Bhadrawahi Bible
भजन संहिता 118:24
Verse 24 is marked below, with the whole chapter around it. Read from the start
ज़ींतनेरे लेई शुक्र
यहोवारू शुक्र केरा, किजोकि तै भलोए;
ते तैसेरी दया हमेशारीए।
इस्राएली लोक ज़ोन,
कि तैसेरी करुणा हमेशारीए।
हारूनेरो घरानो ज़ोए,
कि तैसेरी करुणा हमेशारीए।
यहोवा परमेशरेरो डर मन्नेबाले ज़ोन,
कि तैसेरो प्यार हमेशारोए।
मुसीबती मां मीं यहोवा पुकारो
ते तैनी मेरी पुकार शुन्तां मेरे पव खुल्ले ठारी मां पुज़ाए।
यहोवा मेरे पासे आहे, अवं न डेरेलो।
इन्सान मेरू कुन बगैड़ी सकते?
यहोवा मेरे पासे मेरो मद्दत केरनो बालोए;
अवं अपने दुश्मन्न पुड़ नज़र केरतां खुश भोइलो।
यहोवारी शरण नेनी,
मैन्हु पुड़ भरोसो रखने करां रोड़ूए।
यहोवारी शरण नेनी,
प्रधान्न पुड़ भरोसो रखने करां बड़ू रोड़ूए।
सैरी कौमेईं अवं घेरोरोईं;
पन यहोवारे नंव्वे सेइं अवं पक्को तैन अवं नाश केरेलो।
तैनेईं अवं घेरी छ़डोरोईं, इस मां शक नईं, तैनेईं अवं घेरोरोईं;
पन यहोवारे नंव्वे सेइं अवं पक्को तैन नाश केरि छ़डेलो।
तैनेईं गणेरो ज़ेरो अवं च़ेवरे पासेईं घेरोरोईं,
पन कंटां केरे झ़ैल्लां केरि अग्गरे ज़ेरे लूशी हिश्शी जेवरेन;
यहोवारे नंव्वे सेइं अवं पक्को तैन्न नाश केरेलो।
दुश्मने मीं बड़ो धक्को त दित्तोरो थियो, कि अवं झ़ेड़ी गेईं,
पन यहोवा मेरी मद्दत की।
यहोवा मेरी ताकत ते भजनेरो विषय आहे,
तै मेरी मुक्ति भोवरोए।
धर्मी लोकां केरे डेरन मां जयजयकार ते मुक्तरी आवाज़ भोइ रेवरीए,
यहोवारे देइने हथ्थे सेइं बड्डां-बड्डां कम्मां भोतन।
यहोवारो देइनो हथ महान भोवरोए,
यहोवारे देइने हथ्थे सेइं बड्डां-बड्डां कम्मां भोतन!
अवं न मरेलो बल्के ज़ींतो रेइलो,
ते यहोवारां कम्मां केरू बियान केरेलो।
यहोवा मेरी बड़ी ताड़ना त कियोरीए,
पन तैनी अवं मौतरे हवाले नईं कियोरो।
धर्मेरू दार मेरे लेई खोल्ला,
ताके अवं तैस मां दाखल भोइतां यहोवारू शुक्र केरेलो।
एन्ने यहोवारू दारे,
इस सेइं धर्मी लोक दाखल भोन।
हे यहोवा, अवं तेरू शुक्र केरेलो,
किजोकि तीं मेरी प्राथना शुनोरीए,
ते मेरी ज़ींत भोइ जेवरीए।
ज़ै घोड़ मिस्त्रेईं रद्दी कियोरो थियो,
तैए कूनेरो खास घोड़ भोइ जेव।
इन त यहोवारे तरफां भोवरूए,
इन इश्शी नज़री मां बड़ू बड्डू आहे।
अज़ तै दिहाड़ीए ज़ै यहोवा बनेवरीए;
अस इस मां मघन ते खुश भोम।
हे यहोवा मेरी बिनती शुन्तां मीं बच़ा!
हे यहोवा, बिनती शुन, कामयाबी दे!
धने तै ज़ै यहोवारे नंव्वे सेइं एइते!
असेईं तुसन यहोवारे घरे मरां आशिर्वाद दित्तोरोए।
यहोवा परमेशरे, ते तैने असन लौ दित्तोरीए।
बलिदानेरे जानबरे वेदरे शिंगन सेइं बन्धा!
हे यहोवा, तू मेरो परमेशरस, अवं तेरू शुक्र केरेलो;
तू मेरो परमेशरस, अवं तेरी तारीफ़ केरेलो।
यहोवारू शुक्र केरा, किजोकि तै भलोए;
ते तैसेरी दया हमेशा बनोरी रहचे!
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.