Bhadrawahi Bible
गिनती 21
कनानी राज़े पुड़ ज़ीत
तैखन अराद नगरेरो कनानी राज़ो, ज़ै दक्षिण मुल्खे मां रहतो थियो, तैनी एन शुनू कि ज़ैस बत्तां तैना भेद घिन्ने बाले एवरेन, तैस बत्तां हुनी इस्राएली एवरेन, ते तै इस्राएली लोकन सेइं लड़ो, ते किछ तैन मरां बन्धी बनाए। तैखन इस्राएली लोकेईं यहोवा कां एन ज़ोइतां मिन्नत मन्नी, “अगर तू सच़्च़े तैन लोकन इश्शे कब्ज़े मां केरस, त असां तैन केरे नगरन पूरे तरीके सेइं नाश केरमेले।” इस्राएलेरी एना गल्लां शुन्तां यहोवा कनानी लोक तैन केरे कब्ज़े मां दित्ते; तैखन तैनेईं तैन केरे नगर बिलकुल तबाह केरी दित्ते; एस वजाई सेइं तैस ठारारू नवं होर्मा 1रख्खू जेवं।
पितलरो बनोरो सप
फिरी तैनेईं होर पहाड़े करां सफर केरतां लाल समुन्दरेरी बत ट्लाती, कि एदोम प्रदेशेरे बेइरमेईं-बेइरमेईं निस्तां गाम, ते लोकां केरो मन बत्तरे वजाई सेइं बड़ो परेशान भोइ जेव। एल्हेरेलेइ तैना परमेशरेरे खलाफ गल्लां केरने लगे, तैना मूसे सेइं एन्च़रे ज़ोने लगे “तुसेईं लोकेईं असां मिस्र मुल्खे मरां जंगले मां मारनेरे लेई किजो आनोरेम? इड़ी न त रोट्टीए, ते न पानी, ते इश्शे प्राण इस निकेम्मी रोट्टी करां तंग भेवरेन।” तैखन यहोवा तैन लोकन मां बड़े ज़ेरे बाले सप भेज़े, ते तैना तैन टक देने लगे, ते बड़े इस्राएली लोक मेरि जे। तैखन लोक मूसे कां गेइतां ज़ोने लगे, “असेईं पाप कियोरोए, कि असेईं यहोवारे ते तेरे खलाफ गल्लां कियोरिन; यहोवा कां प्राथना केर कि तै तैन सप्पन असन करां दूर केरे।” तैखन मूसे तैन केरे लेई प्राथना की। यहोवाए मूसे सेइं ज़ोवं, “एक्की बड़े ज़ेरे बाले सप्पेरी मूरती बनावेइतां खम्भे पुड़ टंग, तैखन ज़ै सप्पेरो खेवरो तैस टंगोरे सप्पे लाहेलो, तै ज़ींतो बच़ेलो।” ते मूसे पितलरो सप बनावेइतां खम्भे पुड़ टंगो, तैखन सप्पेरे खेवरन मरां ज़ैनी-ज़ैनी तै सप लाव, तै ज़ींतो बेंच़ी जेव।
होर पहाड़े करां मोआबेरे पासे सफर
फिरी इस्राएली लोकेईं सफर केरतां ओबोते मां डेरे लाए। फिरी तैनेईं ओबोतेरां सफर केरतां अबारीमे मां डेरे लाए, ज़ैन पूर्वेरे पासे मोआबेरे सामने जंगले मां आहे। तैट्ठां सफर केरतां तैनेईं जेरेद नंव्वेरे नाले मां डेरे लाए। फिरी तैट्ठां सफर केरतां तैनेईं अर्नोन दरिया, ज़ै जंगले मां बगते, ते ज़ै एमोरी लोकां केरे मुल्खे मरां निस्ते, तैसेरे होरी पासे डेरे खड़े किये; किजोकि अर्नोन मोआबी ते एमोरी लोकन मांमेइं भोइतां मोआब मुल्खेरी सरहद रहतीए। एस्से वजाई सेइं यहोवारी जंगां नव्वेंरी किताबी मां लिखेरूए,
“सूपा मां वाहेब,
ते अर्नोनेरी वादी,
ते तैन वैदी केरू ढलान ज़ैन आर नंव्वेरे नगरे पासे,
कने ज़ै मोआबेरी सरहद्दी पुड़े।”
फिरी तैना तैट्ठां सफर केरतां बैर नंव्वेरे जगाई तगर जे; तैड़ी तैन्ने खुहे, ज़ेसेरे बारे मां यहोवाए मूसे सेइं ज़ोवरू थियूं, “तैन लोकन अकोट्ठे केर, ते अवं तैन पानी देलो।” तैस मौके इस्राएले एन गीत ज़ोवं,
“हे खुहां निस्सी एई, तैस खुहेरे बारे मां गीतां ज़ोथ!
ज़ैन हाकिमेईं घड़ू,
ते इस्राएलेरे रईसेइं एपनी सोटी ते लैठन सेइं घड़ू।”
फिरी तैना जंगले मां मत्ताना जो जे,
ते मत्तानारां नहलीएले जो जे, ते नहलीएलेरां बामोते जो जे, ते बामोतेरां सफर केरतां तैस तरैई तगर, ज़ै मोआबेरे मैइदाने मांए, ते पिसगारी तैस च़ोटी तगर भी ज़ै याशीमोनेरे पासे झुकोरोए, पुज़्ज़ी जे।
एमोरी लोकां केरे राज़े सीहोने पुड़ ज़ीत
तैखन इस्राएले एमोरी लोकां केरे राज़े सीहोने कां दूत भेज़तां ऐह समाद भेज़ो, “असन अपने मुल्खे मांमेइं निस्तां गाने दे; असां मुड़तां कोन्ची उडारे मांमेइं या दाछ़री बागी मांमेइं न गामेले; ते न कोन्ची खुहेरू पानी पीमेले; ते ज़ांतगर तेरे मुल्खे करां बेइर न गामेले, तांतगर सड़कां-सड़कां च़लमेले।” फिरी भी सीहोन राज़े इस्राएली लोक अपने मुल्खे मांमेइं निस्तां गाने न दित्ते; बल्के अपनि सारी सेना अकोट्ठी केरतां इस्राएले सेइं मुकाबलो केरनेरे लेई जंगले मां निस्सी जेव, ते यहसे मां एइतां तैन सेइं लड़ो। तैखन इस्राएली लोकेईं तै तलवारी सेइं मैरी दित्तो, ते अर्नोनेरां देइतां यब्बोक दरियाए तगर, ज़ै अम्मोनी लोकां केरी सरहद थी, तैसेरे मुल्खेरे अधिकारी भोइ जे; अम्मोनी लोकां केरी सरहद त बड़ी मज़बूत थी। एल्हेरेलेइ इस्राएली लोकेईं एमोरी लोकां केरे सारे नगर नीए, ते तैन मां, मतलब हेशबोन ते तैसेरे आसे पासेरे नगरन मां राने लगे। हेशबोन एमोरी लोकां केरे राज़े सीहोनेरो नगर थियो; तैनी मोआबे पेत्रीएं राज़े सेइं लेड़तां तैसेरो सारो मुल्ख अर्नोने तगर तैसेरे हथ्थेरां थसोड़ो। एस्से वजाई सेइं डुग्घी गल ज़ोनेबाले ज़ोतन,
“हेशबोने मां एज्जा,
सीहोन नगरे मां बस्से ते मज़बूत किये जे।
किजोकि हेशबोनेरां अग,
सीहोन नगरेरां लौ निस्सी;
ज़ैस सेइं मोआब मुल्खेरो आर नगर,
ते अर्नोनेरी उच्ची ठारां केरे राज़ केरनेबाले भस्म भोए।
हे मोआब, तीं पुड़ अफ़सोस!
कमोश देबतेरे लोक नाश भोए,
तैनी अपना मट्ठां नश्शने बालां,
ते एपनी कुइयां एमोरी राज़े सीहोनेरी दैसी बनेई।
पन असेईं तैना बुछ़ोड़ोरेन,
हेशबोन, दीबोने तगर नाश कियोरोए,
ते असेईं नोपह ते मेदबा तगर भी उज़ाड़ेरुए।”2
एस्से वजाई सेइं इस्राएली लोक एमोरी लोकां केरे मुल्खे मां राने लगे। तैखन मूसे याजेर नगरेरो भेद घिन्नेरे लेई भेज़े, ते तैनेईं तैसेरां ड्लाव्वां नियां, ते तैट्ठेरे रानेबाले एमोरी लोक तैस मुल्खे मरां केढी दित्ते।
बाशानेरे राज़े ओगे पुड़ ज़ीत
तैखन तैना मुड़तां बाशानेरे बत्तां गाने लगे; ते बाशानेरे राज़े ओगे तैन केरो मुकाबलो कियो, तै लड़नेरे लेई अपनि सारी सेनाई समेत एद्रेई मां निस्सी अव। तैखन यहोवाए मूसे सेइं ज़ोवं, “तैस करां न डेरां; किजोकि अवं तैसेरी सारी सेना ते मुल्खे समेत तेरे हथ्थे मां देताईं; ते ज़ेन्च़रे तीं एमोरी लोकां केरे राज़े हेशबोनेरे सीहोने सेइं सलूख कियोरोए, तेरहो एस सेइं भी केरां।” तैखन तैनेईं तै ते तैसेरां मट्ठां ते सारे लोक एड़ी तगर मारे कि तैसेरो कोई भी न बच़ो, ते तैना तैस मुल्खेरे अधिकारी भोइ जे।
Source notes (2)
- Footnote होर्मा मतलब पूरू नाश
- Footnote उज़ाड़ेरुए या असेईं तैना लोक नाश किये
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.