाड़ रया। तीनी वातेक तु आपसुत पारखी लेसी।” जी वात सामळीन यहुदी माणसे बी हीनी वातेक हुकारीन कह्या, “हव, जी वात खरली छे।”
पोलुस आपसा काजे बचाड़ने करीन फेलीक्स काजे काहींग कह्वे
जत्यार नीयाव करन्यु पोलुस काजे बुलनेन ईसारु कर्यु ती पोलुस असु जपाप आप्यु,
मे जाणो की तु बेसका साल सी हीनी जातीन माणसेन नीयाव कर रयु, तेरेमां मे खुस हय्न तारी वातेन जपाप आपो। तुसेक ते ज मालुमुत छे की जत्यार मे यरुसलेम मां भगवानेन भक्ती-भजन करने आवलु, ती सीत हय लग बारे दाहड़ा बी नी हया। ने चां कुय बी मेसेक मंदीर मां ने यहुदी माणसेन भक्तीन घर, मां ने सहर मां वातेम नाव-बद्दी ने माणसेक भेळा करीन भड़कावतेलु देख्या, ने नीते जे तीनी वाते मां मारु वाक नीकाळीन गुनु लागाड़ रया, तीनी वातेक हय बी जे खरली ठेहराय नी सके। बाकुन मे तारे अगळ जी वात मान लम की दीना पंथ काजे जे रद्दी-पंथ कह्वे। तीना पंथन साहरे मे तीना भगवानेन सेवा-भक्ती करो तीना भगवानेन वाट काजे आपणा डाहा-बुड़ा मान्ता आय रया, ने तेरी सेवा-भक्ती करता आय रया। ने जी वात मुसान साहरे लिखला सास्तुर मां ने भगवानेन अघली वात बताड़ने वाळा माणसेन किताप मां बी लिखली छे, तीनी आखी वात पर मे भुरसु करो। ने जसा चे भगवान मां करे तसुत मे बी भगवान मां आसा करो की भगवान धरमी माणसे काजे ने पापी माणसे काजे मर्या-सर्याम सी जीवतु करीन बठु करसे। तेरेमां मे बी भगवान ने माणसे अगळ मारा चुखला मन सी ज छाचली छे, चत करनेन कुसीस करो।
बेसका सालेन पछे मे मारा माणसे काजे दान आपणे, ने भेट चड़ावने आवलु। ने चे मेसेक मंदीर मां जनवार्या मारीन बादा चड़ावतेलु ने भेट आपतेलु देख लेदला। मे जो काम चुखले मने दीसरा माणसेक बुलावीन गड़दी करे बीगुर करने बाजी रवलु। तीने टेमे मारे पुठ्ये आसीया वाळा बेसका यहुदी बी हतला; ने तीनुक जो काम वारु; लाग्यो। दंगु कराड़न्या ते चे, आसीया जीला वाळा यहुदी माणसे हतला। कदी तीनुक मारा वीरुद मां काय कवणु हतलो, ती जे यहुदी जां अगळ आवीन मारे पर गुनु लागाड़ता। तेबी चे जां नी आया। नीते जे माणसे जां छे हीनुत काजे कवणे दे की जत्यार मे मट्ली बसक मां हतलु, ती जे मारे मां काय गुनु देखला? हीनी वात काजे छुड़ मे तींद्रे ईचमां उबु रवीन आयड़ीन कवलु की मर्या-सर्याम सी पछा जीवता हवणेन बारामां तारे अगळ आज मारु नीयाव हवणे बाजी रयु।
फेलीक्स तीनी वाटेन बारामां वारु वात जाणतेलु, चु ज कह्वीन तींद्री सुणवाय टाळ देदु, “जत्यार डाहलु सुबेदार लुस्यु आवसे, ती तुंद्री वात सामळीस ने तुंद्रु फेसलु करीस।” ने सुबेदार काजे हुकुम आप्यु की तु पोलुसेन जेलेन वारु राखवाळी करजी, ने तेरा दुस्तीदार आवे ती तेरी सेवा-चाकरी करने घुण रुके।
फेलीक्स ने दुर्सील्लान अगळ पोलुस
थुड़ाक दाहड़ा मां अळतेन फेलीक्स हेरी घरवाळी द्रुसीला पुठ्ये चां आयु। फेलीक्सेन घरवाळी यहुदी जातीन हतली। फेलीक्सी पोलुस काजे बुलावीन तीना भुरसान बारामां ज मसी ईसु पर छे, तेरेसी सामळ्यु। बाकुन जत्यार पोलुस नीयावेन बारामां, ने हेरा जीवेक मानाड़नेन बारामां, ने आवणे वाळा नीयावेन बारामां वात करतेला। ती फेलीक्स सामळीन बेसकु बीही गुयु ने पोलुस काजे कह्यु “हय तु जात रव, टेम जड़से ती तारी वात सामळने तुसेक अळी बुलावीस।” हीनीत टेमे फेलीक्स जी आस कर रवलु की पोलुस मेसेक रुप्या आपसे। करीन चु पोलुस काजे अळी-अळीन तेरी वात सामळावणे करीन बुलाया करतेलु।
बाकुन जत्यार दुय साल हय गुया ती पुरकीयुस फेस्तुस, फेलीक्सेन जागा पर आयु; ने फेलीक्स यहुदी माणसे पर दया करनेन मरजी सी पोलुस काजे जेल मात रहणी देदु।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.