Bhadrawahi Bible
भजन संहिता 130
प्यार केरनेबालो परमेशर
सफरेरू गीत
हे यहोवा, मीं तू मुसीबतरे डुग्घे समुन्दरे मरां याद कियो!
हे प्रभु, मेरी शुन!
तेरे कन्न मेरे बिनतरे पासे ध्याने सेइं लगोरे रान!
हे यहोवा अगर तू इश्शे पापां केरो हिसाब केरस,
त हे प्रभु कौन खड़ो रेईं बटते?
पन तू माफ़ केरने बालोस,
ज़ैस सेइं तेरो डर मन्नो गाए।
अवं यहोवारे इंतज़ारे मां आईं, अवं दिले सेइं तैस बलगताईं,
ते मेरी उमीद तैसेरे वचने पुड़े।
पहरदार ज़ेत्रे झ़ेझ़ां चातन, हाँ,
पहरदार ज़ेत्रे झ़ेझ़ां चातन,
तैस करां भी जादे अवं अपने यहोवा अपने प्राणन करां भी जादे चाताईं।
हे इस्राएल, यहोवा पुड़ उमीद लेइतां रख!
किजोकि यहोवा प्यार केरनेबालोए
ते पूरो छुटकारो देनेबालोए।
यहोवा इस्राएले तैसेरे सैरी अधर्मेरे कम्मन करां छुटकारो देलो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.