2 तीमुथी 3

आकरी दाहड़ा मां काय हवसे ची वात

1जी वात वारु हेर राख्‌जु की आकरी दाहड़ा मां काठली टेम आवसे। 2काहाकी तीने टेमे माणसेन पाप बेसकु बड़ जासे। तत्‌यार माणसे, पयस्‌यान हायाळ्‌ळा, ने आपसान भलो हवणे चाहजे असी हेर करन्‌या, ने सोवकारला बणीन मटाय करन्‌या, ने भगवानेन नाव-बद्‌दी करन्‌या ने आस्‌या ने बासेन हुकुम नी मान्‌या बण जासे। तीनु माणसेन हीया मन मां भक्‌तीन वीच्‌यार ने भलाय करन्‌याक वारु कर्‌यु कवणेन वीच्‌यार नी रवे; 3ने परमेन वीच्‌यार, ने माफ करनेन वीच्‌यार बी नी रवे। चुरी-चुगली करन्‌या, जसों पटे तसों करन्‌या, बीन दयाळा, जो बी भलो छे, तेरी वीरुद करन्‌या, 4धुकु देण्‌या अनड़ाय करन्‌या ने आपसुन बड़ाय करन्‌या बण जासे। ने चे भगवानेक पुजण्‌या नी बाकुन मजा लेणेन हेर करन्‌या बण जासे। 5भगवानेन भक्‌ती करनेन ढंगड़ा ते करसे, बाकुन भगवानेन भक्‌ती करने सी जी ताकत जड़े, तीनी ताकत कदी हात नी करे। असला माणसे सी छेटा रवजु। 6हींद्‌रे मां असा बी छे, जे दीसरान घर मां मनेन भराय जाय, ने भुळा बायरा काजे पटाड़ लेय, जे बायरा पेहले सीत आखी वातेम बेसका हायाळ्‌ळा छे, ने पापेन बुझ सी डाबायला छे। 7चे बायरा नवली-नवली वात सीकणे करीन नवला-नवला सीकाड़न्‌यान सामळे ते खरा, बाकुन तेबी तीनुक भगवानेन खुस-खबरेन छाचाय्‌न उळखाण कदी नी हये। 8जसा येन्‌नेस ने यंब्‌रेस नावेन डाकणा बड़वा मुसान वीरुद करला, तसात जे सीकाड़न्‌या बी छाचाय्‌न वीरुद करे, ईनु माणसेन अक्‌कल बीगड़ी गुय, जे भुरसु करन्‌या ढंगड़ा करे, बाकुन हींद्‌रु भुरसु फालतु छे।1 9बाकुन जादा वार लग चे दीसराक धुकु नी दी सके। जसी येन्‌नेसेन ने योमब्‌रेसेन धुकु देण्‌या भुत वीद्‌या फालतु हय्‌न आखा अगळ उजेंती हय गुयली, तसीत ईनु सीकाड़न्‌यान धुकु देणेन सीकापण बी फालतु हय्‌न आखा अगळ उजेंती हय जासे।

चुखली-सास्‌तुर सीकणेन ने सीकाड़नेन फायदु

10बाकुन तु ते मारी सीकापण वारु जाणे। मारु वेहवार कसु छे, मारा जीवनेन ठीकाणो काय छे, मे कतरु भुरसु करो, मारु परम कसलु छे, ईसु धड़े दुख झेलने मां मे कतरु गम खादु, ने कतरीक धीरपाय राखो; जो आखो तु देख रयु ने वारु जाण रयु। 11हव, अन्‌ताकीया सहर मां ने ईकुनीयुम सहर मां, ने लुसत्‌रा सहर मां, माणसे मेसेक कसा वेला पाड़्‌या, ने मे काय-काय दुख झेल्‌यु, ज बी तु देखीत रयु ने वारु जाण रयु। बाकुन भगवान मालीक मेसेक तीनु आखा दुखेम सी छुड़ाय लेदु।2 12हय, जतरा बी ईसु मसी पर भुरसु करता जाय्‌न ईसुन भक्‌ती करीन जीवणे हींडे, तीनु आखाक दुख झेलनु पड़से। 13बाकुन कुहर्‌या माणसे, ने ठगण्‌या माणसे दीसराक धुकु देदा जासे, ने धुकु खाता जासे, ने अगास बीगड़ता जासे। 14बाकुन तु तींद्‌री वातो पर जी तु सीक्‌लु छे, ने भुरसु करलु छे, ज जाणीन काठु बणीन रवजी की तु तीनुक काहना माणुस सी सीक्‌लु छे, 15तु नानलु हतलु ती सीत चुखला सास्‌तुरेन वात काजे सीक्‌तु आय रयु, ने सास्‌तुरेन वात काजे मान्‌तु आय रयु। हेरेसी तु जाणे की जी सीकापण चुखली छे, चुखला सास्‌तुरेन वात तुसे काजे तीना छुटकारान अक्‌कल आपी, जु छुटकारु ईसु मसी पर भुरसु करने सी जड़े। 16आखी चुखली सास्‌तुर भगवानेन अगवाय सीत तेरा लिखंद्‌रा माणसेन साहरे लिखलो छे, ने ज चुखली सास्‌तुर माणसेक सीकाड़ने करीन, ने समजाड़ने करीन, ने सुदारने करीन, ने धरमेन वात टेवाड़ने करीन बेसकी काम की छे। 17हेरेन करीन की भगवानेन भक्‌ती करन्‌यु चुखलो सास्‌तुर हुनर सी वारु कामे लावीन, आखा भला कामे करने करीन तीयार हय जावु।