Bhadrawahi Bible
गिनती 7
वेदरे अभिषेके पुड़ तिहारेरी च़ढ़तलां
ज़ैखन मूसे मिलापे बालो तेम्बु खड़ो कियो त तैसेरां बाद तैन सारू सामान तैनी अभिषेक केरतां पवित्र कियूं, ते तेन्च़रे सारे वेदी ते तैसेरू सारू सामान भी अभिषेक केरतां पवित्र कियूं, तैखन इस्राएली लोकां केरे प्रधान ज़ैना अपने-अपने सियाना केरे घराना केरे खास मड़द ते गोट्लां केरे भी प्रधान भोइतां गन्नेरे कम्मे पुड़ ठहरावरे थिये, तैना यहोवा कां अपनि च़ढ़तल आन्न, ते तैन केरि च़ढ़तल शा भेरोरी गेड्डी, ते 12 दांत थिये, यानी, दूई-दूई प्रधानां केरि तरफां अक-अक गड्डी, ते एक्की-एक्की प्रधानेरी तरफां अक-अक दांत, एन तैनेईं मिलापे बाले तेम्बेरे सामने यहोवारे नेड़े आनू। तैखन यहोवा मूसे सेइं ज़ोवं, “तैन चीज़न तू तैन करां नेइयां, ताके मिलापे बाले तेम्बु मां सेवारे कम्मे एज्जन, तू तैन लेवी केरे एक्की-एक्की कुलां केरि खास सेवारे मुताबिक तैन बेंटी देइयां।” यानी मूसे तैना सब गेड्डी ते दांत नेइतां लेवी लोकन दित्ते। गेर्शोनी लोकन तैन केरि सेवारे मुताबिक तैन दूई गेड्डी ते 4 दांत दित्ते। फिरी मरारी लोकन तैन केरि सेवारे मुताबिक तैन 4 गेड्डी ते अठ दांत दित्ते, ते एना सब हारून याजकेरे मट्ठे ईतामारेरे अधिकारे मां देइ दित्ते। पन कहाती लोकन तैनी किछ न दित्तू, किजोकि तैन केरे लेई पवित्र चीज़ां केरि ऐह सेवकाई थी, कि तैना तैस अपने कंधे पुड़ छ़ुइतां च़लान।
फिरी ज़ैखन वेदरू अभिषेक भोइ जेव त प्रधान तैसेरे संस्कारेरी च़ढ़तल वेदी कांजो नेने लगे। ते तैखन यहोवाए मूसे सेइं ज़ोवं, “वेदरे संस्कारेरे लेई प्रधान लोक अपनि-अपनि च़ढ़तल रखोरे दिहैड़ी पुड़ च़ाढ़न।”
एल्हेरेलेइ ज़ै मड़द पेइले दिहाड़े अपनि च़ढ़तल घिन्तां जेव, तै यहूदा गोट्लेरे अम्मीनादाबेरू मट्ठू नहशोन थियूं; तैसेरी च़ढ़तल ऐह थी, पवित्र ठारारे शेकेलेरे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबलि देनेरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, अक हुड़, ते एक्की सालेरू अक गबड़ू। पापबलि देनेरे लेई अक थाव्वो। ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की सालेरां 5 गबड़ां, अम्मीनादाबेरू मट्ठू नहशोनेरी एहे च़ढ़तल थी।
दूइयोवं दिहाड़े इस्साकारेरे गोट्लेरो प्रधान सूआरेरू मट्ठू नतनेले च़ढ़तल आनी; तै च़ढ़तल ई थी, पवित्र ठारारे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, अक हुड़, ते एक्की सालेरू अक गबड़ू; पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की-एक्की सालेरां 5 गबड़ां, सूआरेरू मट्ठू नतनेलेरी एहे च़ढ़तल थी।
ट्लेइयोवं दिहाड़े जबूलूनी लोकां केरो प्रधान हेलोनेरू मट्ठू एलीआबे ई च़ढ़तल आनी, तै ई थी, यानी, पवित्र ठारारे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, अक हुड़, ते एक्की सालेरू अक गबड़ू; पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की सालेरां 5 गबड़ां, हेलोनेरू मट्ठू एलीआबेरी एहे च़ढ़तल थी।
ते च़ेवरोवं दिहाड़े रूबेनी लोकां केरो प्रधान शदेऊरेरू मट्ठू एलीसूरे ई च़ढ़तल आनी, तैसेरी च़ढ़तल ई थी, पवित्र ठारारे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, ते अक हुड़, ते एक्की सालेरू अक गबड़ू; पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की सालेरे 5 गबड़ां, शदेऊरेरू मट्ठू एलीसूरेरी एहे च़ढ़तल थी।
पंच़ोंव दिहाड़े शिमोनी लोकां केरो प्रधान सूरीशद्दैरे मट्ठे शलूमीएले ई च़ढ़तल आनी, तैसेरी च़ढ़तल ई थी, पवित्र ठारारे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान। होमबलि देनेरे लेई अक बछ़ड़ू, अक हुड़, ते एक्की सालेरू अक गबड़ू। पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की सालेरां 5 गबड़ां, सूरीशद्दैरे मट्ठे शलूमीएलेरी एहे च़ढ़तल थी।
ते शेइयोवं दिहाड़े गाद गोट्लेरे लोकां केरो प्रधान दूएलेरे मट्ठे एल्यासापे ई च़ढ़तल आनी, तैसेरी च़ढ़तल ई थी, यानी, पवित्र ठारारे शेकेलेरे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, ते अक हुड़, ते एक्की सालेरू गबड़ू; पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की सालेरे 5 गबड़ां, दूएलेरे मट्ठे एल्यासापेरी एहे च़ढ़तल थी।
ते सत्तोवं दिहाड़े एप्रैम गोट्लेरे लोकां केरो प्रधान अम्मीहूदेरे मट्ठे एलीशामाए ई च़ढ़तल आनी, तैसेरी च़ढ़तल ई थी, पवित्र ठारारे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, अक हुड़, ते एक्की सालेरू अक गबड़ू; पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की सालेरां 5 गबड़ां, अम्मीहूदेरू मट्ठू एलीशामारी एहे च़ढ़तल थी।
ते अठोवं दिहाड़े मनश्शे गोट्लेरे लोकां केरो प्रधान पदासूरेरे मट्ठे गम्लीएले ई च़ढ़तल आनी; तैसेरी च़ढ़तल ई थी, पवित्र ठारारे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, ते अक हुड़, ते एक्की सालेरू अक गबड़ू; पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की सालेरां 5 गबड़ां, पदासूरेरे मट्ठे गम्लीएलेरी एहे च़ढ़तल थी।
नंव्वोवं दिहाड़े बिन्यामीन गोट्लेरे लोकां केरो प्रधान गिदोनी एरे मट्ठे अबीदाने ई च़ढ़तल आनी, तैसेरी च़ढ़तल ई थी, पवित्र ठारारे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, ते अक हुड़, ते एक्की सालेरू अक गबड़ू; पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की-एक्की सालेरां 5 गबड़ां, गिदोनी एरू मट्ठू अबीदानेरी एहे च़ढ़तल थी।
दशोवं दिहाड़े दान गोट्लेरे लोकां केरो प्रधान अम्मीशद्दैरू मट्ठे अहीएजेरे ई च़ढ़तल आनी, तैसेरी च़ढ़तल ई थी, पवित्र ठारारे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, ते अक हुड़, ते एक्की सालेरू अक गबड़ू; पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की सालेरां 5 गबड़ां, अम्मीशद्दैरे मट्ठे अहीएजेरेरी एहे च़ढ़तल थी।
यारोवं दिहाड़े आशेर गोट्लेरे लोकां केरो प्रधान ओक्रानेरे मट्ठे पगीएले ई च़ढ़तल आनी। तैसेरी च़ढ़तल ई थी, पवित्र ठारारे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, ते अक हुड़, ते एक्की सालेरू अक गबड़ू; पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की सालेरां 5 गबड़ां, ओक्रानेरे मट्ठे पगीएलेरी एहे च़ढ़तल थी।
बारोवं दिहाड़े नप्ताली गोट्लेरे लोकां केरो प्रधान एनानेरे मट्ठे अहीरा ई च़ढ़तल आनी, तैसेरी च़ढ़तल ई थी, पवित्र ठारारे हिसाबे सेइं 130 शेकेल चैंदरी अक पातर, ते 70 शेकेल चैंदरो अक कुटोरो, एना दूईये अन्नबेलरे लेई तेले सेइं सन्नोरे ते अट्टे सेइं भरोरे थिये; फिरी धूपे सेइं भरोरो 10 शेकेल सोन्नेरो अक धूपदान; होमबलि देनेरे लेई अक बछ़ड़ू, ते अक हुड़, ते एक्की सालेरू अक गबड़ू; पापबलि देनेरे लेई अक थाव्वो; ते मेलबलि देनेरे लेई 2 दांत, ते 5 हुड़, ते 5 थाव्वे, ते एक्की सालेरे 5 गबड़ां, एनानेरे मट्ठे अहीरारी एहे च़ढ़तल थी।
वेदी कां अभिषेक केरनेरे मौके इस्राएली लोकां केरे प्रधानां केरि तरफां संस्कारेरी च़ढ़तल एहे थी, चैंदरी 12 पातरां, चैंदरे 12 कुटोरे, ते सोन्नेरां 12 धूपदान। अक-अक चैंदरी पातर, 130 शेकेलां केरि, ते अक-अक चैंदरो कुटोरो 70 शेकेलां केरो थियो, ते पवित्र ठारारे शेकेलां केरे हिसाबे सेइं एना सब चैंदरी पातरां 2400 शेकेलां केरि थी। फिरी धूपे सेइं भेरतां सोन्नेरे 12 धूपदान ज़ैना पवित्र ठारारे शेकेलेरे हिसाबे सेइं दश-दश शेकेलेरे थिये, तैना सब धूपदान 120 शेकेल सोन्नेरे थिये। फिरी होमबलि देनेरे लेई सब मिलेइतां 12 बछ़ड़ां, 12 हुड़, ते एक्की-एक्की सालेरां 12 गबड़ां एपनी-एपनी अन्नबलि देनेरे लेई साथी थियां, ते पापबलि देनेरे लेई सब 12 थाव्वे थिये। ते मेलबलि देनेरे लेई सब मिलेइतां 24 दांत, ते 60 हुड़, ते 60 थाव्वे, ते एक्की-एक्की सालेरां 60 गबड़ां थियां, वेदी कां संस्कारेरो अभिषेक भोनेरां बाद तैसेरे संस्कारेरी च़ढ़तल एहे भोइ। ते ज़ैखन मूसो यहोवा सेइं गल्लां केरनेरे लेई मिलापे बाले तेम्बु मां जेव, तैनी प्रायश्चितेरे ढकने पुड़ां ज़ै गवैहरो सन्दूखे पुड़ भोतो थियो, दूईये करूबां केरे मझ़ाटेरां तैनी आवाज़ शुनी, ज़ै तैस सेइं गल्लां लगोरो थियो केरने, तैनी यहोवा सेइं गल्लां की।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.