Bhadrawahi Bible
भजन संहिता 48
सिय्योने मां परमेशरेरी महिमा
कोरह खानदानेरे लोकां केरू भजन
इश्शे परमेशरेरे नगरे1 मां, ते अपने
पवित्र पहाड़े2 पुड़
यहोवा महान ते बड़े तारीफ़रे काबले! (सेला)
सिय्योन पहाड़ ऊँचाई मां खूबसूरत ते सारी
धेरतरे खुशरी वजाए,
महान राज़ेरू नगर उत्तरेरे पासे आहे।3
तैसेरे मेहलन मां परमेशर उच्चो क़िलो
मन्नो जेवरोए
किजोकि हेरा, राज़े सेना सने अकोट्ठे भोए,
तैना साथी अग्रोवं च़ले।
तैनेईं एप्पु तैस नगरे मां हेरू ते डेरि जे,
तैना डेरतां नेश्शी जे।
तैड़ी तैन थर्क लेग्गी जेई, ते तैन
बच्चो ज़ानेरी ज़ेरि तकलीफ भोने लगी।
तू पूर्वी पासेरे बाते सेइं
तर्शीश नगरेरे ज़िहाज़न ट्लोड़तस।
सेनारे यहोवारे नगरे मां,
अपने परमेशरेरे नगरे मां, ज़ेन्च़रे असेईं
शुनोरू थियूं, तेन्च़रे लाहेरू भी आहे;
परमेशर तैस सदा मज़बूत ते कायम रखेलो।
हे परमेशर, असेईं तेरे भवने अन्तर
तेरी दयाई पुड़ ध्यान कियोरूए।
हे परमेशर तेरे नंव्वेरे काबल
तेरी बडीयाई धेरतरे बन्ने तगर भोए।
तेरो देइनो हथ धार्मिकताई सेइं भेरतांए;
तेरे न्यायेरे कम्मां केरि वजाई सेइं
सिय्योन पहाड़ आनन्द मनाए,
ते यहूदा नगरेरी कुइयां मघन भोन!
सिय्योनेरे च़ेवरे पासे च़ला, ते तैसेरे
चक्कर लाथ।
तैसेरे गुम्मट गना,
तैसेरी शहरपनाही पुड़ नज़र देथ तैसेरे
मेहलन ध्याने सेइं हेरा;
ज़ैस सेइं कि तुस एजने बाले पीढ़रे लोकन सेइं
इस गल्लरे बारे मां बियान केरि सकथ।
किजोकि तै परमेशर हमेशा-हमेशा इश्शो
परमेशरे,
तै मौती तगर इश्शी अगवाई केरेलो।
Source notes (3)
- Footnote परमेशरेरे नगरे यरूशलेम नगर
- Footnote पवित्र पहाड़े सिय्योन पहाड़
- Cross-reference मत. 5:35;यिर्म. 3:19.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.