Bhadrawahi Bible
गिनती 31
मिद्यानी लोकन करां बदलो नेनेरे बारे मां
फिरी यहोवा मूसे सेइं ज़ोवं, “मिद्यानी लोकन करां इस्राएली लोकां केरो बदलो घिन; तैसेरां बाद तू अपने लोकन मां मिली गालो।” तैखन मूसे लोकन सेइं ज़ोवं, “अपने लोकन मरां मड़दन जंगरे लेई हथियार ट्लेइतां तियार केरा, कि तैना मिद्यानी लोकन पुड़ चढ़ाई केरतां तैन करां यहोवारो बदलो घिन्नी सकम। एल्हेरेलेइ इस्राएली लोकां केरे हर एक्की गोट्ले मरां अक-अक हज़ार मड़दन जंग केरनेरे लेई भेज़ा।” तैखन इस्राएली लोकां केरे हर एक्की गोट्ले मरां अक-अक हज़ार मड़द च़ुने जे, ते जंगरे लेई हथियार बेन्धतां बारहे हज़ार मड़द थिये। तैखन मूसे हर एक्की गोट्ले मरां हज़ार-हज़ार मड़द ते एलीआजर याजकेरू मट्ठू पीनहास मूसे साथी जंग केरनेरे लेई भेज़ू, ते पीनहासेरे हथ्थे मां पवित्र ठारारू भांड, ते तैना नरशिंगे थिये, ज़ैना ज़ोरे सेइं फुक देइतां बज़ाते थिये। ते ज़ै हुक्म यहोवा मूसे दित्तोरो थियो, तैसेरे मुताबिक तैनेईं मिद्यानी लोकन सेइं जंग केरतां सब लोक मैरी छ़डे। ते मारोरे लोकन मरां तैनेईं एवी, रेकेम, सूर, हूर, ते रेबा नंव्वेरे मिद्यानेरे पंच़ राज़े भी मारे; ते बोरेरू मट्ठू बिलाम भी तैनेईं तलवारी सेइं मैरी छ़डो। ते इस्राएली लोकेईं मिद्यानी लोकां केरे बाल बच्चे गुलाम बनेइतां आने; ते तैन केरां गोरू, गब्बां ते तैन केरि सारी जाईदात लुटी छ़डी। फिरी तैना तैन केरे रानेरे सब नगरन, ते सब डेरे तैनेईं फुक्की छ़डे। तैखन तैना, कुन मैन्हु ते कुन जानबर सब गुलाम बनेइतां, ते लूट पाट केरतां निये, फिरी तैना यरीहोए मां यानी यरदन दरियाएरे बन्ने पुड़, मोआबेरे अराबा मां डेरां केरे नेड़े मूसे ते एलीआजर याजक ते इस्राएली लोकां केरी मेण्डली मां आने।
जंगी करां सेनारी वापसी
तैखन मूसो ते एलीआजर याजक ते मेण्डलरे सारे प्रधान डेरे करां बेइर तैन केरो सुवागत केरनेरे लेई निस्से। ते मूसे जंगी मरां वापस एवरे जंगी सेनापति ते ज़ैना जंग केरतां वापस एवरे थिये क्रोधे सेइं ज़ोने लगे। पन मूसे तैन पुछ़ू, “कुन तुसेईं सब कौन्शां ज़ींती छ़ेडी दित्ती? हेरा, बिलामेरी जाईदाती करां, पोर नंव्वेरी जगारे बारे मां इस्राएली लोक यहोवा करां दूर केरनेरो ज़िरियो इनां कौन्शां बेनोरी थी, ते यहोवारे मेण्डली मां महामारी फैली। एल्हेरेलेइ हुनी बाल बच्चन मरां हर एक्की मट्ठे मैरी छ़डा, ते कौन्शन मरां ज़ै कोई मड़दे सेइं साथी राहोरीए तैस भी मैरी छ़डा। पन ज़ेत्री कुइयां मड़दे सेइं साथी नईं रेवरी तैन सेब्भन तुस अपने लेई रखा। ते तुस लोक सत दिहाड़े डेरन करां बेइर राथ, ते तुसन मरां ज़ेत्रे लोकेईं कोई मैन्हु मारोरेन, या ज़ेत्रे कोन्ची मरोरे लाशन सेइं हुरोरे भोन, फिरी तैना सब अपने-अपने गुलामन समेत ट्लाई दिहाड़े ते सत्तोवं दिहाड़े अपने आपे पापे करां छुटेइतां नियमेरे मुताबिक शुद्ध केरा। ते सब लिगड़न, ते चमड़ेरी बेनोरी सब चीज़ां, ते छ़ेल्लरी ज़ड़ां केरी ते लेकड़री बेनोरी सब चीज़ां नियमेरे मुताबिक शुद्ध केरा।” तैखन एलीआजर याजके सेनारे सिपेहिन सेइं ज़ैना जंग केरनेरे लेई जेवरे थिये तैन सेइं ज़ोवं, “कानूनेरे ज़ैस विधरो हुक्म यहोवाए मूसे दित्तोरो थियो, तै ईहीए: सोन्नू, चाँदी, पितल, टीन, लोहों, ते सीसा, ते ज़ैन किछ अग्गी मां रेइ बटे, तैन सब अग्गी मां छ़डा, ते तैन शुद्ध ठहरेलू; फिरी तैन विधरे मुताबिक पैनी सेइं शुद्ध कियूं गालू, पन ज़ैन किछ अग्गी मां न रेइ बटे, तैन पैनी मां डोबतां कढू गालू। फिरी डेरन करां अलग रानेरे सत्तोवं दिहाड़े अपना लिगड़ां धोइयथ, तैखन तुस शुद्ध ठहरेले, तैसेरां बाद तुस डेरन मां एज्जथ।”
लूटरो माल बन्टनी
फिरी यहोवा मूसे सेइं ज़ोवं, “एलीआजर याजक ते मेण्डलरे सियाना केरे घराना केरे खास-खास मड़द साथी एन्हतां ज़ैना लूट पाट केरतां मैन्हु ते जानबर आनोरेन तैन केरी गिनती केर; फिरी लुटोरे माले दूई हिस्से अक सिपेहिन जो देइयथ, ज़ैना जंग केरने जेवरे थिये, ते होरो हिस्सो मेण्डलरे लोकन जो देइयथ। फिरी ज़ैना सिपाही जंग केरने जेवरे थिये, तैन केरे यहोवारे लेई अलग केरतां कुन मैन्हु कुन बेछ़ी दांत, ते कुन गधे ते कुन भैड्डां छ़ेल्ली, पंच़ शौवन पुड़ अक मेनतां नेइयथ, ते यहोवा कां च़ढ़तल च़ैढ़तां एलीआजर याजके कां देइयथ। फिरी इस्राएली लोकां केरे अध्धे मरां कुन मैन्हु कुन गोरू, ते कुन गधे ते कुन गब्बां, या कोन्ची भी किसमेरो जानबर कि न भोए, पज़ाहन पुड़ अक नेइतां यहोवारे रानेरी रखवाली केरनेबाले लेवी लोकन जो देइयथ।” यहोवारे एस हुक्मेरे मुताबिक ज़ै तैनी मूसे दित्तोरो थू, मूसे ते एलीआजर याजके तैन कियूं।
ते ज़ैना चीज़ां सेनारे मैन्हेइं अपने-अपने लेई लुटोरी थी, तैन करां जादे लूटरो माल ऐह थियो: मतलब, शा लख पचहत्तर हज़ार गब्बां, बहत्तर हज़ार बेछ़ी दांत, इकाहट हज़ार गधे, ते बत्ती हज़ार लोकन कौन्शां ज़ैना कधी मड़दन सेइं साथी नईं झ़ुलोरी। ते तैन अध्धो हिस्सो ज़ैना जंग केरनेरे लेई जेवरे थिये, तैन मां भैड्डां-छ़ेल्ली 337500 थी, ज़ैन मरां 675 भैड्डां-छ़ेल्ली यहोवारी च़ढ़तल च़ाढ़नेरे लेई अलग की। ते गोरू 36000 थियां, ज़ैस मरां 72 यहोवारे लेई अलग रखां। ते गधे 30500 थिये, ज़ैस मरां 61 यहोवारे लेई अलग रखोरे थिये। ते मैन्हु 16000 थिये, ज़ैस मरां 32 मैन्हु यहोवारे लेई अलग रखोरे थिये। ज़ेन्च़रे यहोवारे हुक्मेरे मुताबिक मूसे एलीआजर याजके यहोवारी ई च़ढ़तल दित्ती।
इस्राएली लोकां केरी मेण्डलरो अध्धो हिस्सो, ज़ै मूसे जंग केरनेबाले मैन्हन करां अलग कियोरो थियो। ट्लाई लख सड़े सितेत्ती हज़ार गब्बां, 36000 गोरू, ते 30500 गधे, ते 16000 मैन्हु थिये। इस्राएली लोकां केरे अध्धे हिस्से मरां यहोवारे हुक्मेरे मुताबिक मूसे कुन मैन्हु कुन जानबरन पज़ाहन मरां अक नेइतां यहोवारे रानेरी ठारारी रखवाली केरनेबाले लेवी लोकन जो दित्तो।
तैखन तैना सेनारे अधिकारी ज़ैना सेनारे हज़ारन ते शौवन पुड़ प्रधान ठहरावरे थिये, तैना मूसे कां एइतां ज़ोने लगे, “ज़ैना सिपाही इश्शे अधीन थिये, तैन केरी तेरे नौकरेईं गिनती की, ते तैन मरां अक भी नईं घटोरो। एल्हेरेलेइ झाझ़रां, कड़े, मुंदरां, बैली, कंगन सोन्नेरे ज़ैना गेहने ज़ैस मैल्होरेन, तैन असां यहोवारे सामने अपने प्राणा केरे बदले प्रायश्चित देनेरे लेई असेईं यहोवारे सामने च़ढ़तल केरतां आनोरेन।” तैखन मूसे ते एलीआजर याजके तैन करां तैन सोन्नेरे नक्काशीदार गाने निये। ते सेनारे अधिकारी ज़ैना हज़ारन ते शौवन पुड़ प्रधान थिये तैनेईं ज़ै सोन्नेरी च़ढ़तल यहोवारी हज़ूरी मां आनोरी थी तै 16750 शेकेल थी। (हर एक्की जंगी सिपैहीयेइं अपने-अपने लेई किछ न किछ त लुटतां ज़रूर आनोरू थियूं।) एन सोन्नू मूसे ते एलीआजर याजके सेनारे अधिकारी ज़ैना हज़ारन ते शौवन पुड़ प्रधान थिये तैन करां एन्हतां मिलापे बाले तेम्बु मां पुज़व, कि इस्राएली लोकां केरे लेई यहोवारे सामने याद केरनेबाली यादगार भोइ जेई।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.