भगवानेन छाचला बुल
2 तीमुथी 2
ईसुन छाचलु सीपायड़ु बणनेन वात
हेरेसी ए मार बेटा तीमुथी, ईसु मसीन साहरे जड़ली भगवानेन गीण-दया सी तु जीवेम वारु काठु हय जां। ने तु मार धड़े सी जी-जी वात बेसका गवा देण्या अगळ सामळीन सीक्लु, ची-ची वात ईमानदार माणसेन सुपरुत कर देजी, जे दीसरा माणसेक सीकाड़ने मां हुनर वाळा छे।
जसु एक वारलु सीपायड़ु आपसा देसे वाटे दुख झेले तसुत, तु बी ईसु मसी वाटे दुख झेलने मां मारु साजल्यु बण। काहनु बी माणुस जत्यार सीपायड़ान नोकरी करने जाय, ती चु आपसा भरती करन्या मालीक काजे खुस करनेन झींग मां रवे ने चु ईनी कुळीन दीसरा कामे मां झींग नी पाड़े तसुत, तु बी आपणा मालीक ईसुक खुस करने करीन तेरा सुपला कामेक झींग पाड़ीन करता रहु। जु काहनुक ईनाम जीतणे करीन खेल मां हुड़े पड़े, ती कायदान अनुसार हुड़े नी पड़े, ती चु जीत जाय तेबी तीनाक ईनामेन पागड़ी नी जड़े। कमारला किरसाण काजे मेरेन पेहला फळेन वाटु जड़नु चाहजे। कमारला किरसाण काजे वारलु फळ हात करने करीन भगवानेन आस कर। जी-जी वात मे दाखलान साहरे हय कह्यु, तीनी आखी वात पर वीच्यार कर, ने मालीक भगवान तुसेक आखी वातो मां समज आपसे।
मे जी खुस-खबर सामळावो, ची खुस-खबर तीना ईसुन छे, जु दावुद राजान कुळी मां पयदा हयु, ने मर्या-सर्याम सी पछु जीवतु हय्न बठु हय गुयु। ईना ईसुक बराबर हेर करता रहु जु छुड़ावन्यु मसी छे। ईनी खुस-खबर वाटे मे दुख झेलो। जां लग की, एक गुनु करन्यान तसु जेलेम साकळ सी बांदाय रयु। बाकुन भगवानेन बुल बांदायलु नी हय। तेरी खुस-खबरेन परचार ते हवतो रवे। मे ते भगवानेन नेवाड़ला माणसे वाटे जो आखो दुख झेल लम। जे आज लग ईसुन खुस-खबर नी सामळ्या; एरेन करीन की चे ईसु मसी पर भुरसु करीन छुटकारु हात करे, ने सरगेम जलम सेक-सींगार हात करे। जी वात छाचली छे की;
आपणु ते भुरसु करीन पाप साते ईसु पुठ्ये मर गुयला छे,
तत्यार ते तीना भुरसान साहरे ईसु पुठ्ये जीवसु बी;
कदी आपणु ईसु वाटे हय गम खाय्न दुख झेलसु,
ती सरगेम तेरे पुठ्ये राज बी करसु;
कदी आपणु कह्सु हामु ईसुक जाणजेत नी,
ती चु बी कवसे, मे तुहुंक जाणोत नी।
बाकुन कदी आपणु ईसु वाटे भुरसु करे असा रहणु मां कमजुर हय जाजे,
तेबी चु भुरसु करे असात रवसे;
काहाकी चु आपसु वेहवार बदली नी सके।1
भगवानेन नेवाड़ला चेला
तीनुक तु नेवाड़ीन सीकाड़न्या बणाव, तीनुक जी आखी वात हेर करावतु रवजी। ने भगवान काजे गवा बणायन तीनुक जुरदीन कवजी, की फालतु वातेम लड़ाय घुण करजु काहाकी असा लड़ाय पड़ने सी काय बी नफु नी हये, बाकुन सामळने वाळा बीगड़ी जासे। भगवानेन छाचला बुल काजे वारु रीते कामे लावणे मां ने भगवानेक चाहजे असो काम करने मां काळजी कर; तत्यार ते तु भगवानेन एक वारलु पावर्यु कहवायसी, ने तुसेक सरमायणु नी पड़े। ईनी कळीन माणसेन भुंडली ने फालतु वातेम सी छेटु रव, काहाकी फालतु वात करन्या माणसे भगवानेन भक्तीन वाटेम सी अदुस छेटे हवता जासे। ने जसु एक सड़लु घाव वदतु जाय, तसीत तींद्री झुटी सीकापण बी माणसेम फेलायन वदती जासे, ने सामळन्याक खत्तम कर देसे। हुमन्यु ने फेलत्यु असलात छे, जे झुटी सीकापण काजे मंडळीम आखेदुर फेलाय रया। जे दुय जणा भगवानेन छाचाय सी छेटा हय गुया, तींद्रो कवणु छे की आपणु जत्यार ईसु पर भुरसु कर्या, तत्यारुत आपसा जीवेम मर्या-सर्याम सी जीवतो हय्न बठो हवणु हात कर लेदला, ती हय आपणेम पछो जीवतो हवणेन काय बी वात नी बची; ने नवला डीलेम, मर्या-सर्याम सी पछो जीवतो हय्न बठो हवणेन वातुत नी हय असा कय्न हुमन्यु ने फेलत्यु, थुड़ाक माणसेक ईसुन भुरसा सी छेटा करने हींड रया, ने आपणा भुरसान पायुत उळखीन नाखणे हींड रया। भले काय बी हय रयो हय, बाकुन भगवानेन वातेन पायु पाक्कु जमलु छे, ने चु पायु काहना सी नी उळखाये। तीना पाया पर चुखला सास्तुरेन दुय वात एक सीलठप्पा मुजुक लिखली छे, “भगवान मालीक आपसा खरला चेला काजे वारु उळखे।” ने “जु काहनुक कह्वे की ‘मे मालीक ईसु पर भुरसु करो’ तीना काजे कुहराय सी छेटे रहणु चाहजे।”
लकपती माणसेन घर मां सना चांदीन ठाहरा, अतरात नी रवे, बाकुन लाकड़ान ने धुळान ठाहरा बी रवे। काहना ठाहरा, मालीकेन खास काम आवे असा ईज्जदार छे, ने काहना ठाहरा, मालीकेन खास काम नी आवे, हेरेसी चे ईज्जदार नी हय। कदी जु काहनुक कुहराय सी छेटु रय्न चुखु हय जाय, चु मालीक वाटे काम लावणे करीन तीयार करला ईज्जदार ठाहरान तसु छे। तीनाक भगवान मालीक, आखा भला काम वाटे वापरसे। जुवानी मां जी भाती-भातीन भुंडली हेर आवे, तीनी हेर सी तु छेटु रव, ने जे चुखला मन सी मालीक भगवानेन नाव लेय, तींद्रे भेळतु, ईसुन भुरसान वातेन, ने धरमेन वातेन, ने परम सी रवणेन वातेन, ने सुकुने जीये मीळीन रहणेन वातेन पछळ, ने ईनी आखी वातेक काळजी करीन पाळतु रव। बाकुन मे अळी कह्वो रीकामी ने गांडवायली वातेन लड़ाय सी छेटा रहु असली वात करने सी लड़ाय झगड़ु हवे। हेरेसी जी वात घुण इसेरजु। मालीक भगवानेन गुलाम पावर्या काजे झगड़ु नी करनु चाहजे, बाकुन गम खातु जाय्न आखा साते दयाळु वेहवार राखणु चाहजे ने सीकाड़ने मां हुनर वाळु हवणु चाहजे। चु वीरुद करन्या माणसे काजे नीचळु बणीन असो हेर करीन समजाड़न्यु हवणु चाहजे, की भगवान तींद्रा मन काजे पाप भीणी सी फेरवीन आपसे भीणी फेरवी लेसे, ने चे बी छाचाय काजे जाण लेसे। ने तत्यार तींद्री सान आय लागसे ने चे भुतड़ान फांदेम सी छुट जासे, ने भगवानेन मरजीन अनसारे जीवणे बाजी जासे।
Source notes (1)
- Cross-reference 1 थीसलुनीकी 5:24
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.