Bhadrawahi Bible
गिनती 32
यरदन पहाड़े मां बस्सोरे गोट्ल
एरू भोवं कि रूबेनी लोकन कां ते गादी लोकन कां बड़े जानबर थिये। ज़ैखन तैनेईं याजेर ते गिलाद सूबे हेरे त तैनेईं सोचू, कि तै जानबरां केरे काबल मुल्ख आहे, तैखन मूसे ते एलीआजर याजक ते मेण्डलरे प्रधान्न कां गेइतां ज़ोने लगे, “अतारोत, दीबोन, याजेर, निम्रा, हेशबोन, एलाले, सबाम, नबो, ते बोन नगरां केरो मुल्ख हेरा। ज़ैन इलाकन पुड़ यहोवा इस्राएली लोकां केरी मेण्डली ज़ींत दित्तोरीए, तै जानबर पालनेरे काबल मुल्खे, ते तेरे नौकरन कां जानबर बड़े आन।” फिरी तैनेईं ज़ोवं, “अगर तेरो अनुग्रह तेरे नौकरन पुड़ भोए, ते ई मुल्ख तेरे नौकरन मैल्हे कि तैन केरी अपनि ज़मीन भोए; ते असन यरदन दरियाएरे पार न ने।” तैखन मूसे गादी लोकन ते रूबेनी लोकन सेइं ज़ोवं, “ज़ैखन तुश्शे बाकी इस्राएली ढ्ला जंग केरनेरे लेई गाले, तैखन कुन तुस इड़ी बिश्शोरे राले? ते तुस बाकी इस्राएली लोकन सेइं साथी पारेरे मुल्खेरे बारे मां गानेरे बारे मां, ज़ै यहोवा तैन दित्तोरोए, तुस कुन तैस किजो मन्ज़ूर न केरतथ? ज़ैखन मीं तुश्शे दादे पड़दादे कादेशबर्ने मरां कनान मुल्ख हेरनेरे लेई भेज़ोरे थिये, तैखन तैनेईं भी एन्च़रे कियोरू थियूं। तैखन तैनेईं एशकोल नव्वेंरी वैदी तगर पुज़तां तै मुल्ख लाव, तैखन इस्राएली लोकेईं तैस मुल्खेरे बारे मां ज़ै यहोवाए तैन दित्तोरो थियो, तैस मां गानू मन्ज़ूर न कियूं। एल्हेरेलेइ तैस मौके यहोवाए सेरकोइतां ई कसम खाइ, ‘ज़रूर ज़ैना मैन्हु मिस्र मुल्खेरां निस्तां एवरेन तैन मरां ज़ेत्रे 20 सालां केरे या तैस करां जादे उमरारेन, तैना तैस मुल्खे न लेही बटेले, ज़ैस देनेरी कसम मीं अब्राहम, इसहाक ते याकूब सेइं कियोरीए, किजोकि तैना मीं पत्ती पूरे तरीके सेइं नईं च़लोरे; पन यपुन्ने कनजी एरू मट्ठू कालेब, ते नूनेरू मट्ठू यहोशू, तैना दूईये मीं पत्ती पूरे तरीके सेइं च़लोरेन, तैना तैस मुल्खे लेही बटेले।’ तैखन यहोवारी सरक इस्राएली लोकन पुड़ भड़की, ते ज़ांतगर तैस पीढ़रे सब लोकां केरो अन्त न भोव, ज़ैनेईं यहोवारे लेई बुरू कियोरू थियूं, तांतगर मतलब 40 सालन तगर तै तैन पत्ती जंगले मां फिरातो राव। ते शुना, तुस लोक तैन पापी लोकां केरे बच्चे आथ एल्हेरेलेइ अपने दादे पड़दादां केरे ज़ेरे तैन केरि ठैरी पुड़ बांदे भोवरेथ, कि इस्राएलेरे खलाफ यहोवारे भड़कोरी सरकी होरि भी भड़काने लगोरेथ! अगर तुस तैस पत्ती च़लने करां बेदलोई गाथ, ते फिरी तै असन सेब्भन जंगले मां छ़ेडी देलो; एन्च़रे सेइं तुस इन सैरी लोकां केरो नाश कराले।”
ते तैखन तैनेईं मूसे कां होरे भी नेड़े एइतां ज़ोवं, “अस अपने जानबरां केरे लेई गेवड़ां बनामेले, ते अपने बाल बच्चां केरे लेई नगरां बसामेले, पन तुस इस्राएली लोकां केरे अग्री-अग्री हथियार-बन्द तांतगर च़लेले, ज़ांतगर तैन केरे ठारन मां न पुज़ान; पन इश्शे बाल-बच्चे ते इश्शी कौन्शां क़िले बाले नगरन मां राले। पन ज़ांतगर इस्राएली अपने-अपने हिस्सेरे अधिकारी न भोन तांतगर अस अपने घरन जो वापस न एजमेले। असन तैन सेइं साथी यरदन पार या कोन्च अगर अपनो हिस्सो न नेम, किजोकि इश्शो हिस्सो यरदन करां इस पार पूर्वेरे पासे मैल्होरोए।” तैखन मूसे तैन सेइं ज़ोवं, “अगर तुस एरू केरथ, ते तुस यहोवा करां अग्री-अग्री जंग लड़नेरे लेई हथियार बन्धथ। ते हर अक हथियार-बन्द यरदनेरे पार तैखन तगर च़ले, ज़ांतगर यहोवा अपने दुश्मन्न एप्पु अगरां न कढे। ते मुल्ख यहोवारे कब्ज़े मां न एज्जे; ते तैस पत्ती तुस इड़ी एज्जेले, ते यहोवा ते इस्राएलेरे बारे मां बेकसूर ठहरेले; ते ई मुल्ख यहोवारे लेई तुश्शी अपनि ज़मीन ठहरेली। ते अगर तुस एरू न केरथ, ते यहोवारे खलाफ पापी ठहरेले; ते याद रखा तुसन तुश्शो पाप लग्गेलो। तैखन तुस अपने बाल बच्चां केरे नगर बसाले, ते अपनि भैड्डां-छ़ेल्ली केरे लेई गेवड़ां बनाले; ते ज़ैन तुश्शे ऐशेरां निस्से तैन्ने केरा।” ते तैखन गादी लोक ते रूबेनी लोकेईं मूसे सेइं ज़ोवं, “अपने प्रभुएरे हुक्मेरे मुताबिक तेरे नौकर केरेले। इश्शे बाल-बच्चे, कौन्शां, भैड्डां-छ़ेल्ली, सब जानबर ते इड़ी गिलादेरे नगरन मां राले; पन अपने प्रभुएरे ज़ोनेरे मुताबिक तेरे मड़द सब जंग लड़नेरे लेई हथियार-बन्द यहोवारे अग्री-अग्री लड़नेरे लेई पार गाले।”
“तैखन मूसे तैन केरे बारे मां एलीआजर याजक, ते नूनेरू मट्ठू यहोशू, ते इस्राएली गोट्लां केरे सियाना केरे घरानेरे खास-खास-मड़दन ई हुक्म दित्तो ताके, अगर सब गादी ते रूबेनी गोट्लां केरे मड़द जंग केरनेरे लेई हथियार-बन्द तुसन साथी यरदन पार गान, ते मुल्ख तुश्शे कब्ज़े मां एज्जी गाए ते गिलाद मुल्ख तैन केरि अपनि ज़मीन भोनेरे लेई देनी। पन अगर तैना तुसन सेइं साथी हथियार-बन्द पार न गान, त तैन केरि अपनि ज़मीन तुश्शे दरमियान कनान मुल्खे मां ठहरे।” ते तैखन गाद ते रूबेनी लोक ज़ोने लगे, “यहोवा ज़ेन्च़रे तेरे नौकरन करां ज़ुवावरू थियूं तेन्च़रे अस केरमेले। अस हथियार-बन्द यहोवा करां अग्री-अग्री तैस पार तैस कनान मुल्खे मां गामेले, पन इश्शी अपनि ज़मीन यरदनेरे इस्से पार भोए।”
ते तैखन मूसे गादी ते रूबेनी लोकन, ते यूसुफेरू मट्ठू मनश्शेरे अध्धे गोट्ले बालेईं एमोरी लोकां केरे राज़ो सीहोन ते बाशानेरो राज़ो ओग, दूईयां रियासतां केरो मुल्ख, नगरन, ते तैन केरि आसे पासेरी ज़मीनी समेत दित्तो। ते तैखन गादी लोकेईं दीबोन, अतारोत, अरोएर, अत्रौत, शोपन, याजेर, योगबहा, बेतनिम्रा, ते बेत-हारन नंव्वेरे नगरां मज़बूत कियां, ते तैन मां भैड्डां-छ़ेल्ली केरे लेई गेवड़ां बनां। ते रूबेनी लोकेईं हेशबोन, एलाले, ते किर्यातैमे, फिरी नबो ते बालमोनेरू नवं बेदलतां तैन, ते सिबमा मज़बूत कियूं; ते तैनेईं अपने मज़बूत कियोरे नगरां केरू नवं बेदलतां होरां-होरां नंव्वां रखां। ते मनश्शेरू मट्ठू माकीरेरे खानदानेरे लोकेईं गिलादेरे मुल्खे मां गेइतां ते तै नियो, ते ज़ैना एमोरी लोक तैस मां रहते थिये तैना कढे। ते तैखन मूसे मनश्शेरे मट्ठे माकीरेरे खानदाने गिलाद दित्तू, ते तैना तैस मां राने लगे। ते मनश्शेई गोट्लेरे याईरे गेइतां गिलादेरी केत्री बेसती नेही, ते तैन केरां नंव्वां हव्वोत्याईर 1रखां। ते नोबहे मां गेइतां ड्लाव्वन समेत कनात नियो, ते तैसेरू नवं अपने नंव्वें पुड़ नोबह रख्खू।
Source notes (1)
- Footnote हव्वोत्याईर याईरेरू ड्लावं
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.