भगवानेन छाचला बुल
2 तीमुथी 4
ईसु मसी, मरलान ने जीवतेलान नीयाव करने करीन ने राज करने करीन उजेंतु पछु आवणेवाळु छे। हेरेसी मे भगवान काजे ईना ईसु मसी काजे गवा बणायन तुसेक हुकुम आपो। खुस-खबरेन परचार तु करतु रव; ने टेमे ने बे टेमे बी खुस-खबरेन परचार करने करीन तीयार रव। छाचली सीकापण काजे वारु कामे लावीन ने गम खातु जाय्न, गलत काम करे तीनुक लड़ीन समजाड़, ने गलत वातेन वीरुद करीन जाळवीन रहणे सीकाड़, ने वारु काम करन्यान हिम्मत दे। काहाकी हीनु दाहड़ाम खुस-खबरेन परचार वारु रीते करनु चाहजे, काहाकी असी टेम बी आवसे तीने टेमे माणसे छाचली वात नी सामळे, ने जुर करसे; ने जे तींद्री कुहेरली हेरेक लड़ीन सीकाड़से चेत सीकाड़न्या तीनुक गमसे, ने असला सीकाड़न्या काजे चे आपसे धड़े भेळा कर लेसे। ने तीनुक छाचली वात सामळने नी लागे, बाकुन मन घड़ाय काहनी काजे मन लागाड़ीन सामळसे। भले काय बी हय जाय, तेबी तु आखी वातेम आपसा काजे जाळवीन राख्जी। ने खुस-खबर सामळावणेन कामेक दुख झेलतु जाय्न कर्या करजी ने तुसेक सुपलो जो चाकरीन काम पुरो करजी।
जसु भगवानेन चेलु आखी बादा चहड़ायलीन, आखी बादा पर अंगुरेन रस छीट देय, तसुत मे मारी आखी जीवाय, मालीक ईसु वाटे जीवीन मरने वाळु छे। जसु दवड़नेन खेल मां एक दवड़न्यु आपसी दवड़ पुरी करे तसुत मे तेरा सुपला कामेक पुरु करलु छे; हव, मे ईसुन भुरसान वारु रीते पाळनी पाळ्ळु छे। मारु मालीक भगवान धरम सीत नीयाव करन्यु छे। हय, चु भगवान ईनाम मां मेसेक आपणे करीन धरमेन पागड़ी तीयार करीन मेल रयु। ईनी पागड़ी काजे मारु मालीक ईसु नीयावेन दाहड़े मेसेक आपसे चु असली पागड़ी मेसेक अतरुत नी आपे, बाकुन तीनु आखा काजे बी आपसे जे वारु कहें, ने जे ईसु पछळ आवीन उजेंतु हवसे करीन, हेर करीन वाट देख रया।
खुदेन बारामां
ए तीमुथी, मारेन्चां मामार आवणेन काळजी कर। काहाकी ईनी कळीन वातेक परम करीन देमास, मेसेक ने चाकरीन काम छुड़ीन थीसलुनीकी मां जात रयु, ने चाकरीन काम वाटे कोरेस्केंयु गलाती देसेम जात रयु, ने तीतुस दलमात्या जीलाम जात रयु। मारा सात देण्या मायन, लुकु अतरुत मारे भेळ्तु छे, मरकुसेन्चां जां ने तु आवे तत्यार तीनुक बी लेतु आवजी; काहाकी हयु ईसुन काम मां मार वाटे बेसकु कामकु छे। तुखीकुस1 काजे मे ईफीसुस सहर मां मकली रयु। जु कुट मे तरोआस सहर मां कारपुसेन घर मां भुली आयु, चु कुट तु ली आवजी। ने मारी किताप बी ने खास करीन चामड़ान कागदा बी ली आवजी, तींद्रेम खास वात लिखली छे।
लुहायड़ु सीकन्दर2 मारे पर बेसकु कुहराय करलु छे। हेरेसी हयु दसु कर्यु तसुत मालीक भगवान हीनाक डंड आपसे। आपणु जी-जी वात सीकाड़ता आय रया, तीनी-तीनी वातेन हयु बेसकु वीरुद कर्यु, हेरेसी ए तीमुथी, तु जाळवीन रवजी ने हीना सी छेटु रवजी।
पेहली कावा जत्यार कुरुट मां मेसेक मारी गवा देणु पड़्यो, तत्यार दीसरु कुय बी मारी सात नी देदु, बाकुन आखान आखा मेसेक छुड़दीन जात रया। तेबी भगवान धड़े मारी जी वीन्ती छे की ए भगवान हींद्रु गुनु माफ कर दे! बाकुन मालीक भगवान ते मार अगु अळी मारी मदत कर्यु, ने एक कह्याम मेसेक नाहरेन डाचाम सी छुड़वी लेदु। चु हेरेन करीन मारी मदत कर्यु की मारे साहरे भगवानेन खुस-खबरेन परचार पुरु-पुरु हवे। ने नी-यहुदी माणसे बी खुस-खबर जाण लेय।3 ने जु मालीक भगवान मेसेक आखी भातीन कुहराय सी बचाड़से, ने मेसेक छुटकारु आपीन सरगेन राज मां पुगाड़ देसे। तीना मालीकेन जलम बड़ाय हवती रहणु चाहजे, आमीन।
चिट्ठीन आकरी वात
परीस्कीला बायर ने तेरा घरवाळा अक्वीला, काजे ने उनेसीफीर्यान घराणा काजे मार भीणी सी वारु छे की करीन पुछजी। ईरास्तुस4 कुरींथीस सहर मां रय गुयला छे, ने तरुफीमुस काजे मीलेतुस सहर मां मांदलुत रहणीदीन मेसेक आवणु पड़्यो। सींगेन दाहड़ा आवणेन पेहले काळजी करीन आवजी।
युबुलुस, ने पुंदेस्यु, ने लीनुस्यु ने कुलुद्या बायर, ने ईसुक मान्या जां वाळा आखा भायस तुसेक वारु छे की? करीन पुछ रया ने आवीस ने आवजी कय रया।
मालीक भगवान तारी जीव-आत्मा पुठ्ये रया करे,
ने तुहुं आखा काजे मालीकेन गीण-दया जड़ती रहणु चाहजे करीन असी वीन्ती मे भगवान धड़े करो।
Source notes (4)
- Footnote माणसेन नाव छे
- Cross-reference भजन सहीता 28:4; रोमी 12:19
- Cross-reference भजन सहीता 22:21; दानीयल 6:21
- Footnote माणसेन नाव छे
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.