Bhadrawahi Bible
सपन्याह 1
आमोनेरे मट्ठे यहूदा प्रदेशेरे राज़े योशिय्याहेरे राज़ केरनेरे दिहाड़न मां सपन्याह ज़ैन हिजकिय्याहेरे मट्ठे अमर्याहेरू पड़पोट्लड़ू ते गदल्याहेरू पोट्लड़ू ते कूशी नंव्वे मैन्हेरू मट्ठू थियूं, यहोवा तैस सेइं इन ज़ोवं;
“अवं धेरती पुड़ेरां सेभी केरो खातमो केरेलो,” यहोवा एन ज़ोते। “अवं मैन्हु ते जानबर दूईयां केरो खातमो केरेलो; अवं अम्बरे च़ुड़ोलू ते समुन्दरी मेछ़ली केरो, ते दुष्टां केरि रेखोरी ठोकरां केरि वजारो भी खातमो केरेलो; ते अवं मैन्हु केरो भी धेरती पुड़ेरां खातमो केरेलो,” यहोवा एन ज़ोते।1 “अवं यहूदा पुड़ ते यरूशलेम नगरेरे सेभी लोकन पुड़ अपनो हथ खड़ो केरेलो, अवं इस ठारी पुड़ बाल देबतेरे बच़ोरे लोकन ते याजकन समेत देबतां केरे पुजैरी केरे नंव्वेरो नाश केरतां छ़डेलो। ज़ैना लोक अपने घरेरे लाए पुड़ेरां अम्बरेरे तारन ते दिहाड़ो, चैंदनी कां मथ्थो टेकतन, ते ज़ैना लोक मथ्थो टेकतन ते यहोवारी कसम खातन ते मिल्कोम देबतेरी भी कसम खातन। ते ज़ैना लोक यहोवा पत्ती च़लने करां फिरी जेवरेन, ते ज़ैनेईं न त यहोवारी तलाश की, ते न तैसेरी तलाशी मां लगे, तैन केरो भी अवं सत्यानाश केरतां छ़डेलो।”
यहोवा परमेशरेरे सामने च़ुप राथ! किजोकि यहोवारी न्यायेरी दिहाड़ी नेड़े। यहोवाए बलिदान तियार कियोरूए, ते अपने मेहमान तियार कियोरेन। ते यहोवारे बलिदानेरे दिहाड़े, “अवं हाकिमन ते राजकुमारन ते ज़ेत्रेइं परदेशी केरां लिगड़ां लेवरन, तैन भी सज़ाह देइलो। तैस दिहाड़े अवं तैन सेभन2 सज़ाह देइलो ज़ैना खुरन लंघतन, ते ज़ैना अपने मालिकेरे घरे ज़ुलमे सेइं ते धोखे सेइं भेरि देतन।”
यहोवा एन ज़ोते, “तैस दिहाड़े मछ़ली नंव्वेरे फाटके करां अक आवाज़ शुनोली; ते नेव्वीं पहैड़ी मिश्नाह नगरे मरां हाहाकारेरी ते पहैड़न पुड़ां बड़े धमाकेरी आवाज़ भोल्ही। हे मक्तेशेरे रानेबालव, अफ़सोस, अफ़सोस केरा! किजोकि सब बुपारी मिटी जे; ज़ेत्रे चैंदी सेइं लद्दोरे थिये, तैन सेभी केरो नाश भोइ जेव। तैस मौके अवं दीयो बैलतां यरूशलेमे मां तोपेलो, ज़ैना लोक थले लगोरे दाछ़रे रसेरे ज़ेरे ते मैलेरे ज़ेरे बिशतां मने मां ज़ोतन कि यहोवा त भलू केरेलो ते न बुरू, तैन अवं सज़ाह देइलो। तैखन तैन केरि दौलत लुट्टी गाली, ते तैन केरां घरां बेरान भोइ गालां; तैना घरां त बनाले, पन तैन मां बेस्सी न बटेले। ते दाछ़री बागां त लाएले, पन तैन केरो रस न पी बटेले।”
यहोवारी न्यायेरी खतरनाक दिहाड़ी नेड़े एज्जी राहोरीए, तै बेड़ी तेज़ी सेइं नेड़े एज्जी राहोरीए; यहोवारे दिहैड़ी आवाज़ शुनोतीए, तैड़ी बहादर सिपाही दुखेरे मारे चिन्डां मारतन।3 तै क्रोधेरी दिहाड़ी भोल्ही, तै दुख ते मुसीबतरी दिहाड़ी, तै विनाशेरी दिहाड़ी, ते आंधरेरी दिहाड़ी, तै बिदलार ते काले बिदलारा दिहाड़ी भोल्ही। तै क़िले बाले नगरां ते उच्चे गुम्मटां केरे खलाफ जंगरो नरशिंगो बज़ाने ते ललकारनेरी दिहाड़ी भोल्ही। यहोवा ज़ोते, अवं मैन्हन मुसीबती मां छ़डेलो, ते तैना कांना केरे ज़ेरे च़लेले, किजोकि तैनेईं यहोवारे खलाफ पाप कियोरोए; तैन केरो खून मित्तरो ज़ेरो बगेलो ते तैन केरू मास विष्ठारू ज़ेरू शारू गालू। यहोवारी क्रोधेरी दिहैड़ी मां, न त चाँदी तैन बच़ाली, ते न सोन्नू तैन बच़ालू; तै धेरतरे सारे लोकन घबरेइतां तैन केरो अन्त केरेलो।
Source notes (3)
- Cross-reference मत. 13:41.
- Footnote तैन सेभन मतलब ज़ैना लोक मूरती पूज़ा केरनेबालां केरे रीति-रूवाज़न मन्ते थिये।
- Cross-reference प्रका. 6:17.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.