Bhadrawahi Bible
गिनती 33
मिस्र मरां इस्राएली लोकां केरे सफरेरे बारे मां
ज़ैखन करां इस्राएली मूसा ते हारूनेरी अगवाई मां दल बनेइतां मिस्र मुल्खे मरां निस्से, तैखन करां तैना इन ठारन पुड़ रुके। मूसो यहोवा करां हुक्म मैलतां तैन केरे सफर केरतां रुकनेरी ठारां इना आन; पेइले महीनेरे1 परहनोवं दिहाड़े इस्राएली लोकेईं रामसेस नंव्वेरे मिस्री सफर कियूं; फ़सहेरे दूइयोवं दिहाड़े ज़ैखन मिस्री लोकां केरे हेरते बेधड़क भोइतां तैना निस्सी जे, ज़ैखन मिस्री लोक अपने सब ज़ेठे बच्चन दबने लगोरे थिये ज़ैना यहोवाए मारोरे थिये; ते तैनी तैन केरे देबतन भी सज़ाह दित्तोरी थी।
इस्राएली लोकेईं रामसेस नंव्वेरे जगाई मरां सफर केरतां सुक्कोत नंव्वेरे जगाई मां डेरे लाए। ते सुक्कोते करां सफर केरतां एताम नंव्वेरे जगाई मां, ज़ै जंगलेरे एक्की पासे, डेरे लाए। ते एतामे करां सफर केरतां तैना पीहाहीरोते जो मुड़े, ज़ैन बाल-सपोनेरे सामने; ते मिग्दोलेरे सामने डेरे लाए। तैखन तैना पीहहीरोते करां च़ेलतां समुन्दरे मांमेइं भोइतां जंगले मां जे, ते एताम नंव्वेरे जंगले मां ट्लाई दिहैड़ी केरि बत च़ेलतां मारा मां डेरे लाए। फिरी मारा मरां सफर केरतां एलीमे जो जे, ते एलीमे मां पैनेरे 12 नाग ते 70 खजूरेरे बुट मैल्हे, ते तैनेईं तैड़ी डेरे खड़े किये। ते तैखन तैनेईं एलीमे मरां सफर केरतां लाल समुन्दरेरे बन्ने पुड़ डेरे लाए। ते लाल समुन्दरे करां सफर केरतां सीन नंव्वेरे जंगले मां डेरे लाए। फिरी सीन नंव्वेरे जंगले मरां सफर केरतां दोपका मां डेरे लाए। ते दोपका मरां सफर केरतां आलूशे मां डेरे लाए। ते आलूशे मरां सफर केरतां रपीदीमे मां डेरे लाए, ते तैड़ी तैन लोकन पीने जो पानी न मैल्हू। फिरी तैनेईं रपीदीमे मरां सफर केरतां सीनैरे जंगले मां डेरे लाए। ते सीनैरे जंगले मरां सफर केरतां किब्रोतहत्तावा मां डेरे लाए। ते किब्रोतहत्तावा मरां सफर केरतां हसेरोते मां डेरे लाए। ते हसेरोते मरां सफर केरतां रित्मा मां डेरे लाए। फिरी तैनेईं रित्मा मरां सफर केरतां रिम्मोनपेरेसे मां डेरे लाए। ते रिम्मोनपेरेसे मरां सफर केरतां लिब्ना मां डेरे लाए। ते लिब्ना मरां सफर केरतां रिस्सा मां डेरे खड़े किये। ते रिस्सा मरां अग्रोवं च़ेलतां कहेलाता मां डेरे लाए। ते कहेलाता मरां अग्रोवं च़ेलतां शेपेर पहाड़े कां डेरे लाए। फिरी तैनेईं शेपेर पहाड़े मरां अग्रोवं च़ेलतां हरादा मां डेरे लाए। ते हरादा मरां अग्रोवं च़ेलतां मखेलोते मां डेरे लाए। ते मखेलोते मरां च़ेलतां तहते मां डेरे लाए। ते तहते मरां अग्रोवं च़ेलतां तेरह मां डेरे लाए। ते तेरह मरां अग्रोवं च़ेलतां मित्का मां डेरे लाए। फिर मित्का मरां अग्रोवं च़ेलतां हशमोना मां डेरे लाए। ते हशमोना मरां अग्रोवं च़ेलतां मोसेरोते मां डेरे लाए। ते मोसेरोते मरां अग्रोवं च़ेलतां याकानी लोकां केरे दरमियाने मां डेरे लाए। ते याकानी लोकां केरे दरमियाने मरां अग्रोवं च़ेलतां होर्हग्गिदगाद मां डेरे लाए। ते होर्हग्गिदगादे मरां अग्रोवं च़ेलतां योतबाता मां डेरे लाए। ते योतबाता मरां अग्रोवं च़ेलतां अब्रोना मां डेरे लाए। ते अब्रोना मरां अग्रोवं च़ेलतां एस्योनगेबेर मां डेरे लाए। ते एस्योनगेबेर मरां अग्रोवं च़ेलतां सीन नंव्वेरे जंगलेरे कादेशे मां डेरे लाए। फिरी कादेशे मरां अग्रोवं च़ेलतां होर पहाड़ेरे नेड़े, ज़ैन एदोम प्रदेशेरी सरहद्दी पुड़े, डेरे लाए। ते तैड़ी इस्राएली लोकां केरे मिस्र मुल्खे मरां निसनेरे च़ैलीयोवं सालेरे दशोवं महीनेरे पेइले दिहाड़े हारून याजक यहोवारे हुक्मेरे मुताबिक होर पहाड़े पुड़ च़ढ़ो, ते तैड़ी मेरि जेव। ते ज़ैखन हारून होर पहाड़े पुड़ मेरि जेव तैखन तै 123 सालां केरो थियो। ते अराद नगरेरो कनानी राज़ो, ज़ै कनान मुल्खेरे दक्षिणी हिस्सो मां रहतो थियो, त तैस इस्राएली लोकां केरि एजनेरी खबर मैल्ही। तैखन इस्राएली लोकेईं होर पहाड़े करां अग्रोवं च़ेलतां सलमोना मां डेरे लाए। ते सलमोना मरां अग्रोवं च़ेलतां पूनोन मां डेरे लाए। ते पूनोन मरां अग्रोवं च़ेलतां ओबोते मां डेरे लाए। ते ओबोते मरां अग्रोवं च़ेलतां अबारीम नंव्वेरे डीहों मां ज़ै मोआबेरे सरहद्दी पुड़े डेरे लाए। ते तैखन तैन डीहों मरां अग्रोवं च़ेलतां तैनेईं दीबोने मां डेरे लाए। ते दीबोने मरां अग्रोवं च़ेलतां अल्मोनदिबलातैमे मां डेरे लाए। ते अल्मोनदिबलातैमे मरां अग्रोवं च़ेलतां तैनेईं अबारीम नंव्वेरे पहाड़न मां नबो एरे सामने डेरे लाए। फिर अबारीम पहाड़न मरां अग्रोवं च़ेलतां मोआबेरे अराबा मां, यरीहोएरे नेड़े यरदन दरियारे बन्ने पुड़ डेरे लाए। ते तैनेईं मोआबेरे अराबा मरां अग्रोवं च़ेलतां बेत्यशीमोते करां लेइतां आबेलशित्तीमे तगर यरदनेरे बन्ने-बन्ने डेरे लाए।
कनाने पुड़ हमलो केरनेरो हुक्म
फिर मोआबेरे अराबा मां, यरीहो कां यरदन दरियारे बन्ने पुड़, यहोवाए मूसे सेइं ज़ोवं, “इस्राएली लोकन समझ़ेइतां ज़ो: ज़ैखन तुस यरदन पार केरतां कनान मुल्खे मां पुज़थ, ते तैखन तैस मुल्खेरे रानेबालन तैस मुल्खे मरां केढथ; ते तैसेरे सब घड़ोरे घोड़न ते ढैलोरी मूरतन नाश केरथ, ते तैन केरि पूज़ा केरनेरी उच्ची ठारन बिछ़ोड़ी छ़ेडथ। ते तैस मुल्खे अपने अधिकारे मां नेइतां तैस मां रेइयथ, किजोकि मीं तै मुल्ख तुसने दित्तोरोए कि तुस तैसेरे अधिकारी भोथ। ते तुस तैस मुल्खे चिट्ठी छ़ेडतां अपने कुलां केरे मुताबिक बेन्टथ; मतलब ज़ैस कुले मां जादे लोकन तैन जादे ते ज़ैस मां थोड़ेन तैन थोड़ो हिस्सो देनो; ज़ैस कुलेरी चिट्ठी ज़ैस ठारारे लेई निस्से तै तैसेरो हिस्सो भोल्हो; अपने सियाना केरे गोट्लां केरे मुताबिक अपनो-अपनो हिस्सो नेनो। पन अगर तुस तैस मुल्खेरे रानेबालन अपने सामनेरां न कढेले, त तैन मरां ज़ैन तुस तैन मां राने देले, तैना तुश्शे नज़री मां ज़ेरे कंटे ते तुश्शी देल्लोड़न मां कील भोल्हे, ते तैना तैस मुल्खे मां ज़ैड़ी तुस बस्सथ, तुसन मुश्किली मां छ़डेले। ते तैन सेइं ज़ेरो बर्ताव केरनेरी इच्छा मीं कियोरीए तेन्च़रे तुसन सेइं केरेलो।”
Source notes (1)
- Footnote इब्रानी कलंडरेरे मुताबिक पेइलो महीनो मारच मझ़ाटे करां मझ़ाटे अप्रैले तगर। फ़सहरे तिहारेरे तैस दिहाड़ेरां बाद पेइले महीनेरे परहनोवं दिहाड़े हिराते।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.