Bhadrawahi Bible
कहावतां 26
ज़ेरू धुप्परे दिहाड़े मां हिंवेरू, या कटनेरे वक्ते झ़ड़ी भोनी,
तेरही बेवकूफेरी इज़्ज़त भी ठीक न भोए।
ज़ेन्च़रे च़ुड़ोली घुमते-घुमते ते सूपाबेनी उडरते-उडरते न बिश्शे,
तेन्च़रे बेफैइदी लानत न पे।
घोड़ेरे लेई चाबुक, गधेरे लेई लगाम,
ते बेवकूफां केरि पिठरे लेई सोटीए।
बेवकूफे तैसेरी बेवकूफरे मुताबिक जुवाब नईं देनो एरू न भोए कि तू भी तैसेरो ज़ेरो ठहरस।
बेवकूफे तैसेरी बेवकूफरे मुताबिक जुवाब देनो,
एरू न भोए कि तै अपनि नज़री मां अक्लमन्द भोए।
ज़ै बेवकूफेरे हथ्थे सन्देश भेज़ते,
तै मन्ना अपने पव्वे पुड़ मैक्कु सेइं बाते ते बिष पीते।
ज़ेन्च़रे लेंगड़ेरे पव थरकतन,
तेन्च़रे बेवकूफां केरे ऐशी मां कहावतां भोतिन।
ज़ेन्च़रे घोड़ेरू गुलेली मां बन्धनू बेफैइदू आहे,
तेन्च़रे बेवकूफे आदर देनी भोतीए।
ज़ेन्च़रे मसत भोवरेरे हथ्थे मां कंटो डुबते,
तेन्च़रे बेवकूफां केरि ज़ोवरी कहावतां भी दुख देने बैली भोतिन।
ज़ेरो कोई तीरन्दाज़े बगैर वजां सेब्भन मारतो भोए,
तेन्च़रे बेवकूफन या बत्तां च़लनेबालां केरो मज़दूरी मां लानेबालो भी भोते।
ज़ेन्च़रे कुतर अपनु उतारोरू च़टते,
तेन्च़रे बेवकूफ अपनि बेवकूफी दुबारां केरते।
अगर तू एरहो मैन्हु हेरस ज़ै अपनि नज़री मां अक्लमन्द बनतो भोए,
त तैस करां जादे उमीद बेवकूफे करां आहे।
आलसी ज़ोते, “बत्ती मां शेरे,
चौके मां शेरे!”
ज़ेन्च़रे दार अपनि च़ुली पुड़ फिरते,
तेन्च़रे आलसी अपनि खट्टी पुड़ फेर देते।
आलसी अपनो हथ थैली मां त छ़डते,
पन आलसेरे वजाई सेइं ड्लाछ़ड़ो ऐशी तगर न ने।
आलसी एप्पु जो ठीक जुवाब देनेबाले
सत मैन्हन मरां भी जादे अक्लमन्द समझ़ते।
ज़ै बत्तां च़लते होरि केरे लड़ैई मां बिघन छ़डते,
तै तैसेरो ज़ेरोए, ज़ै पागल कुतरे कन्नेरां ट्लाते।
ज़ेरो अक पागल ज़ै ज़ेरे बाले तीर मारते,
तेरहो तै भी भोते ज़ै अपने पड़ोसी धोखो देइतां ज़ोते,
“अवं त मज़ाक केरि राहोरो थियो।”
ज़ेन्च़रे कैड़ु न भोने सेइं अग हिशतीए,
तेन्च़रे ज़ैड़ी चोगली केरनेबालो नईं, तैड़ी लड़ाई मिटी गातीए।
ज़ेरो मूरन मां अंगारोवं ते अग्गी मां कैड़ु भोतन,
तेन्च़रे लड़ाई बधानेरे लेई लड़ाई केरनेबालो भोते।
चोगली केरनेबालेरी गल्लां,
सुवैदली रोट्टी केरि ज़ेरि अन्तर एइतिन।
ज़ेरो कोई चैंदरू पानी च़ाड़ोरू मित्तरू भांड भोए,
तेन्च़रे बुरे मने बालेरे प्यारे सेइं भरोरी गल्लां भोतिन।
ज़ै बैरी गल्ली सेइं त अपने आपे सादो बनाते,
पन एप्पु मां धोखो रखते,
तैसेरी मिट्ठी-मिट्ठी गल्लन पुड़ विश्वास नईं केरनो,
किजोकि तैसेरे मने मां सत भिट्टी चीज़ां रैतिन;
चाहे तैसेरू बैर धोखेरे वजाई सेइं छ़ेप्पी गाए,
फिर भी तैसेरी बुराई सेभी केरे सामने बांदी भोइ गाली।
ज़ै खड्डो घड़े, तैए तैस्से मां झ़ड़ेलो, ते ज़ै घोड़ लटकाए,
तै उलटेइतां तैस्से पुड़ एज्जेलो।
ज़ैनी कोई झूठी गल्लन सेइं ज़खमी कियोरो भोए तैए तैस सेइं बैर रखते,
ते मिट्ठी-मिट्ठी गल ज़ोने बालो नाशेरी वजा भोते।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.