Bhadrawahi Bible
भजन संहिता 29
परमेशरेरी आवाज़
दाऊदेरू भजन
हे परमेशरेरे दूतव,1 यहोवारी,
हाँ यहोवारी बडीयाई केरा,
यहोवारी महिमा ते सामर्थ सहाराथ।
यहोवारे नंव्वेरी महिमा केरा;
पवित्रता सेइं सेज़तां यहोवा कां मथ्थो टेका।
यहोवारी आवाज़ समुन्दरे करां बा शुनोतीए;
महिमा बालो परमेशर गरज़ते,
यहोवा घने बिदलारी करां बा रहते।2
यहोवारे आवाज़ी मां बड़ी शक्तिए,
यहोवारी आवाज़ महिमा बालीए।
यहोवारी आवाज़ गैइड़न ट्लोड़चे;
यहोवारी आवाज़ लबानोनेरे गैइड़न भी ट्लोड़चे।
तै लबानोनेरे पहाड़न बछ़ड़ेरो ज़ेरो
ते सिर्योन जंगली दांतां केरो ज़ेरो उछ़ड़ाते।
यहोवारी आवाज़ अग्गरी लप च़ीरतीए।
यहोवारी आवाज़ जंगले हिलातीए,
यहोवा कादेशेरे जंगले भी हिलाते।
यहोवारे आवाज़ी सेइं हिरनी केरे पेटे मरां कच़्च़े बच्चे भी झ़ेड़ी गातन।
ते जंगले मां बुट्टां केरां पट्लां भी झ़ेड़ी गातन;
ते तैसेरे मन्दरे मां हर कोई
“महिमा-महिमा” ज़ोतो रहते।
हड़ैइयरे वक्ते यहोवा सैलाबे पुड़ बिशोरो थियो;
यहोवा हमेशारे लेई राज़ो भोइतां
तखते पुड़ बिशोरो रहते।
यहोवा अपने लोकन ताकत देलो;
यहोवा अपने लोकन सुखेरी बरकत देलो।
Source notes (2)
- Footnote दूतव मट्ठव
- Cross-reference अय्यू. 37:4-5.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.