Bhadrawahi Bible
भजन संहिता 98
मुक्ति ते न्यायेरे लेई तारीफ़रू गीत
भजन
यहोवारे लेई अक नंव्वू गीत ज़ोथ,
किजोकि तैनी चमत्कार कियोरेन!
तैसेरे देइने हथ्थे ते पवित्र पाखड़ां तैस ज़ींत दित्तोरीए।
यहोवा दित्तोरी मुक्ति बांदी की,
तैने गैर कौमां केरे नज़री मां अपनि धार्मिकता बांदी की।
तैनी इस्राएली लोकन पुड़ अपनो प्यार
ते सच़्च़ैइअरी खबर नी,
ते धेरतरे सब दूर-दूरेरे मुल्खेईं इश्शे परमेशरेरी दित्तोरी मुक्ति लाहोरीए।
हे सारे दुनियारे लोकव, यहोवारू जयजयकार केरा;
जोशे सेइं जयजयकार केरा, ते भजन ज़ोथ!
सितार बज़ेइतां यहोवारू भजन ज़ोथ,
सैन्गी बज़ेइतां भजनेरो सुर बज़ाथ।
तुरही ते नरशिंगे बज़ेइतां
यहोवा राज़ेरू जयजयकार केरा।
समुन्दर ते ज़ैन किछ तैस मांए सब गरज़न;
दुनिया ते तैस मां रानेबाले उच्ची आवाज़ी सेइं ज़ोन!
दरिया च़ैड़ी बज़ान;
ते पहाड़ां मिलतां जयजयकार केरन।
इन यहोवारे सामने भोए, किजोकि तै धेरतरो न्याय केरनेरे लेई एजनेबालोए,
तै धार्मिकताई सेइं दुनियारो,
ते सच़्च़ैई सेइं मुल्खे-मुल्खेरे लोकां केरो न्याय केरेलो।1
Source notes (1)
- Cross-reference प्रेरित. 17:31.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.