Bhadrawahi Bible
भजन संहिता 99
पवित्र भोनेरे लेई तारीफ़रू गीत
यहोवा राज़ोए, ते मुल्खां-मुल्खां केरे लोक थरकन!
तै करूबन पुड़ बिशोरोए; धरती हिल्ली जेई!
यहोवा सिय्योने मां महाने;
ते तै मुल्खां-मुल्खां केरे लोकन पुड़ प्रधाने।
सारे लोक तेरे महान ते डरेरे काबल नंव्वेरू शुक्र केरन!
तै त पवित्रे।
राज़ेरी शक्ति1 न्याय सेइं मेल रखतीए,
तींए सच़्च़ाई कायम की;
न्याय ते धार्मिकता याकूबे मां तींए लागू की।
इश्शे परमेशर यहोवारी बडीयाई केरा;
ते तैसेरी पव्वां केरि चेवकरे सामने मथ्थो टेका!
तै पवित्रे!
तैसेरे याजकन मरां मूसा ते हारून,
ते तैन केरे प्राथना केरनेबालन मरां शमूएल थियो ज़ैना यहोवा पुकारते थिये, ते तै तैन केरि शुनतो थियो।
तै बिदलारारे खम्भे मरां तैन सेइं गल्लां केरतो थियो;
ते तैना तैस कानूनेरे ते तैसेरी दित्तोरी विधन पुड़ च़लते थिये।
हे इश्शे परमेशर यहोवा, तू तैन केरि शुनतो थियो;
तू तैन केरे कम्मां केरो बदलो त नेतो थियो,
फिरी भी तैन केरे लेई माफ़ केरनेबालो परमेशर थियो।
इश्शे परमेशर यहोवारी बडीयाई केरा,
ते तैसेरे पवित्र पहाड़े पुड़ मथ्थो टेका;
किजोकि इश्शो परमेशर यहोवा पवित्रे!
Source notes (1)
- Footnote राज़ेरी शक्ति राज़ेरो मतलब इड़ी यहोवाए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.