Bhadrawahi Bible
गिनती 8
दीये बालनेरी विधि
फिरी यहोवाए मूसे सेइं ज़ोवं, “हारूने समझ़ेइतां एन ज़ो कि तू ज़ैखन दीयो बालेलो, तैखन सत्ते दीयां केरि लौ दीवटेरे सामने पुज़्ज़े।” एल्हेरेलेइ हारूने तेन्च़रे कियूं, ज़ै हुक्म यहोवाए मूसे सेइं दित्तोरो थियो, तैसेरे मुताबिक तैनी दीये बाले, ताके तैना दीवटां केरे सामने लौ देन। ते दीवटां केरि बनावट एन्च़रे सेइं थी, पाए करां लेइतां ते बह फूड़न तगर ढैलतां सोन्ने सेइं बनेवरो थियो, ज़ै नमूनो यहोवाए मूसे हिरावरो थियो, तैसेरे मुताबिक तैनी दीवट बनेवरो थियो।
लेवी लोक शुद्ध केरने
फिरी यहोवाए मूसे सेइं ज़ोवं, “इस्राएली लोकन मरां लेवी लोकन अलग केरतां रीतरे मुताबिक शुद्ध केर। तैन शुद्ध केरनेरे लेई तू एरू केर, कि तैन पुड़ पवित्र केरनेरू पानी छ़िड़क, फिरी तैना अपने सारे जानी पुड़ उसतरो फेरन, ते अपना लिगड़ां धोन, ते एन्च़रे तैना अपनो आप शुद्ध केरन। तैखन तैना तेले सेइं सन्नोरे अट्टेरी अन्नबेलि समेत अक बछ़ड़ू आन्न, ते फिरी तू पापबलि देनेरे लेई अक होरू बछ़ड़ू ऐन्हां। ते तू लेवी लोकन मिलापे बाले तेम्बु कां सामने ऐन्हां, ते इस्राएली केरि सारी मण्डली अकोट्ठी केरां। तैखन तू लेवी लोकन यहोवारे सामने ऐन्हां, ते इस्राएली लोक अपने-अपने हथ तैन पुड़ रखन, तैखन हारून लेवी लोकन यहोवारे सामने इस्राएली लोकां केरि तरफां हिलेवरी च़ढ़तलरे तौरे पुड़ अर्पण केरे, ताके तैना यहोवारी सेवारे लेई तियार भोन। तैखन लेवी लोक अपने-अपने हथ तैन बछ़ड़ां केरे क्रोड़न पुड़ रखन, तैखन तू लेवी लोकां केरे प्रायश्चितेरे लेई अक बछ़ड़ू पापबलि देनेरे लेई, ते होरू बछ़ड़ू होमबलि देनेरे लेई यहोवा कां च़ैढ़ां। ते तू लेवी लोकन हारूनेरे मट्ठां केरे सामने खड़े केरां, ते तैन हिलानेरी च़ढ़तलरे लेई यहोवा जो अर्पण केरां।
“एन्च़रे तू तैन इस्राएली लोकन मरां अलग केरां, ते तैना फिरी मेरे भोल्हे। ज़ैखन तू लेवी लोकन शुद्ध केरतां हिलेवरी च़ढ़तलरे लेई अर्पण केरस, तैसेरां बाद तैना मिलापे बाले तेम्बु मां अपनि सेवा केरनेरे लेई अन्तर एज्जन। किजोकि तैना इस्राएली लोकन मरां मेरे लेई पूरे तरीके सेइं अर्पण कियोरेन; मीं तैना सब इस्राएली एक्की-एक्की कौन्शरे ज़ेठे मट्ठेरे बदले अपने बनेवरेन। इस्राएली लोकां केरे बड्डे बच्चे चाहे मैन्हेरे भोन, चाहे जानबरां केरे भोन, तैना सब मेरे आन; किजोकि मीं तैना अपने लेई पवित्र ठहरावरेन ज़ैखन मीं मिस्र मुल्खेरे सब ज़ेठे बच्चे मारोरे थिये। ते मीं इस्राएली लोकां केरे सब ज़ेठां बच्चां केरे बदले लेवी लोक नियोरेन। ते सारे इस्राएली लोकन मरां लेवी लोक हारून ते तैसेरां मट्ठां एल्हेरेलेइ दित्तोरन, कि तैना मिलापे बाले तेम्बु मां इस्राएली लोकां केरि तरफां सेवा ते प्रायश्चित केरन, कोन्च एरू न भोए कि इस्राएली लोक पवित्र ठारारे नेड़े एज्जन, ते तैन पुड़ कोई बड़ी आफत एज्जे, ऐह मद्दत केरनेरे लेई एक्की दानेरे रूपे मां तैना दित्तोरेन।”
लेवी लोकां केरे बारे मां यहोवारो ऐह हुक्म शुन्तां मूसे ते हारूने इस्राएली लोकां केरे सारे मेण्डलां तैन सेइं ठीक तेन्च़रे सेइं कियूं। लेवी लोकेईं त अपनो आप पापे करां शुद्ध कियो, ते अपना लिगड़ां धोआं, तैखन हारूने तैना यहोवारे सामने हिलेवरी च़ढ़तलरे लेई अर्पण किये, ते तैना शुद्ध केरनेरे लेई तैन केरे लेई प्रायश्चित भी दित्तो। ते फिरी लेवी लोक हारून ते तैसेरे मट्ठां केरे सामने मिलापे बाले तेम्बु मां अपनि-अपनि सेवा केरनेरे लेई जे, ते ज़ै हुक्म यहोवाए मूसे लेवी लोकां केरे बारे मां दित्तोरो थियो, तैसेरे मुताबिक तैना तेन्च़रे सेइं बर्ताव केरने लगे।
फिरी यहोवाए मूसे सेइं ज़ोवं, “ज़ैन लेवी लोकेईं एन्च़रे सेइं केरनूए तैना इनां आन, कि 25 सालां केरि उमरी करां लेइतां तैस करां जादे उमरारे मैन्हु मिलापे बाले तेम्बु मां सेवा केरनेरे लेई अन्तर दाखल भोइ गान। ते ज़ैखन तैन केरि उमर 50 साल भोइ गाए, त फिरी तैना तैस सेवारे लेई नेड़े न एज्जन, ते न कम केरन। पन तैना अपने ढ्लान सेइं साथी मिलापे बाले तेम्बु कां मद्दत केरि सकतन, पन कोन्ची किसमेरी सेवकाई न केरन, लेवी लोकन ज़ैन-ज़ैन कम सौंफू गाए, तैन केरे बारे मां तू एन्च़रे केरां।”
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.