Bhadrawahi Bible
सपन्याह 3
यरूशलेमेरो पाप ते तैसेरो छुटकारो
अफ़सोस तैस बगावत केरनेबाले ते ज़ालम ते अशुद्ध यरूशलेम नगरे पुड़! तै केन्चेरी न शुने, ते न केन्चेरू समझ़ानू मन्ने, तैनी यहोवा परमेशरे पुड़ भरोसो नईं कियोरो, तै अपने परमेशरे कां नेड़े न एज्जे।
तैस नगरेरे हाकिम गरज़नेबाले शेरन; ते तैसेरे न्यायी ड्लवझ़ी शिकार केरनेबालां गिद्दां आन, ज़ैना झ़ेझ़ां जो किछ न रखन। तैसेरे नबी बेकार बकने बाले ते धोखेबाज़न, तैसेरे याजकेईं पवित्र ठार भी अशुद्ध केरतां छ़डी ते कानून भी खिचतां रख्खो। यहोवा ज़ै तैसेरे मझ़ाटे, तै धर्मीए, तै गैर न्यायी न केरे; तै अपनो न्याय रोज़ बांदो केरते ते तै अपने कियोरे पुड़ शरमिन्दा न भोए। यहोवा ज़ोते, मीं गैर कौमां इट्ठां नाश की, कि तैन केरे कूने बाले गुम्मट उज़ड़ी जे; मीं तैन केरि सड़कां इड़ी तगर खाली की, कि कोई तैन पुड़ च़ले; तैन केरे नगर इड़ी तगर नाश भोए कि तैन मां कोई मैन्हु बल्के कोई भी प्राणी न राव। मीं ज़ोवं, “हुनी तू मेरो डर मन्नेली, ते मेरी झ़िड़क मन्नेली ज़ैस सेइं तैसेरी रानेरी ठार ज़ैन मीं ठहरावरू थियूं तैसेरे मुताबिक नाश न भोए। पन तैना सब किसमेरां बुरां कम्मां खुशी सेइं केरने लगे।”
एल्हेरेलेइ यहोवा एन ज़ोते, “ज़ांतगर अवं नाश केरनेरे लेई खड़ो न भोईं, मीं इन थापोरूए कि कौमां-कौमां केरे ते रियासतां-रियासतां केरे लोकन अवं अकोट्ठे केरेलो, कि तैन पुड़ अपने क्रोधेरी अग पूरे तरीके सेइं भड़केइलो; किजोकि सारी धरती मेरे जलनरी अग्गी सेइं भस्म भोल्ही।1
“तैखन अवं मुल्खे-मुल्खेरे लोकन सेइं अक नंव्वी ते शुद्ध भाषा करेइलो, कि तैना सब यहोवा कां प्राथना केरन, ते अक मन भोइतां कंधे सेइं कंधे मिलेइतां तैसेरी सेवा केरन। कूशेरे दरियाए पारेरां मीं कां बिनती केरनेबाले इड़ी तगर कि मेरे तितर-बितर भोवरे लोक मीं कां च़ढ़तल घिन्तां एज्जेले।
“तैस दिहाड़े, तू अपने सब बड्डे करां बड्डे कम्मन सेइं ज़ैन करां तू मीं करां फिरी जेवरी थी, फिरी शरमिन्दा न भोल्ही। तैस वक्ते अवं तेरे दरमियाने मरां तैन्न दूर केरेलो ज़ैना अपने घमण्डे सेइं खुशी भोतन, ते तू मेरे पवित्र पहाड़ेरे भवने पुड़ फिरी कधे अभिमान न केरेली। पन अवं तेरे दरमियाने मां दीन ते कंगाल लोकां केरू अक दल बच़ेइतां रखेलो, ते तैना यहोवारे नंव्वेरी शरण नेले। इस्राएलेरे बच़ोरे लोक न त बुराई केरेले ते न झूठ ज़ोले, ते न तैन केरे ऐशी मरां धोखेरी गल्लां निसेली। तैना च़रेले ते आराम केरेले, ते कोई तैन केरो डराने बालो न भोल्हो।”2
हे सिय्योनेरी कुइये3, उच्ची आवाज़ी सेइं गीत ज़ो, हे इस्राएल जयजयकार केर! हे यरूशलेम नगरेरे लोकव अपने पूरे मने सेइं आनन्द केरा ते खुशी भोथ! यहोवाए तेरी सज़ाह दूर कियोरीए, ते तेरे दुश्मन दूर कियोरेन। इस्राएलेरो राज़ो यहोवा तेरे दरमियाने मांए, एल्हेरेलेइ फिरी तीं पुड़ आफत न एज्जेली। तैस दिहाड़े यरूशलेमे सेइं एन ज़ोवं गालू, “हे सिय्योन डर न, तेरे हथ ढिल्ले न भोन। तेरो परमेशर यहोवा तीं सेइं साथीए, तै बच़ानेबालो बड़ो शक्तिमाने। तै तेरे वजाई सेइं खुशी मनालो, ते तै अपने प्यारेरे वजाई सेइं च़ुप रालो, फिरी उच्चे आवाज़ी सेइं गीतां ज़ोतो तेरे वजाई सेइं मघन भोल्हो।
“ज़ैना लोक ठहरावरे तिहारन मां शामल न भोनेरे वजाई सेइं दुखी रहतन, तैन्न अवं अकोट्ठे केरेलो, किजोकि तैना तेरे आन; ते तैसेरी बदनामी तैन्न बोझ लगतीए। तैस मौके अवं तैन सेभन सेइं ठीक बर्ताव केरेलो ज़ैना तीं दुख देतन। अवं टोन्टन बेझ़ोइलो, ते ज़बरदस्ती कढोरे लोक अकोट्ठे केरेलो, ते ज़ैन केरे शरमरी चर्चा सारे धेरती पुड़ फैलोरीए, तैन केरि तारीफ़ ते मुशूरी हर पासे फैलेइलो।4 तैस्से मौके अवं तुसन नेइलो, ते तैस्से मौके अवं तुसन अकोट्ठे केरेलो। ते सेभी केरे सामने तुश्शी समृद्धि वापस देइलो, तैखन धेरतरे सैरी कौमां केरे दरमियान अवं तुश्शी इज़्ज़त ते तारीफ़ बधेइलो,” यहोवा इन ज़ोते।
Source notes (4)
- Cross-reference प्रका. 16:1.
- Cross-reference प्रका. 14:5.
- Footnote सिय्योनेरी कुइये इस्राएली लोक
- Cross-reference मीक. 4:6-7.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.