Bhadrawahi Bible
भजन संहिता 119
परमेशरेरे कानूने पुड़ ध्यान
आलेफ
धन तैना मैन्हु आन ज़ैन केरो चाल चलन रोड़ोए,
ते ज़ैना यहोवारे कानूनेरे मुताबिक च़लतन।
धन आन तैना ज़ैना तैसेरे कानूने मनतन,
ते पूरे दिले सेइं तैस कां एइतन।
फिरी तैना बुराई न केरन,
तैना यहोवारे बत्तन पुड़ च़लतन।
हे यहोवा, तीं अपने उपदेश एल्हेरेलेइ दित्तोरेन,
कि अस तैन दिले सेइं मन्नम।
रोड़ू भोथू कि
तेरे हुक्म मन्नेरे लेई मेरो चाल चलन पक्को भोए!
तैखन अवं तेरे सब हुक्मां केरे पासे ध्यान केरेलो,
ते शरमिन्दा न भोल्हो।
ज़ैखन अवं तेरे धार्मिकतारे नियम शिखेलो,
तैखन तेरू शुक्र सच़्च़े मने सेइं केरेलो।
अवं तेरे नियमन मन्नेलो:
मीं पूरे तरीके सेइं न शार।
कानून मन्नो
बेथ
जुवान अपनि चाल केन्च़रे सेइं शुद्ध रख्खे?
तेरू वचन मन्ने सेइं।
अवं पूरे दिले सेइं तेरी तलाशी मां रेइलो;
मीं अपने हुक्मे करां टेप्लोने न दे।
मीं तेरू वचन अपने मने मां रखोरू,
कि तेरे खलाफ पाप न केरीं।
हे यहोवा तू धन आस;
मीं एपनी विधि शिखाल!
तेरे ज़ोवरे नियमां केरू बियान,
मीं अपने ज़बना सेइं कियोरूए।
अवं तेरे नियमां केरे बत्ती करां,
मन्ना कि हर किसमेरे धन दौलती सेइं खुश भोवरोईं।
अवं तेरे उपदेशन पुड़ ध्यान देइलो,
ते तेरी बत्तन तकतो रेइलो।
तेरे विधन सेइं मीं सुख मैल्हेलू;
ते तेरे वचने न बिसरेलो।
परमेशरेरे कानूने मां आनन्द
गिमेल
अपने दास मीं सेइं भलियाई केर,
ते तेरे वचने पुड़ च़लतो रेईं।
मेरी एछ़्छ़ी खोल्ल, ताके अवं तेरे कानूनेरी
हैरान केरनेरी सेच़्च़ी गल्लां हेरी।
दुनियाई मां अवं परदेशी आईं;
अपने हुक्म मीं करां छ़ुपेइतां न रख!
मेरो मन तेरे नियमां केरे इच्छां केरे वजाई सेइं
हर वक्त दुखी रहते।
तीं अभिमानी लोकन, ज़ैना लानती आन, झ़िड़क दित्ती,
तैना तेरे हुक्मन करां भेटकी जेवरेन।
मेरी बदनामी ते बेइज़्ज़ती दूर केर,
किजोकि मीं तेरे नियमन ट्लेइतां रखोरेन।
हाकिम भी बिशतां एप्पु मांमेइं मेरे खलाफ गल्लां केरते थिये,
पन अवं, तेरो दास विधन पुड़ ध्यान केरतो राव।
तेरे नियम सुखेरो ज़िरियोए
ते मीं सलाह देनेबालेन।
परमेशरेरो कानून मन्नेरो फैसलो
दाल्थ
अवं धूड़ी मां पेवरोईं;
मीं अपने वचनेरे मुताबिक ज़ींतो केर।
मीं अपनो चाल चलन तीं सेइं बियान कियोरोए, ते तीं मेरी गल मन्नोरीए;
तू मीं एपनी विधि शिखाल।
अपने उपदेशां केरि बत मीं समझ़ा,
ताके अवं तेरे हैरान केरनेबाले कम्मन पुड़ ध्यान केरेलो।
मेरी जान दुखेरे मारे पस्त भोइ जेवरीए;
मीं अपने वचनेरे मुताबिक सम्भाल।
मीं झूठेरी बत्ती करां दूर केर;
ते दया केरतां मीं अपनो कानून दे।
मीं सच़्च़ेरी बत च़ुनोरीए,
ते नियमां केरे पासे अवं मन लेइलो।
अवं तेरे नियमन मां मघन रेइलो,
हे यहोवा, मीं शरमिन्दा भोने न दे!
ज़ैखन तू मेरी समझ़ बधालो,
त अवं तेरे हुक्मां केरि बत्ती पुड़ दौड़ेलो,
समझ़रे लेई प्राथना।
हे
हे यहोवा मीं अपने विधि केरि बत हिरा;
तैखन अवं तैस आखरी तगर ट्लेइतां रखेलो।
मीं समझ़ दे, तैखन अवं तेरे कानूनेरे मुताबिक ज़िन्दगी गुज़ेरेलो,
ते पूरे दिले सेइं तैस पुड़ च़लेलो।
अपने हुक्मां केरि बत्ती मां मीं च़ला,
किजोकि अवं एस्से सेइं खुश आईं।
मेरो दिल लालच़ेरे पासे नईं,
अपने नियमेरे पासे बदल।
मेरी एछ़्छ़न बेकार चीज़न1 करां बदल,
तू एपनी बत्ती पुड़ मीं ज़िन्दगी दे।
तेरो वाधो ज़ै तेरे डर मन्नेबालां केरे लेई आहे,
तैस अपने दास, मेरे लेई भी पूरो केर।2
ज़ैस बदनामी करां अवं डरताईं, तैस दूर केर;
किजोकि तेरे नियम रोड़े आन।
हेर अवं तेरे उपदेशां केरि बड़ी इच्छा रखताईं;
अपने धार्मिकताई सेइं मीं ज़िन्दगी दे।
परमेशरेरे कानूने पुड़ भरोसो
वाव
हे यहोवा, तेरो प्यार ते तेरी दित्तोरी मुक्ति,
तेरे वाधेरे मुताबिक, मीं भी मैल्हे;
ताके अवं अपनि बदनामी केरनेबालन किछ जुवाब देइ सेखी,
किजोकि मेरो भरोसो, तेरे वचन पुड़े।
मीं अपने सच़्च़े वचन ज़ोने करां न रोक
किजोकि मेरी उमीद तेरे नियमन पुड़े।
तैखन अवं तेरे कानूने पुड़ लगातार,
हमेशा च़लतो रेइलो;
ते अवं खुल्ले ठैरी मां च़लेलो फिरेलो,
किजोकि मीं तेरे उपदेशां केरो खियाल रखोरोए।
ते अवं तेरे नियमेरी चर्चा राज़ां केरे सामने भी केरेलो,
ते शरमिन्दा न भोइलो।
किजोकि अवं तेरे हुक्मां केरे वजाई सेइं सुखी आईं,
ते अवं तैन सेइं प्यार केरताईं।
अवं तेरे हुक्मां केरे पासे ज़ैन सेइं अवं प्यार केरताईं, हथ खलैरेलो
ते तेरे विधन पुड़ ध्यान केरेलो।
परमेशरेरे कानूने मां उमीद
ज़ैन
तैस वाधे याद केर, ज़ै तीं अपने दासे सेइं कियोरोए,
किजोकि तीं मीं उमीद दित्तोरीए।
मेरे दुखे मां शान्ति तैस्से सेइं भोइ,
किजोकि तेरे वचनेरे ज़िरिये मीं ज़िन्दगी मैल्होरीए।
घमण्ड केरने बालेईं मेरो हद्दी करां जादे मज़ाक बनेवरोए,
फिरी भी अवं तेरे कानूने करां दूर न भोव।
हे यहोवा, मीं तेरे पुराने हुक्म याद केरतां
शान्ति मैल्ही।
ज़ैन दुष्टेईं तेरो कानून शारोरोए,
तैन केरे वजाई सेइं अवं क्रोधे सेइं फुकोताईं।
ज़ैड़ी अवं परदेशी भोइतां रहताईं, तैड़ी तेरी विधि
मेरे गीत ज़ोनेरो विषय बेनोरिन।
हे यहोवा, राती मीं तेरू नवं याद कियोरूए,
ते तेरे कानूने पुड़ च़लताईं।
इन अवं एल्हेरेलेइ केरतो एवरोईं,
कि मीं तेरे उपदेश ट्लेइतां रखोरे थिये।
कानूनेरे लेई भक्ति
हेथ
यहोवा मेरो हिस्सोए;
मीं तेरे वचना केरे मुताबिक च़लनेरो फैसलो कियोरोए।
मीं पूरे मने सेइं बिनती की;
एल्हेरेलेइ अपने वाधेरे मुताबिक मीं पुड़ दया केर।
मीं अपने चाल चलनेरे बारे मां सोचू,
ते तेरे नियमेरी बत ट्लाई।
मीं तेरे हुक्म मन्ने मां च़िर न लाऊं, जल्दी की।
अवं दुष्टां केरि रेस्सन सेइं बेन्धोरोईं,
फिरी भी मीं तेरो कानून न बिसरो।
तेरे धर्मी नियमां केरे वजाई सेइं
अवं अध्धी राती तेरू शुक्र केरनेरे लेई उठेलो।
ज़ेत्रे तेरो डर मनतन ते तेरे उपदेशन पुड़ च़लतन,
तैन केरो अवं साथी आईं।
हे यहोवा, तेरी दया धेरती पुड़ भेरतांए:
तू मीं अपने विधि शिखाल!
कानूनेरी खासयत
टेथ
हे यहोवा, तीं अपने वचनेरे मुताबिक
अपने सेवक, मीं सेइं भलियाई कियोरीए।
मीं भले ज़मीरेरी शक्ति ते समझ़ दे,
किजोकि मीं तेरे हुक्मन पुड़ विश्वास कियोरोए।
मुसीबत झ़ैलने करां पेइलो, अवं भटकोरो थियो;
पन हुनी अवं तेरे वचन्न मनताईं।
हे यहोवा, तू भलो आस, ते भलियाई केरतस भी;
मीं अपने विधि शिखाल।
अभिमान केरने बालेईं मेरे खलाफ झूठी गल्लां बनेई,
पन अवं तेरे उपदेशन पूरे मने सेइं ट्लेइतां रखेलो।
तैन झूठां केरो मन मोट्टो भोइ जेवरोए,
पन अवं तेरे कानूनेरे वजाई सेइं सुखी आईं।
मेरे लेई रोड़ू भोवं, कि मीं ज़ै दुख भोव,
ज़ैस सेइं अवं तेरी विधि शिख्खी सेखी।
तेरो दित्तोरो कानून मेरे लेई
हज़ारेईं रुपेइयन ते मोहरन करां भी जादे।
कानूनेरो न्याय
योध
तेरे हथ्थन सेइं अवं बनाव जेवरोईं
मीं समझ़ दे कि अवं तेरे हुक्मन शिखी।
तीं करां डरने बाले मीं लेइतां खुश भोल्हे,
किजोकि मीं तेरे वचने पुड़ उमीद रख्खोरीए।
हे यहोवा, मीं ई गल समझ़ी कि तेरे नियम धर्मी आन,
ते तीं अपने सच़्च़ेरे मुताबिक मीं दुख दित्तोरोए,
तू अपने प्यारे सेइं मीं शान्ति दे,
किजोकि तीं अपने दासे एरहो वाधो दित्तोरोए।
तेरी दया मीं पुड़ भोए, तैखन अवं ज़ींतो रेइलो;
किजोकि अवं तेरे कानूने सेइं सुखी आईं।
अहंकार केरनेबाले शरमिन्दा किये गान, किजोकि तैनेईं अवं झूठेरे ज़िरिये बिछ़ोड़ो;
पन अवं तेरे उपदेशन पुड़ ध्यान केरेलो।
ज़ैना तेरो डर मनतन, तैना मेरे पासे फिरन,
तैखन तैना तेरे नियम शिखेले।
मेरो मन तेरी विधि मन्नेरे लेई सिद्ध भोए,
एरू न भोए कि मीं शरमिन्दा भोनू पे।
छुटकारेरे लेई प्राथना
क़ाफ़
मेरे प्राण तेरे मुक्तरे लेई बेचैन आन;
पन मीं तेरे वचने पुड़ उमीद रहतीए।
मेरी एछ़्छ़ी केरि लौ तेरे वाधे पूरे भोने बलगते-बलगते घेटी जेई;
ते अवं ज़ोताईं कि तू मीं कैखन शान्ति देलो?
किजोकि अवं तूँए मां मसकरो ज़ेरो भोइ जेवरोईं,
फिरी भी तेरी विधि न बिसरी।
तेरे दासेरे केत्रे दिहाड़े राहोरेन?
ज़ैना मीं पत्ती पेवरेन तू तैन किताली सज़ाह देलो।
अहंकार केरनेबाले ज़ैना तेरे कानूने पुड़ न च़लन,
ज़ैनेईं मेरे लेई गत्तां घड़ोरन।
तेरे सारे हुक्म भरोसेरे काबलन;
तैना लोक झूठ ज़ोते मीं पत्ती पेवरेन;
तू मेरी मद्दत केर!
तैना मीं इस ज़मीनी पुड़ेरां मुकानेरे नेड़े थिये,
पन मीं तेरो उपदेश नईं शारोरो।
अपने प्यारेरे मुताबिक मीं ज़ींतो केर,
तैखन अवं तेरे दित्तोरे नियम मन्नेलो।
कानूने मां विश्वास
लामेध
हे यहोवा, तेरू वचन,
अम्बरे मां सदा तगर कायमे।
तेरी सच़्च़ाई पीढ़ी-पीढ़ी तगर कायम रहचे,
तीं धरती बनाई, एल्हेरेलेइ तै कायम रहतीए।
तैना अज़्ज़ेरे दिहैड़ी तगर तेरे नियमां केरे मुताबिक टिकोरेन;
किजोकि सारी सृष्टि तेरे अधीने।
अगर तेरे कानूने सेइं अवं खुश न भोथो,
त अवं दुखेरे वक्ते नाश भोथो।
अवं तेरे उपदेश कधी न बिसरेलो;
किजोकि तैन केरे ज़िरिये तीं अवं ज़ींतो कियोरोईं।
अवं तेरो आईं, तू मीं मुक्ति दे;
किजोकि अवं तेरे उपदेशां केरि खबर रखताईं।
दुष्टी मेरी जान नाश केरनेरे लेई ताकी मां बिशोरेन,
पन मीं तेरे नियमन पुड़ ध्यान लेइतां रखोरूए।
मीं लाहेरू आहे कि हर एक्की भरपूरारी भी हद भोतीए,
पन तेरे हुक्मां केरि कोई हद नईं।
कानूनेरे लेई प्यार
मीम
आहा! अवं तेरे कानूने मां केत्रो प्यार रखताईं!
पूरे दिहैड़ी मेरू ध्यान तैस्से मां लगोरू रहते।
तू अपने हुक्मन सेइं मीं अपने दुश्मन्न करां जादे अक्लमन्द केरतस,
किजोकि तेरे हुक्म सदा मेरे मने मां रहतन।
मीं अपने सारे उस्तादन करां जादे समझ़ मैल्होरीए,
किजोकि मेरू ध्यान तेरे नियमन पुड़ लगोरूए।
अवं बुज़ुर्गन करां भी जादे समझ़दार आईं,
किजोकि अवं तेरे उपदेशन ट्लेइतां रखताईं।
मीं अपने पव हर एक्की बुरे बत्ती करां रोकतां रखोरेन,
ज़ैस सेइं अवं तेरे वचनेरे मुताबिक च़ेलि।
अवं तेरे नियमन करां दूर नईं भोवरो,
किजोकि तींए मीं शिक्षा दित्तोरीए।
तेरे वचन मीं केत्रे मिट्ठे लगतन,
तैना मेरे ऐशी मां मैछ़ी करां मिट्ठे आन!
तेरे उपदेशां केरे वजाई सेइं अवं समझ़दार भोइ गाताईं,
एल्हेरेलेइ अवं सब बुरी बत्तन सेइं बैर रखताईं।
कानूनेरी लौ
नून
तेरू वचन मेरे पव्वां केरे लेई दीयो,
ते मेरी बत्तरे लेई लौए।
मीं कसम कियोरीए, ते थापेरू आहे।
कि अवं तेरे धर्मी नियमां केरे मुताबिक च़लेलो।
अवं बड़ो दुखे मां पेवरोईं;
हे यहोवा, अपने वाधेरे मुताबिक मीं ज़ींतो केर।
हे यहोवा, मेरे वचन्न अपने मेर्ज़रे मुताबिक कबूल केर,
ते अपने नियम मीं शिखाल।
मेरे प्राण लगातार मेरे तेई पुड़ रहतन,
फिरी भी मीं तेरो कानून न बिसरो।
दुष्टेईं मेरे लेई फंदो लेइतां रखोरोए,
पन अवं तेरे उपदेशां केरे बत्ती करां नईं टेपलोरो।
तेरे नियम मेरे हमेशारी जाईदात बेनि जेवरेन,
किजोकि तैना मेरे दिलेरे खुशरी वजाह आन।
मीं अपनो मन इस गल्ली पुड़ लेवरोए,
कि आखरी तगर तेरे विधन पुड़ सदा च़लतो रेईं।
कानूने मां हिफाज़त
सामेख
अवं दुमन्न सेइं नफरत केरताईं,
पन तेरे कानूने सेइं प्यार केरताईं।
तू मेरे छ़पनेरी ठार ते ढाल आस;
मेरी उमीद तेरे वचन्न पुड़े।
हे कुकर्म केरनेबालव, मीं करां दूर भोथ,
कि अवं अपने परमेशरेरे हुक्म ट्लेइतां रेखी!
हे यहोवा, अपने वचनेरे मुताबिक मीं सम्भाल, कि अवं ज़ींतो रेईं,
मेरी उमीदी न ट्लोड़!
मीं ट्लेइतां रख, तैखन अवं बच़ोरो रेइलो,
ते लगातार तेरी विधि केरे पासे मन लेइतां रेखेलो!
ज़ेत्रे तेरे विधि केरे बत्ती करां भेटकी गातन,
तैन सेभन तू घटिया ज़ानतस,
किजोकि तैन केरि च़लाकी झूठे।
तीं धेरतरे सब दुष्ट मैलेरे ज़ेरे दूर कियोरेन;
इस वजाई सेइं अवं तेरे नियमन सेइं प्यार रखताईं।
तेरे डरे सेइं मेरी जान थेरकी गाचे,
ते अवं तेरे नियमन करां डरताईं।
परमेशरेरे कानूने पुड़ च़लनू
एन
मीं त न्याय ते धर्मेरू कम कियोरूए,
तू मीं ज़ुलम केरनेबालां केरे हथ्थे मां न छ़ड।
अपने दासेरे भलियाइरे लेई ज़िमेवार बन,
ताके अभिमानी लोक मीं पुड़ ज़ुलम न केरि बटन।
मेरी एछ़्छ़ी तीं करां मुक्ति हासिल केरने,
ते धर्मेरे वचनेरे मुताबिक पूरे भोने बलगते-बलगते तैन केरि लौ घट भोवरी।
अपने दास, मीं सेइं अपने प्यारे मुताबिक बर्ताव केर,
ते एपनी विधि मीं शिखाल।
अवं तेरो दास आईं, तू मीं समझ़ दे,
कि अवं तेरे नियमन सेमझ़ी।
हुनी तै वक्त एवरोए, कि यहोवा कम केरेलो,
किजोकि लोकेईं तेरो कानून ट्लोड़ोरोए।
एल्हेरेलेइ अवं तेरे हुक्मन सेइं सोन्ने बल्के खालिस सोन्ने करां भी जादे प्यार केरताईं।
एल्हेरेलेइ अवं तेरे सब उपदेशां केरे सब विषयन ठीक ज़ानताईं;
ते सब बुरी बत्तन सेइं बैर रखताईं।
कानूने पुड़ च़लनेरी इच्छा
पे
तेरे कानून अद्भुत आन,
एल्हेरेलेइ मेरो दिल तैन मन्ते।
तेरी गल्लां खुलने सेइं लौ भोचे,
तैन सेइं सादे लोकन समझ़ एइचे।
अवं आशी खोलतां हंफने लगो,
किजोकि अवं हुक्मां केरो ट्लिशोरो थियो।
तेरो प्यार ज़ेन्च़रे अपने नंव्वेरे प्यार रखनेबाले सेइं आहे,
तेन्च़रे मेरे पासे भी फिरतां मीं पुड़ दया केर।
अपने वचने सेइं मेरे पव अपने बत्ती पुड़ पक्के केर,
ते कोन्ची अनर्थ गल्ली मीं पुड़ हुकूमत केरने न दे।
अंधेर केरनेबाले मैन्हन करां मीं छुटा,
तैखन अवं तेरे उपदेशन मन्नेलो।
अपने दास, मीं पुड़ अपने तुत्तरेरी लौ चमका,
ते मीं एपनी विधि शिखाल।3
मेरी एछ़्छ़न मरां बड़ां ऐंखरू निसतन,
किजोकि लोक तेरे कानूने न मन्न।
कानूनेरो न्याय
सांदे
हे यहोवा तू धर्मी आस,
ते तेरे नियम सिद्ध आन।
तीं अपने नियम
धर्म ते पूरी सच़्च़ाई सेइं ज़ोवरेन।
अवं तेरी धुनी मां भस्म भोइ राहोरोइं,
किजोकि मेरे सतानेबालेईं तेरे वचन बिसरोरेन।
तेरू वचन रोड़ेच़ारे तेवरूए,
एल्हेरेलेइ तेरो दास, अवं तैस मां प्यार रखताईं।
अवं निकड़ो ते घटिया आईं,
फिरी भी अवं तेरे उपदेशन न बिसरी।
तेरी धार्मिकता हमेशारीए,
ते तेरो कानून सच़्च़ोए।
मुसीबत ते परेशानी मीं पुड़ बड़ी एवरीए,
पन अवं तेरे हुक्मन सेइं सुखी आईं।
तेरे नियम धर्मी आन;
तू मीं समझ़ दे, कि अवं ज़ींतो रेईं।
छुटकारेरे लेई प्राथना
क़ाफ़
मीं पूरे दिले सेइं प्राथना कियोरीए,
“हे यहोवा मेरी शुन!
अवं तेरी विधि ट्लेइतां रखेलो।
मीं तीं कां प्राथना कियोरीए, तू मीं मुक्ति दे।”
ते अवं तेरे नियमन मन्तो रेइलो।
मीं लौ भोने करां पेइले बिनती की:
मेरी उमीद तेरे वचन्न पुड़ थी।
मेरी एछ़्छ़ी हर पहरे करां पेइली खुल्ली गैली,
कि अवं तेरे वचने पुड़ ध्यान केरि।
एपनी दयारे मुताबिक मेरी आवाज़ शुन;
हे यहोवा, अपने नियमां केरे रीतरे मुताबिक मीं ज़िन्दगी दे।
ज़ैना बुरैई अरे धुनी मां आन, तैना नेड़े एवरेन;
तैना तेरे कानूने करां दूर आन।
हे यहोवा तू नेड़ेस,
ते तेरे सब हुक्म सच़्च़ेन।
बड़े च़िरे करां अवं तेरे कानूने ज़ानताईं,
कि तीं तैन केरि बुनीयाद हमेशारे लेई छ़डोरीए।
मद्दतरी लेई बिनती
रेश
मेरे दुख हेरतां मीं छुटा,
किजोकि मीं तेरो कानून न बिसरो।
मेरो मुकदमो लड़, ते मीं छुटा;
अपने वाधेरे मुताबिक ज़ींते केर।
दुष्टन मुक्ति मैल्हनी बड़ी मुश्किले,
किजोकि तैना तेरे हुक्मेरी तलाशी मां न भोन।
हे यहोवा, तेरी दया त बड़ीए;
एल्हेरेलेइ अपने नियमां केरे मुताबिक मीं ज़ींते केर।
मेरो पीछो केरनेबाले ते मेरे दुश्मना केरि तैधात बड़ीए,
पन अवं तेरे कानूने करां न हटो।
अवं धोखो देनेबाले लेहितां नफरत केरताईं;
किजोकि तैना तेरे वचनेरे मुताबिक ज़िन्दगी न गुज़ारन।
हेर, अवं तेरे उपदेशन सेइं केत्रो प्यार केरताईं!
हे यहोवा, अपने प्यारेरे मुताबिक मीं ज़ींतो केर!
तेरे सारे वचन सच़्च़े आन;
ते तेरो अक-अक धर्मी नियम हमेशा तगर अटल आहे।
कानूनेरे लेई समर्पण
शीन
हाकिम बेकारे मां मेरो पीछो केरतन,
पन मेरो दिल तेरे वचना केरो डर मन्ते।
ज़ेन्च़रे कोई लूट4 केरतां खुशी भोते,
मीं तेरे वचनेरी खुशी तैस्से तरीके भोचे।
अवं झूठे सेइं नफरत त केरताईं,
पन तेरे कानूने सेइं प्यार केरताईं।
तेरे धर्मी नियमां केरे वजाई सेइं रोज़
सत बार तेरी तारीफ़ केरताईं।
तेरे कानूनेरे लेई प्यार रखनेबालन बड़ी शान्ति भोतीए;
ते तैन्न कोई ठोकर न लग्गे।
हे यहोवा, अवं तीं करां मुक्ति मैल्हनेरी उमीद रखताईं;
ते तेरे हुक्मन पुड़ च़लतो एवरोईं।
अवं तेरे कानूने पूरे दिले सेइं मनताईं,
ते तैन सेइं बड़ो प्यार रखतो एवरोईं।
अवं तेरे उपदेशन ते कानूने मनतो एवरोईं,
किजोकि मेरी सारी चाल तेरे सामने बांदीए।
परमेशरे करां मद्दत मैल्हनेरे लेई इच्छा
ताव
हे यहोवा, मेरी बिनती तीं तगर पुज़्ज़े,
मीं अपने वचनेरे मुताबिक समझ़ दे।
मेरी बिनती तीं तगर पुज़्ज़े,
अपने वचनेरे मुताबिक मीं छुटा।
मेरी ज़बानी सेइं हमेशा तेरी तारीफ़ भोती राए,
किजोकि तू मीं अपने हुक्म शिखालतस।
अवं तेरे वचनेरू गीत ज़ोइलो,
किजोकि तेरे सब हुक्म धर्मी आन।
तेरे हथ मेरी मद्दत केरनेरे लेई तियार रहतन,
किजोकि मीं तेरे उपदेश कबूल कियोरेन।
हे यहोवा, अवं तीं करां मुक्ति हासिल केरनेरी उमीद रखताईं,
ते अवं तेरे कानूने सेइं खुश आईं।
मीं ज़ींते रख, ताके तेरी तारीफ़ केरि सेखी,
तेरे नियमन सेइं मेरी मद्दत भोए।
अवं हेरोरि भैड्डरो ज़ेरो टेपलोइ जेव;
तू अपने दास, मीं तोप,
किजोकि अवं तेरे हुक्मन न बिसरीं।
Source notes (4)
- Footnote बेकार चीज़न झूठे ईश्वर
- Cross-reference रोम. 1:16.
- Cross-reference भज. 145:17.
- Footnote लूट जंग ज़ींतां कब्ज़ो कियोरी चीज़ां
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.