Bhadrawahi Bible
भजन संहिता 122
यरूशलेमेरे शैन्तरे लेई प्राथना
दाऊदेरे सफरेरू गीत
ज़ैखन लोकेईं1 मीं सेइं ज़ोवं, “एज्जा, अस यहोवारे भवने जो च़लम,”
तैखन अवं बड़ो खुशी भोव।
हे यरूशलेम, तेरे फाटकन मां,
अस खड़े अहम!
हे यरूशलेम, तू एरे नगरेरो ज़ेरो बनोरोस,
ज़ैसेरां घरां एक्की होरि सेइं मिलोरन।
तैड़ी गोट्ले-गोट्लेरे लोक यहोवारू शुक्र केरनेरे लेई गातन;
ई इस्राएलेरे लेई गवाही आहे।
तैड़ी त न्यायेरे तखत,
दाऊदेरे खानदानेरे लेई रखोरेन।
यरूशलेमेरे सुखेरू वरदान मग्गा,
तेरे प्यार केरनेबाले खुशी सेइं रान!
हे यरूशलेम, तेरी शहरपनाहरे अन्तर शान्ति,
ते मेहलन मां सुख भोए।
अवं अपने पड़ोसन ते सैथी केरे लेई,
अवं ज़ोइलो तीं मां शान्ति भोए!
अपने परमेशर यहोवारे भवनेरे लेई,
अवं तेरी भलैइयरे लेई इच्छा केरेलो।
Source notes (1)
- Footnote लोकेईं मेरे दोस्तेईं
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.