Bhadrawahi Bible
गिनती 9
फ़सह तिहार
यहोवाए सीनैरे सुनसान ठैरी मां मूसे सेइं इस्राएली लोकां केरे मिस्र मुल्खे मरां निसनेरे दूइयोवं सालेरे पेइले महीने मां एन्च़रां ज़ोवं, “इस्राएली लोक फ़सह नंव्वेरू तिहार तैसेरे ठहरावरे वक्ते पुड़ मनान। इस्से महीनेरे च़ेवधोवं दिहाड़े ड्लवझ़रे मौके तैना सब विधि ते नियमां केरे मुताबिक मेन्नथ।” त मूसे इस्राएली लोकन सेइं ज़ोवं कि फ़सह तिहार मनाथ। ते तैनेईं पेइले महीनेरे च़ेवधोवं दिहाड़े ड्लवझ़रे मौके सीनैरे सुनसाने मां फ़सह तिहार मनावं, ते ज़ैना-ज़ैना हुक्म यहोवा मूसे दित्तोरे थिये, तैन्ना केरे मुताबिक इस्राएली लोकेईं तैन्ने कियूं। पन तैन मरां किछ लोक एक्की मैन्हेरी लाशी सेइं अशुद्ध भोनेरी वजाई सेइं तैस दिहाड़े फ़सह तिहार न मनेई सके, तैना तैस्से दिहाड़े मूसे ते हारूनेरे नेड़े गेइतां मूसे सेइं ज़ोने लगे, “अस लोक एक्की मैन्हेरी लाशरे वजाई सेइं अशुद्ध भोवरेम, पन अस किजो रुकम, ते इस्राएली लोकन सेइं साथी अस भी यहोवा कां च़ढ़तल ठीक मौके पुड़ कि न च़ाढ़म?” मूसे तैन ज़ोवं, “यहोवा तुश्शे बारे मां कुन हुक्म देते एन शुन्नेरे लेई रुकोरे राथ।”
यहोवाए मूसे सेइं ज़ोवं, “इस्राएली लोकन सेइं ज़ो कि तुश्शे लोकन मरां चाहे तुश्शे खानदाने मरां कोई भी कोन्ची लाशरी वजाई सेइं अशुद्ध भोए, या दूरेरे सफरे मां भोए, फिरी भी तै यहोवारे लेई तिहार मनाए। फिरी तैना दूइयोवं महीनेरे च़ेवधोवं दिहाड़े ड्लवझ़रे मौके मनान, ते फ़सह तिहारेरे बलि देनेरे जानबरेरू मास अखमीरी रोट्टन ते ट्लिठे शागे सेइं खान। ते तैस मरां झ़ेझ़ां तगर किछ भी बाकी न रखन, ते न तैसेरी कोई हड्डी ट्लोड़न, तैन फ़सहेरू तिहार सैरी विधि केरे मुताबिक मनान। पन अगर कोई मैन्हु शुद्ध भोए ते सफरे मां न भोए, पन फ़सहेरू तिहार न मनाए, तैखन तै मैन्हु अपने लोकन मरां नाश कियो गालो, तै मैन्हु यहोवारी च़ढ़तल ठीक वक्ते पुड़ न अन्नेरे वजाई सेइं तैस अपने पापेरी वजाई सेइं सज़ाह मैल्हेली। अगर कोई परदेशी तुसन सेइं साथी रेइतां एन चाहे कि यहोवारे लेई फ़सह तिहार मनाए, त तै तैन्ने विधि केरे मुताबिक मनाए, देशी ते परदेशी दूईयां केरे लेई तुश्शी अक्के विधि भोल्ही।”
बिदलार ते अग
ज़ैस दिहाड़े मिलापे बालो तेम्बु, ज़ैस जो करारेरो तेम्बु भी ज़ोतन, खड़ो कियो, तैस दिहाड़े बिदलार तैस पुड़ पेई जेई, ते ड्लवझ़ां करां झ़ेझ़ां तगर अग्गरी ज़ेरि लेइहोती राई। रोज़ तैन्ने भोतू रहतू थियूं, कि दीसां बिदलार भोती थी, ते राती अग लेइहोती थी। ते ज़ैखन-ज़ैखन तै बिदलार मिलापे बाले तेम्बु पुड़ेरां खड़ी भोती थी, तैखन-तैखन इस्राएली लोक अग्रोवं सफर केरते थिये, ते ज़ैस ठारी पुड़ बिदलार रुकती थी, तैस ठैरी इस्राएली लोक अपने डेरे खड़े केरते थिये। यहोवारे हुक्मेरे मुताबिक इस्राएली लोक अपने डेरे पुटतां अग्रोवं सफर केरते थिये, ते यहोवारे हुक्मेरे मुताबिक डेरे खड़े केरतां रहते थिये; ते ज़ेत्रे दिहाड़े तै बिदलार मिलापे बाले तेम्बु पुड़ टिकोरी रहती थी, तेत्रे दिहाड़न तगर तैन केरे डेरे तैड़ी लग्गोरे रहते थिये। ज़ैखन बिदलार बड़े दिहाड़न तगर मिलापे बाले तेम्बु पुड़ टिकोरी रहती थी, तांभी इस्राएली लोक यहोवारो हुक्म मन्ते थिये, ते अग्रोवं सफर न थिये केरते। ते कधी-कधी तै बिदलार थोड़े दिहाड़े मिलापे बाले तेम्बु पुड़ रहती थी, ते तैखन भी तैना यहोवारे हुक्मे सेइं तैन केरे डेरे लग्गोरे रहते थिये, ते फिरी तैना यहोवारे हुक्मे सेइं अग्रोवं सफर केरते थिये। ते कधी-कधी तै बिदलार सिर्फ ड्लवझ़ां करां लेइतां झ़ेझ़ां तगर रहती थी, ते ज़ैखन तै झ़ेझ़ां तगर खड़ी भोइ गाती थी, त तैना अग्रोवं सफर केरते थिये। तै बिदलार चाहे दूई दिहाड़े, चाहे अक महीनो, चाहे अक साल, ज़ांतगर मिलापे बाले तेम्बु पुड़ बिदलार टिकोरी रहती थी, तांतगर इस्राएली लोक अपने डेरन मां रहते थिये, ते अग्रोवं सफर न थिये केरते; पन ज़ैखन तै बिदलार खड़ी भोइ गाती थी, तैखन तैना अग्रोवं सफर केरते थिये। यहोवारे हुक्मेरे मुताबिक तैना अपने डेरे भी खड़े केरते थिये, ते यहोवारे हुक्मे सेइं तैना अग्रोवं सफर भी केरते थिये, ते ज़ैना हुक्म यहोवा मूसेरे ज़िरिये दित्तोरे थिये, तैना तैन मन्ते थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.