Bhadrawahi Bible
सपन्याह 2
मन फिरानेरे लेई कुजाने
हे बेशर्म कौमरे लोकव, अकोट्ठे भोथ! एस करां पेइले सज़ारो हुक्म पूरो भोए ते बंच़नेरी दिहाड़ी भूंसेरी ज़ेरि निस्से, ते यहोवारी भड़कोरी सरकरी दिहाड़ी तुसन पुड़ पे, ते यहोवारे क्रोधेरी दिहाड़ी तुसन पुड़ एज्जे, तुस अकोट्ठे भोथ। हे धेरतरे सब हलीम लोकव, हे यहोवारे नियमेरे मन्ने बालव, तैस तोपते राथ। धार्मिकताई सेइं तोप्पा, ते नम्रता सेइं तोप्पा; भोइ सकते तुसन यहोवारे क्रोधेरे दिहाड़े मां शरण मैल्हेली।
किजोकि गाज़ा नगरे मां त कोई न रालो ते अश्कलोन नगर बेरान भोइ गालू। ते अश्दोद नगरेरे लोक भर दुपहरेईं कढे गाले, ते एक्रोन नगर बरबाद भोइ गालू।
यहोवा इन तुश्शे खलाफ ज़ोते, समुन्दरेरे बन्ने रानेबालन पुड़ अफ़सोस। करेती कौमी पुड़ अफ़सोस; हे कनान, ते हे पलिश्ती लोकां केरे मुल्ख, यहोवारू वचन तेरे खलाफे; ते अवं तीं एन्च़रे नाश केरेलो कि तीं मां कोई न बच़ेलो। ते तैस्से समुन्दरेरे बन्ने पुड़ पुहालां केरां घरां भोल्हां ते भैड्डां केरे बाड़े समेत चरागां भोल्ही। मतलब तैए सुमन्दरेरो बन्नो यहूदारे खानदानेरे बच़ोरे लोकन मैल्हेलो, ते तैना तैस्से मां च़रेले। तैना अश्कलोन नगरेरे शारोरे घरन मां ड्लवझ़ी वापस एज्जेले, किजोकि तैन केरो परमेशर यहोवा तैन केरि खबर नेइतां तैन केरि समृद्धि वापस आनेलो।1
यहोवा ज़ोते, “मोआबी लोकेईं ज़ै मेरे लोकां केरि बदनामी ते अम्मोनी लोकेईं ज़ै तैसेरी निन्दा केरतां तैसेरे मुल्खे पुड़ चढ़ाई कियोरीए, तै मीं शुनोरीए।” एल्हेरेलेइ इस्राएलेरो परमेशर, सेना केरो यहोवा इन ज़ोते, “मेरे ज़िन्दगरी कसम, पक्को मोआब सदोमेरो ज़ेरो, ते अम्मोनी लोक गमोरारे ज़ेरे शड्लारी ठार ते लूनेरी खानरे ज़ेरे भोइ गाले, ते हमेशा उज़ड़ोरे राले। मेरे बच़ोरे लोक तैन्न लुटेले, ते मेरे कौमरे बाकी लोक तैन्न अपने हिस्से मां मैल्हेले।” ई तैन केरे घमण्डेरो बदलो भोल्हो, किजोकि तैनेईं सेना केरे यहोवारे लोकां केरि बदनामी कियोरीए, ते तैस पुड़ घमण्ड कियोरूए। यहोवा तैन्न डराने बालो लेइहोलो, तै धेरतरे सैरी देबतन नियन्ने मारेलो, ते कौमां-कौमां केरे सारे जज़ीरां केरे रानेबाले एपनी-एपनी ठारी पुड़ेरां तैस कां झुकेले।
हे कूशी लोकव, तुसां भी मेरी तलवारी सेइं मारे गाले। यहोवा अपनो हथ उत्तरेरे पासे खड़ो केरेलो, ते अश्शूर मुल्खेरो नाश केरेलो, ते नीनवे नगरे बेरान केरतां जंगलेरो ज़ेरो खुशक केरेलो। तैसेरे दरमियान सब किसमां केरे जंगली जानबर झुण्डेरे झुण्ड बिश्शेले; तैसेरे खम्भां केरे च़ोटन पुड़ धनेश ते शेइलां राती रालां ते तैसेरे दैरन मां बाशेलां। तैसेरां दारां खाली पेवरां रालां, ते गैइड़ेरी लकड़ी खोल्ली गाली। ऐह तैए नगरी, ज़ै मघन रहतीए ते निडर रहती थी, सोचती थी कि अव्वें आईं, ते मेरे अलावा होरो कोई अथ्थी नईं। पन हुनी ई उज़ाड़ ते जंगली जानबरां केरि बिशनेरी ठार बेनि जेवरीए, इड़ी तगर कि ज़ै कोई इसेरे नेड़े च़लेलो, तै च़ैड़ी देलो ते हथ हिलालो।
Source notes (1)
- Cross-reference उत्प. 19:23-29.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.