Bhadrawahi Bible
हाग्गै 1
परमेशरेरू भवन बनानेरो हुक्म
दारा राज़ेरी हुकूमतरे दूइयोवं सालेरे शेइयोवं महीनेरे पेइले दिहाड़े, यहोवा हाग्गै नेबेरे ज़िरिये शालतीएलेरे मट्ठे जरुब्बाबेले सेइं ज़ै यहूदारो हाकिम थियो, ते यहोसादाकेरे मट्ठे यहोशू महायाजके सेइं ज़ोवं, “सेना केरो यहोवा एन ज़ोते, एना लोक त ज़ोतन कि यहोवारू भवन बनानेरो सही वक्त हेजू नईं एवरो।” फिरी यहोवा हाग्गै नेबेरे ज़िरिये ज़ोवं, “कुन तुश्शे लेई अपने खूबसूरत घरे मां रानेरे लेई वक्ते, हालांकि ई भवन उज़ड़ी जेवरोए? एल्हेरेलेइ सेना केरो यहोवा एन ज़ोते, अपने-अपने चाल-चलने पुड़ ध्यान केरा। तुसेईं बीज़ त काही बेवं, पन थोड़ू कट्टू; तुस खाने त खातथ, पन पेट न भेरोए; तुसां पानी पीने त पीतथ, पन ट्लिश न हटे; तुसां लिगड़ां त लातथ, पन निघोथ न; ते ज़ै मज़दूरी केरते, तै एपनी मज़दूरारी कमाई छ़िंदोरी थेलड़ी मां रखते।
“सेना केरो यहोवा परमेशर तुसन सेइं एन ज़ोते, अपने-अपने चाल चलने पुड़ सोचा। पहाड़े पुड़ गाथ ते लकड़ी आनां ते इस भवने बनाथ; ते अवं तैन हेरतां खुशी भोल्हो, ते मेरी महिमा भोल्ही, यहोवा एन ज़ोते। तुसेईं बड़े फसलरी उमीद रख्खी, पन हेरा थोड़ीए। ते ज़ैखन तुसेईं तै घरे जो आनी, तैखन मीं तै उज़ैड़तां छ़डी। सेना केरो यहोवा एन ज़ोते, एन्च़रे किजो भोवं? कुन एल्हेरेलेइ नईं, एल्हेरेलेइ अम्बरे मरां ट्लेल पेनी बन्द भोइ ते ज़मीनां अपनि फसल देनी बन्द की। ते मेरे हुक्मे सेइं धरती ते पहाड़न पुड़, ते अन्न ते नंव्वों दाछ़रे रस्से पुड़ ज़ैतूनेरे सज़रे तेले पुड़, ते ज़ैन किछ ज़मीनी मरां उगते तैस पुड़, ते मैन्हन ते पैलतू जानबरन पुड़, ते तैन केरि मेहनतरी कमैई पुड़ भी काल पेलो।”
लोक यहोवारो हुक्म मनतन
तैखन शालतीएलेरे मट्ठे जरुब्बाबेल ते यहोसादाकेरे मट्ठे यहोशू महायाजके सब बच़ोरे लोकन समेत परमेशर यहोवारी ऐह गल मन्नी। ते ज़ै वचन तैन केरे परमेशर यहोवा तैन सेइं ज़ोनेरे लेई हाग्गै नबी भेज़ोरो थियो, तै तैनेईं मन्नो; ते लोकेईं यहोवारो डर मन्नो। तैखन यहोवारे नेबे हाग्गै यहोवारो ऐह हुक्म मैलतां तैन लोकन सेइं ज़ोवं, “यहोवा एन ज़ोते, कि अवं तुसन सेइं साथी आईं।”1 ते यहोवा शालतीएलेरू मट्ठू जरुब्बाबेल ज़ै यहूदारो हाकिम थियो, ते यहोसादाकेरू मट्ठू यहोशू महायाजक, ते सब बच़ोरे लोकां केरो मन उभैरतां जोशे सेइं भरो तैखन तैना एइतां अपने परमेशर, सेना केरे यहोवारे भवने बनाने लगे। एन दारा राज़ेरी हुकूमतरे दूइयोवं सालेरे शेइयोवं महीनेरे च़ौबियोवं दिहाड़े भोवं।
Source notes (1)
- Cross-reference मत. 28:20.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.