Bhadrawahi Bible
भजन संहिता 136
परमेशरेरो प्यार हमेशारोए
यहोवारू शुक्र केरा,
किजोकि तै भलोए,
ते तैसेरो प्यार हमेशारोए।
ज़ै ईश्वरां केरो परमेशरे, तैसेरू शुक्र केरा,
तैसेरो प्यार हमेशारोए।
ज़ै प्रभुआं केरो प्रभुए, तैसेरू शुक्र केरा,
तैसेरो प्यार हमेशारोए।
तैसेरे बगैर होरो कोई बड़ां-बड़ां कम्मां न केरि बटे,
तैसेरो प्यार हमेशारोए।
तैने अपने अक्ली सेइं अम्बर बनावं,
तैसेरो प्यार हमेशारोए।
तैने धरती पैनी पुड़ फैलावरीए,
तैसेरो प्यार हमेशारोए।
तैनी बेड्डी-बेड्डी लौआं1 बनेई,
तैसेरो प्यार हमेशारोए।
दीसां पुड़ राज़ केरनेरे लेई दिहाड़ो बनेवरोए,
तैसेरो प्यार हमेशारोए।
राती पुड़ राज़ केरनेरे लेई चाँदनी बनाई,
तैसेरो प्यार हमेशारोए।
तैनी मिस्री लोकां केरे ज़ेठे नर बच्चे मारे,
तैसेरो प्यार हमेशारोए।
ते तैनी मिस्री लोकां केरे दरमियाने मरां इस्राएली लोक कढे,
तैसेरो प्यार हमेशारोए।
ताकतबर हथ ते पाखड़ अग्रोवं केरतां कढे,
तैसेरो प्यार हमेशारोए।
तैने लाल समुन्दर अलग कियो,
तैसेरो प्यार हमेशारोए।
ते इस्राएली लोक मझ़मेइं निसने दित्ते,
तैसेरो प्यार हमेशारोए।
परमेशरे फ़िरौन मिस्रेरो राज़ो ते तैसेरी सेना लाल समुन्दरे मां छ़डी,
तैसेरो प्यार हमेशारोए।
तै रेगिस्ताने मां अपने लोकन घिन्तां जेव,
तैसेरो प्यार हमेशारोए।
तैनी बड़े-बड़े राज़े मारे,
तैसेरो प्यार हमेशारोए।
तैनी महान राज़े मैरी छ़डे,
तैसेरो प्यार हमेशारोए;
एमोरी लोकां केरो राज़ो सीहोन,
तैसेरो प्यार हमेशारोए।
ते बाशानेरो राज़ो ओग मैरी छ़डो,
तैसेरो प्यार हमेशारोए।
ते तैन केरे मुल्खे मां हिस्सो भोनेरे लेई,
तैसेरो प्यार हमेशारोए।
अपने दास इस्राएली लोकां केरो हिस्सो भोनेरे लेई दित्तो,
तैसेरो प्यार हमेशारोए।
तैनी इश्शे बुरे हालातन मां इश्शी खबर घिन्नी,
तैसेरो प्यार हमेशारोए।
ते असां दुश्मन्न करां छुटा,
तैसेरो प्यार हमेशारोए।
ज़ै सैरी प्रैणन खाने जो खूराक देते,
तैसेरो प्यार हमेशारोए।
सुर्गेरे परमेशरेरू शुक्र केरा,
तैसेरो प्यार हमेशारोए।
Source notes (1)
- Footnote बेड्डी-बेड्डी लौआं दिहाड़ो, चाँदनी
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.