Bhadrawahi Bible
कहावतां 18:10
Verse 10 is marked below, with the whole chapter around it. Read from the start
ज़ै होरन करां अलग भोइ गाते, तै अपनि इच्छा पूरी केरनेरे लेई एरू केरते,
ते हर किसमेरे रोड़ी अक्ली सेइं बैर केरते।
बेवकूफेरो मन समझ़रे गल्लन मां न लग्गे,
तै सिर्फ अपने मनेरी गल बांदी केरनी चाते।
ज़ैड़ी बुराई एइतीए, तैड़ी बेइज़्ज़ती भी एइती;
ते बेइज़्ज़ती सेइं साथी निन्दा एइतीए।
मैन्हेरे ज़बानरां निस्सने बैली गल्लां डुग्घे पैनेरी ज़ेरि भोतिन;
अक्लरो नाग बगते गड्डरो ज़ेरो भोते।
दुष्टेरे पासे भोनू,
ते धेर्मेरू हक़ मारनू, रोड़ू नईं।
गल बधाने सेइं बेवकूफ मुकदमो खड़ो केरते,
ते अपने आपे मार खानेरे काबल हिराते।
बेवकूफेरो नाश तैसेरी गल्लन सेइं भोते,
ते तैसेरी गल्लां तैसेरे प्राणेरे लेई फंदे भोतिन।
चोगली केरनेबालेरी गल्लां सुवैदली रोट्टरी ज़ेरि लेगतिन;
तैना पेटे मां पेच़ी गैतिन।
ज़ै कम्मे मां आलस केरते,
तै बिगाड़ने बालेरो ढ्ला ठहरते।
यहोवारू नवं मज़बूत क़िलोए;
धर्मी तैस मां नेशतां सब हादसन करां बच़ते।
अमीरेरी दौलत तैसेरी नज़री मां शेक्ति बालू नगरे,
ते तैसेरे खियाल उच्ची शहरपनाहरे ज़ेरे आन।
नाश भोने करां पेइलू मैन्हेरे मने मां घमण्ड,
ते आदर मैल्हने करां पेइले नम्रता भोतीए।
ज़ै गल शुन्ने बगैर जुवाब देते, तै बेवकूफ ठहरते,
ते तै बेइज़्ज़त भोते।
रोगे मां मैन्हु अपनि आत्माई सेइं सम्भलते;
पन ज़ैखन आत्मा हारतीए तैखन इस कौन झ़ेल्ली सकते?
समझ़ी बालो मन ज्ञान हासिल केरते;
ते अक्लमन्द ज्ञानेरी गल्लरे तोपी मां रहतन।
भेंट मैन्हेरे लेई बत खोलतीए,
ते तैस मैन्हु महान लोकां केरे सामने पुज़ातीए।
मुकदमे मां ज़ै पेइलो ज़ोते, तैए सच़्च़ो लगते,
पन बादे मां होरि पासे बालो1 एइतां तैस परखते।
चिट्ठी छ़डने सेइं लड़ैई बन्द भोतिन,
ते ताकतबरां केरे लड़ैई केरो अन्त भोते।
नराज़ भोवरो ढ्ला मनानो मज़बूत नगरेरे नेने करां मुश्किल भोते,
ते लड़ाई राज़ भवनेरे बेंडां केरि ज़ेरिए।
मैन्हेरू पेट ज़बानेरे फले सेइं भेरोते;
ते ज़ोने सेइं ज़ैन किछ हासिल भोते तैस सेइं तै रज़्ज़ोरो भोते।
ज़िभरे कैबू मां मौत ते ज़िन्दगी दूईये भोतिन,
ते ज़ै तैसेरो इस्तेमाल केरनो ज़ानते तै तैसेरो फल भोगेलो।
ज़ैनी कौन्श ड्लाई, तैस रोड़ी चीज़ मैल्ही,
ते यहोवारो अनुग्रह तैस पुड़ भोवरोए।
गरीब मद्दतरे लेई छंदे केरतां ज़ोते,
पन अमीर सखत जुवाब देते।
दोस्त बधाने सेइं त नाश भोते,
पन एरहो दोस्ते, ज़ै ढ्लाए करां भी जादे मिलोरो रहते।
Source notes (1)
- Footnote होरि पासे बालो तैस पुड़ दोष लानेबालो
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.