Bhadrawahi Bible
कहावतां 11
धोखेरी ट्लेकड़ी सेइं यहोवा नफरत केरते,
पन तै सही नापी सेइं खुश भोते।
ज़ैखन घमण्ड भोते, तैखन तुहीन भी भोतीए,
पन हलीम लोकन मां अक्ल भोतीए।
सिद्धे लोक अपने सच़्च़ाई सेइं अगवाई हासिल केरतन,
पन धोखेबाज़ अपने कुरेबे सेइं नाश भोतन।
परमेशरेरे सरकरे दिहाड़े दौलती सेइं त किछ फैइदो न भोए,
पन धार्मिकता मौती करां भी बच़ातीए।
रोड़े मैन्हेरी बत धार्मिकतारे वजाई सेइं सिद्धी भोतीए,
पन दुष्ट अपनि दुष्टतारे वजाई सेइं बिछ़ड़ते।
धर्मी लोकां केरो बच़ाव तैन केरे धार्मिकतारे वजाई सेइं भोते,
पन धोखेबाज़ लोक अपने दुष्टे मां फसतन।
ज़ैखन दुष्टी मैन्हु मरते, तैखन तैसेरी उमीद ट्लुटी गाचे,
ते अधर्मी मैन्हेरी उमीद बेकार भोतीए।
धर्मी मुसीबती करां छुटी गाते,
पन दुष्ट तैस्से मुसीबती मां च़लतो गाते।
भक्ति न केरनेबालो मैन्हु अपने पड़ोसी अपने ऐशेरे गल्ली सेइं बिगाड़ते,
पन धर्मी लोक ज्ञानेरे ज़िरिये बच़तन।
ज़ैखन धर्मी लोकां केरू भलू भोते, तैखन नगरेरे लोक खुश भोतन,
पन ज़ैखन दुष्ट नाश भोते, तैखन जयजयकार भोते।
सच़्च़े लोकां केरे आशिर्वादे सेइं नगरेरी तरक्की भोतीए,
पन दुष्टां केरे ऐशेरी गल्लन सेइं तै बिछ़ोड़ो गाते।
ज़ै अपने पड़ोसी घटिया समझ़ते, तै बेअक्ले,
पन समझ़दार मड़द च़ुपच़ाप रहते।
ज़ै चोगली केरतो फिरते तै भेद बांदो केरते,
पन भरोसेरे काबल मैन्हु गल्ली छ़ुपेइतां रखते।
ज़ैड़ी अक्लरी सलाह नईं, तैड़ी आवाम मुसीबती मां पेतीए;
पन बड़े सलहकारां केरे वजाई सेइं बच़ाव1 भोते।
ज़ै प्रदेशेरो ज़िमेवार भोते, तै बड़ो दुख झ़ैलते,
पन ज़ै ज़मानत नेने सेइं नफरत केरते, तै निडर रहते।
दया केरनेबाली कौन्श आदर न गुवाए,
ते बेरहम लोक दौलती न गुवान।
दया केरनेबालो मैन्हु अपनु भलू केरते, पन ज़ै सखते,
तै अपने जिसमे दुख देते।
दुष्ट मैन्हु कमाई कमाते,
पन ज़ै धार्मिकतारू बीज़ बेते, तैस पक्को फल मैलते।
ज़ै धार्मिकताई मां मज़बूत रहते, तै ज़िन्दगी हासिल केरते,
पन ज़ै बुरैइयरो पीछो केरते, तै मेरि गालो।
ज़ैना मनेरे च़लाकन, तैन सेइं यहोवा नफरत केरते,
पन तै रोड़ी चाली बालन सेइं खुश रहते।
इस मां कोई शक नईं, बुरो मैन्हु बेकसूर न ठहरेलो,
पन धेर्मेरू खानदान बच़ाव गालू।
ज़ै खूबसूरत कौन्श ज़मीर न रख्खे,
तै नक्के मां सोन्नेरी नथ लेइतां सूरेरी ज़ेरिए।
धर्मी लोकां केरि खुवैइश त सिर्फ भलियाई भोतीए;
पन दुष्टां केरि उमीद परमेशरेरी सरके भोते।
एरे आन, ज़ैना दिल खोलतां देतन, फिरी भी तैन केरि तरक्की भोतीए;
ते एरे भी आन ज़ैना जाइज़े करां घट देतन, फिरी भी तैन घाटो भोते।
खुल्ले दिले सेइं देनेबालो मैन्हु सहतमन्द भोइ गाते,
ते ज़ै होरन पानी पियाते तैस भी पियावं गालू।
ज़ै जादे कीमत मैल्हनेरे लेई अपनु अन जमा केरते, तैस लोक लानत देतन,
पन ज़ै तैस बेच़ते, तैस आशिर्वाद दित्तो गाते।
ज़ै कोशिश केरतां भलियाई केरते तै होरि केरि खुशी तोपते,
पन ज़ै होरि केरि बुरैइारे तोपी मां भोते, तैस्से पुड़ बुराई एइतीए।
ज़ै अपने दौलती पुड़ भरोसो रखते तै शुकोरे पट्लां केरो ज़ेरो झ़ड़ते,
पन धर्मी लोक नव्वें पट्लां केरे ज़ेरे हिलतन।
ज़ै अपने घराने दुख देते, तैसेरो हिस्सो हवाए भोल्हो,
ते बेवकूफ अक्लमन्द मैन्हेरो दास भोइ गाते।
धेर्मेरो फल ज़िन्दगरो बुट भोते,
ते अक्लमन्द मैन्हु लोकां केरे मन ज़ींती छ़डते।
हेर, धेर्मी मैन्हु धेरती पुड़ बरकत मैलतीए,
ते इन भी पक्कू आहे कि दुष्ट ते पैपी बड़ी सज़ाह मैल्हेली।
Source notes (1)
- Footnote बच़ाव ज़ींत
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.