Bhadrawahi Bible
भजन संहिता 31:24
Verse 24 is marked below, with the whole chapter around it. Read from the start
परमेशरे पुड़ भरोसेरी प्राथना
साज़ बज़ानेबालां केरे प्रधानेरे लेई दाऊदेरू भजन
हे यहोवा, मेरो भरोसो तीं पुड़े;
मीं कधी शरमिन्दे न भोने दे;
तू अपने धर्मी भोनेरे वजाई सेइं मीं छुटा!
अपनो कन मेरे पासे लेइतां,
मीं लूशी छुटा!1
किजोकि तू मेरे लेई चट्टान ते मेरो क़िलोस;
एल्हेरेलेइ अपने नंव्वेरे खातर मेरी अगवाई केर।
ते मीं अग्रोवं च़ला।
मीं तैस जाले मरां कढ,
ज़ैन तैनेईं मेरे लेई बछ़ावरूए,
किजोकि तूए मेरो मज़बूत क़िलोस।
अवं अपनि आत्मा तेरे हथ्थे मां सौंफताईं;
हे यहोवा, हे सच़्च़े परमेशर,
तीं अवं घिन्तां आज़ाद कियोरोईं।2
मीं तैन सेइं नफरते,
ज़ैना झूठी मूरती केरि पूज़ा केरतन;
पन मेरो भरोसो यहोवा पुड़े।3
अवं तेरी दयाई सेइं बड़ो खुशी ते आनन्दे मां रहताईं,
किजोकि तीं मेरे दुखे पुड़ नज़र कियोरीए,
मेरे दुखेरे वक्ते तीं मेरी खबर घिन्नोरीए।
ते तीं अवं मेरे दुश्मना केरे हथ्थे मां न सौंफी दित्तो;
तीं मेरे पव खुल्ली ठैरी रखोरेन।
हे यहोवा, मीं पुड़ दया केर किजोकि अवं मुसीबती मां आईं,
मेरी एछ़्छ़ी बल्के मेरो प्राण
ते जान सब दुखेरे मारे गेली गाचे।
किजोकि मेरी जान दुखे मां
ते मेरी उमर ओशा छ़डते-छ़डते मुक्की जेई;
मेरो ज़ोर मेरे पापेरे वजाई सेइं घटतो राव;
ते मेरी हेड्डी भी गेली जेई।
अपने सब दुश्मना केरे वजाई सेइं
मेरे पड़ोसन मां मेरी बदनामी भोवरीए,
अवं अपने ज़ान पिशानी बाला केरे लेई डरेरी वजा आईं;
ज़ैना मीं बत्ती मां लातन तैना मीं करां दूर नशतन।
अवं मुड़देरो ज़ेरो लोकां केरे मने मरां बिसरी जेव,
अवं त ट्लुटोरे भांडेरो ज़ेरो भोवरोईं।
मीं बड़े लोकन करां अपनि निन्दा शुनोरीए,
च़ेवरे पासन डरे-डरे!
ज़ैखन तैनेईं मिलतां सलाह कियोरीए,
तैखन मेरी जान खतम केरनेरी योजना की।
पन हे यहोवा, मेरो भरोसो सिर्फ तींए पुड़े,
मीं ज़ोवं, “तू मेरो परमेशरस।”
मेरे दिहाड़े तेरे हथ्थे मां आन;
तू मीं मेरे दुश्मन्न
ते मेरे सताने बालां केरे हथ्थे मरां छुटा।
ते अपने तुत्तरेरी लौ अपने दासे पुड़ चमका;
अपने करुणाई सेइं मीं बच़ा।
हे यहोवा, मीं शरमिन्दा न भोने दे,
किजोकि मीं तींए कां प्राथना कियोरीए;
दुष्ट लोक शरमिन्दा भोन
ते तैना पाताले मां च़ुपच़ाप पेवरे रान।
ज़ैना घमण्डे ते बेइज़्ज़ती सेइं धर्मी मैन्हेरी निन्दा केरतन,
तैन केरे झूठ ज़ोनेबाले ओठ बन्द किये गान।4
ओ, तेरी भलियाई केत्री बड्डीए
ज़ै तीं अपने डरने बालां केरे लेई रख्खोरीए,
ते अपने भरोसो रखनेबालां केरे लेई मैन्हु केरे
सामने बांदी भी कियोरीए।
तू तैन दर्शन देनेरे छ़ेपोरी ठारी मां
मैन्हु केरि बुरी मेण्डली करां छ़ुपेइतां रखेलो;
तू तैन्न अपने डेरे मां लड़ैई करां
छ़ुपेइतां रखेलो
धने यहोवा,
किजोकि तैनी अवं क़िले बाले नगरे मां रेखतां
मीं पुड़ बड़ी करुणा कियोरीए।
मीं त घबरेइतां ज़ोवरू थियूं कि
अवं यहोवारी नज़री करां दूर भोइ जेव।
फिरी भी ज़ैखन अवं तीं कां बिनती केरि,
तैखन तीं मेरी बिनतरी आवाज़ शुनी।
हे यहोवारे सब भक्तव, तैस सेइं प्यार रखा!
यहोवा ईमानदार लोकां केरि त हिफाज़त केरते,
पन ज़ै घमण्ड केरते,
तैस तै रोड़े-च़ारे बदलो देते।
हे यहोवा पुड़ उमीद रखने बालव,
सब मज़बूत भोथ ते तुश्शे दिल भी मज़बूत भोन।
Source notes (4)
- Cross-reference भज. 102:2.
- Cross-reference लूक. 23:46;प्रेरित. 7:59;1 पत. 4:19.
- Cross-reference भज. 24:4.
- Cross-reference भज. 94:4;120:2.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.