Bhadrawahi Bible
गिनती 34
कनान मुल्खेरी सरहद
फिर यहोवा मूसे सेइं ज़ोवं, “इस्राएली लोकन ई हुक्म दे: कि ज़ै मुल्ख तुश्शो हिस्सो भोल्हो तै त च़ेवरे पासन तगर कनान मुल्खे, एल्हेरेलेइ ज़ैखन तुस कनान मुल्खे मां पुज़थ, तैखन तुश्शो दक्षिणी इलाको सीन नंव्वेरे जंगले करां एदोम प्रदेशेरे पासे-पासे भोइतां च़लो गालो, खारे समुन्दरेरे बन्ने करां शुरू भोइतां पश्चिमेरे पासे तगर भोल्हो; तैट्ठां तुश्शी सरहद अक्रब्बीम नंव्वेरी चढ़ाई पुड़ दक्षिणेरे पासन पुज़तां मुड़े, ते सीन तगर एज्जे, ते कादेशबर्ने दक्षिणेरे पासे निस्से, ते हसरद्दार तगर गेइतां अस्मोने तगर पुज़्ज़े; फिरी तै सरहद अस्मोने सेइं घुमतां मिस्रेरे नाले तगर पुज़्ज़े, ते तैन केरो अन्त महा समुन्दरेरो बन्नो भोल्हो।
“फिरी पश्चिमी सरहद महा समुन्दर भोल्ही; तुश्शी पश्चिमी सरहद ईए भोल्ही।
“तुश्शी उत्तरी सरहद ई भोल्ही, मतलब तुस महा समुन्दरे करां होर पहाड़े तगर सरहद बनेइयथ; ते होर पहाड़े करां हमात वैदी तगर सरहद बनेइयथ, ते तै सदादे पुड़ निस्से; फिरी तै सरहद जिप्रोने तगर पुज़्ज़े, ते हसरेनाने पुड़ निस्से; तुश्शी उत्तरी सरहद ईए भोल्ही।
“फिर अपनि पूर्वी सरहद हसरेनाने करां शपामे तगर बनानी; ते तै सरहद शपामे करां रिबला तगर, ज़ै ऐनेरे पूर्वेरे पासे, बुन ओस्ते-ओस्ते किन्नेरेत नंव्वेरे झीलरे पूर्वे सेइं लेगि गाली; ते तै सरहद यरदने तगर ओस्तां खारे समुन्दरेरे बन्ने तगर निस्से। तुश्शे मुल्खेरी च़ेवरे सरहद्दां इना भोल्ही।”
तैखन मूसे इस्राएली लोकन सेइं फिरी ज़ोवं, “ज़ैस मुल्खेरी तुस चिट्ठी छ़ेडतां अधिकारी भोल्हे, ते यहोवा तैस सड़े नौ गोट्लां केरे लोकन देनेरो हुक्म दित्तोरोए, तै ईए आहे; पन रूबेनी ते गादी लोकां केरे गोट्लां केरे मुताबिक तैन अपने-अपने सियाना केरे कुलां केरे मुताबिक अपनो-अपनो हिस्सो मैल्हो, ते मनश्शेरे अध्धे गोट्लेरे लोकन भी अपनो हिस्सो मैल्हो; मतलब तैन ढाई गोट्लन करां लोक यरीहो करां यरदनेरे नेड़े पूर्वेरे पासे, ज़ैड़ी दिहाड़ो डुबते, अपनो-अपनो हिस्सो मैल्हो।”
मुल्खे मां बन्टने बाले प्रधान
फिरी यहोवा मूसे सेइं ज़ोवं, “ज़ैना मड़द तुस लोकां केरे लेई तैस मुल्खे बन्टेले तैन केरां नंव्वां इना आन, एलीआजर याजक ते नूनेरू मट्ठू यहोशू। ते मुल्ख बन्टनेरे लेई अक-अक गोट्लेरो अक-अक प्रधान ठहराने। ते इन मड़दां केरां नंव्वां इन्न यहूदा गोट्ले मरां यपुन्नेरे मट्ठू कालेब, शिमोनेरे गोट्ले मरां अम्मीहूदेरू मट्ठू शमूएल, बिन्यामीन गोट्लेरे मरां किसलोनेरे मट्ठू एलीदाद, दानेरे गोट्ले मरां प्रधान योग्ली एरू मट्ठू बुक्की, यूसुफेरे लोकन मरां मनश्शेरे गोट्लेरो प्रधान एपोदेरू मट्ठू हन्नीएल, ते एप्रैमेरे लोकां केरे गोट्लेरो प्रधान शिप्तानेरू मट्ठू कमूएल, जबूलूनी लोकां केरे गोट्लेरो प्रधान पर्नाकेरू मट्ठू एलीसापान, इस्साकारी लोकां केरे गोट्लेरो प्रधान अज्जानेरे मट्ठू पलतीएल, आशेरी लोकां केरे गोट्लेरो प्रधान शलोमेरू मट्ठू अहीहूद, ते नप्ताली लोकां केरे गोट्लेरो प्रधान अम्मीहूदेरू मट्ठू पदहेल।” ज़ैन मड़दन यहोवा कनान मुल्ख इस्राएली लोकन बन्टनेरो हुक्म दित्तोरो थियो तैना इना आन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.