Bhadrawahi Bible
भजन संहिता 47
परमेशर इश्शो राज़ो
साज़ बज़ानेबालेरे प्रधानेरे लेई कोरह खानदानेरे लोकां केरू भजन
हे मुल्ख-मुल्खेरे सब लोकव, च़ैड़ी बज़ाथ!
उच्चे शब्दन सेइं परमेशरेरे लेई जयजयकार केरा!
किजोकि यहोवा परमप्रधान ते डरेरे काबले,
तै सैरी धेरती पुड़ महाराज़ोए।
तै मुल्ख-मुल्खेरे लोकन इश्शे सामने
उन्ढे केरते,
ते कौमी-कौमी इश्शे पव्वन हैठ केरते।
तै इश्शे लेई रोड़ो हिस्सो च़ुनेलो,
ज़ै तैसेरे ट्लारे याकूबेरे घमण्डेरी वजाए। (सेला)
परमेशर जयजयकारे सेइं साथी,
यहोवा नरशिंगेरी आवाज़ी सेइं उबरो जेवरोए।1
परमेशरेरू भजन ज़ोथ; भजन ज़ोथ!
इश्शे महाराज़ेरू भजन ज़ोथ; भजन ज़ोथ!
किजोकि परमेशर सैरी दुनियारो महाराज़ोए,
ते अक्ली सेइं भजन ज़ोथ।
परमेशर कौमन पुड़ हुकूमत केरते;
परमेशर अपने पवित्र तखते पुड़
बिशोरोए।2
मुल्खे-मुल्खेरे राईस लोक अब्राहमेरे परमेशरेरे
लोक भोनेरे लेई अकोट्ठे भेवरेन।
किजोकि धेरतरी ढालां परमेशरेरे कब्ज़े मां आन,
तै त महाने।
Source notes (2)
- Cross-reference लूक. 24:51;यूह. 6:62;प्रेरित. 1:9;भज. 68:1-2.
- Cross-reference भज. 96:10;प्रका. 19:6.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.