भगवानेन छाचला बुल
2 कुरींथी 5
काहाकी हामु जाणजे की जत्यार हामरो धरती परुन तसलो घर उदार देसे, ती हामुक भगवान भीणी सी सरगे पर एक असु बंगलु1 जड़से, जो हाते सी बन्नलो घर नी बाकुन जलम लग बन्नलो2 रवसे। हेरेमां ते हामु तरसजे ने मटी लालुच राखजे; की आपणा सरगेन घर काजे पेहेरी लेजे। की हीना काजे पेहरने सी हामु नांगरला नी जड़े। ने हामु हीना तम्बु मां रवता जाय्न बुज सी दबला कवता रवजे काहाकी हामु उतारने नी, बाकुन अळी पेहरने चाहजे, काहाकी चु जो मरणहार छे जीवन मां डुब जाय। जु हामुक हीनीत वात वाटे तीयार करला छे, ने चु भगवान छे, चु आपणुक सांय लीन जीव-आत्मा आप देदु,
अळतेन हामु जलम हिम्मत धरीन रवजे ने ज्य जाणजे; की जत्यार लग हामु डील मां रवजे, तत्यार लग मालीक सी छेटा छे। काहाकी हामु सीका काजे देखीन नी, बाकुन भुरसा सी चालजे। हेरेसी हामु हिम्मत राखीन रवजे, ने डील सी छेटा हयन मालीक साते रवणु अळी बी वारु समजे। हेरे वजे सी हामरे मनेन खुसी जी छे, की चाहे साते रवे, चाहे छेटा-छेटा रवे बाकुन हामु हीनाक बी जादा वारु गमे। काहाकी जरुड़ी छे, की हामु आखान हामु मसीन नीयाव बास अगळ खुली जाय, की आखा एक अदमी आपणे-आपणे वारु भुंडा कामेन बदलु जु हीयु डीलेन साहरे करला छे जड़े।
भगवानेन सी मेळ
हेरेसी मालीकेन धाक मानीन हामु माणसे काजे समजाड़जे बाकुन भगवान पर हामरु हाल उजेंतु छे; ने मारी आस जी छे, की तुंद्रो मन पर बी उजेंतो हय गुयला छे। हामु तेबी आपणी बड़ाय तुंद्रे अगळ नी करजे बाकुन हामु आपणे बारामां तुहुंक मटाय करनेन मुखु देजे, की तुहुं हीनुक जपाप आप सकु, जे मन पर नी, बाकुन मे कसुक करीन देखाड़ने वाळी वात पर सी मटाय करजे। कदी हामु बेहुस3 छे, ती भगवान वाटे; ने कदी समजी गुयला छे, ती तुंद्रे वाटे छे। काहाकी मसीन परम हामुक लाचार कर देय; हेरेसी की हामु ज्य समज्जे, की जत्यार एक आखा वाटे मर गुयु ती आखा मर गुया। ने चु हीनी वजे सी आखा वाटे मर्यु, की जे जीवतेला छे, चे अगा जाय्न आपणे वाटे नी जीवे बाकुन हेरे वाटे जे हींद्रे वाटे मर्या ने पछा मरलाम सी जीवता हय गुया।
अळतेन हय सी हामु काहालाक काजे बी डीलेन अनसारे नी समजणु, चाहजे कदी हामु मसी काजे बी डीलेन अनसारे जाणु हतलो, तेबी हय सी हीनाक असा नी जाणजे। हेरेसी कदी कुय ईसु मसी मां छे ती चु नवलु बन्नलु छे; जुन्डली वात जाती रय; देखु, आखी वात नवली हय गुय। चे आखी वात भगवान भीणी सी छे तीनाक मसीन साहरे आपणे साते हामरो हेळ-मेळ कर लेदा ने हेळ-मेळ कराड़नेन चाकरी हामुक सुप देदु। मतलब भगवान ईसु मसी मां हयन आपणे साते कळीन हेळ-मेळ कर देदा, ने हींद्रे पापेन गुनु हींद्रे पर नी लागाड़्या ने हीयु हेळ-मेळेन बुल हामुक सुप देदु।
हेरेसी हामु मसीन आवजी पर काम करन्या छे; मानु भगवान हामरे साहरे समजाड़ी र्यु: हामु मसी भीणी सी लीलघायजे की भगवान साते हेळ-मेळ कर लेदा। जे पाप सी अनजाण्या हतला, हीनुत काजे हयु हामरे वाटे पाप ठेहरायु, की हामु हींद्रे मां सी हयन भगवानेन धरमी बणी जाजे।
Source notes (3)
- Footnote बंगलु भवन
- Footnote जलम लग बन्नलो चिरस्थाई
- Footnote बेहुस बेसुध
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.