Bhadrawahi Bible
भजन संहिता 121
परमेशर इश्शी रक्षा केरते
सफरेरू गीत
अवं एपनी एछ़्छ़ी पहाड़ां केरे पासे केरेलो।
मीं मद्दत कोट्ठां मैल्हेली?
मीं मद्दत यहोवारे तरफां मैलतीए,
ज़ै अम्बरे ते धरती बनानेबालोए।
यहोवा तेरे पव्वन टलने न देलो,
तेरो रक्षा केरनेबालो न झ़ुलेलो।
शुन, इस्राएलेरो रक्षा केरनेबालो,
न ऊंगेलो ते न झ़ुलेलो।
यहोवा तेरो रक्षा केरनेबालोए,
यहोवा तेरे देइने पासे तेरी आड़े।
न दीसां धुप्पी सेइं,
ते न राती चाँदनी तीं नुकसान पुज़ेई बटे।
यहोवा हर आफती करां तेरी रक्षा केरेलो;
तै तेरी जानी बिलकुल बच़ेइतां रखेलो।
यहोवा तेरे एजने-गाने मां
तेरी हिफाज़त हुना करां सदा तगर केरतो राए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.