Bhadrawahi Bible
भजन संहिता 30
शुक्रगुज़ेरारी प्राथना
भवनेरे लेई दाऊदेरू भजन
हे यहोवा, अवं तेरी तारीफ़ केरेलो
किजोकि तीं अवं गढे मरां खिचतां कढोरोईं,
ते तीं मेरे दुश्मन मीं पुड़,
खुश भोने नईं दित्तोरोए।
हे मेरे परमेशर यहोवा,
मीं तीं कां मद्दतरे लेई बिनती की ते तीं मीं चंगाई दित्तोरिए।
हे यहोवा तीं मेरे प्राण अधलोके मरां कढोरेन,
ते तीं अवं ज़ींतो रखोरोइं,
ते कब्री मां दबने करां बच़वरोईं।
तुस ज़ैना वफादार आथ!
यहोवारी तारीफ़ केरा,
ते ज़ैस पवित्र नंव्वे सेइं तैसेरी याद भोतीए,
तैसेरू शुक्र केरा।
किजोकि यहोवारो क्रोध त एक्की पलेरो भोते,
पन तैसेरी दया सारे उमरारी भोतीए।
शायद राती लेरां देनी पे,
पन झ़ेझ़ां आनन्द भोल्हो।
मीं त अपने आरामेरे वक्ते अपने आपे सेइं ज़ोवरू थियूं,
कि अवं कधे न टलेलो।
हे यहोवा, अपने दया सेइं तीं मेरू पहाड़ मज़बूत
ते कायम कियोरू थियूं;
ज़ैखन तीं अपनु तुत्तर फिरवं
तैखन अवं बड़ो डेरि जेव।
हे यहोवा, मीं तू पुकारो;
ते प्रभु कां छंदे केरतां ई बिनती कमाई, कि
ज़ैखन अवं कब्री मां च़लो गेइलो तैखन मेरे मौती सेइं
कुन फैइदो भोल्हो?
कुन मित्ती तेरू शुक्र केरि सकतीए?
कुन तै तेरे सच़्च़े भोनेरो प्रचार केरि सकतीए।
हे यहोवा, शुन, मीं पुड़ दया केर;
हे यहोवा मेरी मद्दत केर।
तीं मेरो मातम नाच़े मां बदलो;
तीं मेरे मातमेरां लिगड़ां खोलेइतां मेरे कमरी मां
आनन्देरो पटको बन्धोरोए।
ताके मेरो मन तेरू भजन ज़ोतो राए
ते कधी च़ुप न भोए।
हे मेरे परमेशर यहोवा,
अवं हमेशा तेरू शुक्र केरतो रेइलो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.