भगवानेन छाचला बुल
2 कुरींथी 4
धुळान बन्ला ठाहरा मां महंग्लो धन
हेरेसी जत्यार हामरे पर असी दया हवी, की हामु जी चाकरी जड़ी, ती हामुक हिम्मत नी हारजे। बाकुन हामुक सरम आवे असला सातायला काम काजे छुड़ देदा, ने नी चतराय सी चालजे, ने नी भगवानेन बुल मां भेसकु करजे, बाकुन छाचाय काजे उजेंतो करीन, भगवान अगळ हरेक माणसेन मन मां आपणी भलाय देखाड़जे। बाकुन कदी हामरे खुस-खबर पर पड़दु पड़लु छे, ती जी खत्तम हवणे वाळा वाटे पड़ला छे। ने तीनु पर जे भुरसु नी करे हींद्रे वाटे, तींद्री अक्कल काजे ईनी कळीन देव आंदळा कर देदला छे, काहाकी मसी जु भगवानेन तसु सीकु छे, हेरे झजळन्या खुस-खबरेन उजाळो हींद्रे पर नी भबळे। काहाकी हामु आपणे आप काजे नी, बाकुन मसी ईसु काजे परचार करजे, की चु मालीक छे; ने आपणा बारामां असो कहें, की हामु ईसुन वजे सी तुंद्रा पावर्या छे। हेरेसी की, भगवानुत छे, जु कह्यु, “आंदारलान सी वीजाळो, भबळे ने चु हामरे मन मां भबळे की भगवानेन सेक-सींगारेन उळखाण वीजाळो1 ईसु मसीन सीका सी भबळे।”
बाकुन हामरे धड़े चो धन धुळान ठाहरा मां मेकलो छे, की जी कदी नी खत्तम हवणे वाळी ताकत हामरे भीणी सी नी, बाकुन भगवान भीणी सी ठेरे। हामरे चारे मेर सी दुख ते भुकतजे, बाकुन पीड़ा मां नी पड़जे; घांगवायला ते छे, बाकुन नीरास नी हवजे। माणसे एला ते पाड़े बाकुन भगवान हामुक नी छुड़े, माणसे हामुक पाड़े, बाकुन खत्तम नी करे। हामु ईसुन मरण काजे आपणा डील मां हर घड़ी लीन फीरजे; की ईसुन जीवन बी हामरा डील मां उजेंतो हवे। काहाकी हामु जीवते जीव जलम ईसुन वजे सी मुतेन हात मां सुपायजे, की ईसुन जीवन बी हामरे मरला डील मां उजेंतो हवे। हेरेसी मुत ते हामरे पर ताकत लावे ने जीवन तुंद्रे पर।
हेरेसी की हामरे मां चीत भुरसान आत्मा छे, “जेरे बारामां लिखलो छे, मे भुरसु कर्यु।” हेरेसी कह्यु अळतेन हामु बी भुरसु करजे, तेरेसी बुलजे। काहाकी हामु जाणजे, की जु मालीक ईसु काजे मरलाम सी जीवाड़े, चु हामुक बी ईसु मां साजल्यु जाणीन जीवाड़ेसे, ने तुंद्रे साते आपणे अगळ उबा करसे। काहाकी आखी चीजे तुंद्रे वाटे छे, काहाकी गीण-दयान साहरे अदुस हयन भगवानेन सेक-सींगार वाटे तु बेसकु वारु छे करीन बी बड़ावे।
भुरसा मां जीवणु
हेरेसी हामु हिम्मत नी, हारजे कदी हामरा बाहरलो माणसेन सीकु खत्तम हय जासे तेबी हामरो माहींन माणसेन सीकु दाहड़ीन-दाहड़ीन नवलु हवतु जाय। काहाकी हामरु थुड़ाक दाहड़ान हळकु दुख हामरे वाटे बेसका खास ने जलमेन सेक-सींगार देवाड़े। ने हामु ते देखली चीज काजे नी बाकुन नी देखाय असली चीज काजे देखता रवजे काहाकी देखली चीज, थुड़ाक दाहड़ान छे, बाकुन नी देखली चीज जलम बणीन रवसे।
Source notes (1)
- Footnote वीजाळो ज्योति
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.