Bhadrawahi Bible
गिनती 22
बिलाम ते मोआबेरो राज़ो बालाक
तैखन इस्राएली लोकेईं सफर केरतां यरीहो नगरे मांमेइं यरदन दरियाएरे उस पार मोआबेरे अराबा मां अपने डेरे खड़े किये।
ते सिप्पोरेरे मट्ठे बालाके हेरू कि इस्राएली लोकेईं एमोरी लोकन सेइं कुन कियोरूए। एल्हेरेलेइ मोआबे एन बुझ़तां, कि इस्राएली लोक त जादेन, तैन लोकन करां अकदम डेरि जेव, एड़ी तगर कि मोआब इस्राएली लोकां केरी वजाई सेइं बड़ो डेरि जेव। तैखन मोआबी लोकेईं मिद्यानी बुज़ुर्गन सेइं ज़ोवं, “हुनी तै दल इश्शे च़ेवरे पासन सेब्भी लोकन चट केरि गालो, ज़ेन्च़रे दांत उडारेरे नीले घासे चट केरतां छ़डते।” तैस वक्ते सिप्पोरेरू मट्ठू बालाक मोआबेरो राज़ो थियो; ते तैनी पतोर नगरेरे फरात दरियारे बन्ने पुड़ बोरेरे मट्ठे बिलामेरी कौमरे ढ्लां केरी भी ज़मीन थी, तैड़ी बिलामे कां दूत भेज़े, कि तैना एन ज़ोइतां तैस कुजेइतां आन्न, “शुन अक दल मिस्र मुल्खे मरां एवरोए, ते ज़मीन तैन सेइं भेरोई जेवरीए, ते हुनी तैना मेरे सामने एइतां बेस्सी जेवरेन। एल्हेरेलेइ हुनी तू एई, ते एन लोकन मेरे लेई लानत दे, किजोकि तैना मीं करां बड़े ताकतबरन, ते फिरी एन भोइ सखेलू कि अस तैन अपने मुल्खे मरां मैरतां केढी देमेले; किजोकि इन त अवं ज़ानताईं, कि ज़ैस तू बरकत देतस, तै धनी भोते, ते ज़ैस तू लानत देतस तै लानती भोते।”
तैखन मोआबी ते मिद्यानी बुज़ुर्ग लोक लातन देनेरी दक्षिणा घिन्तां च़ले जे, ते बिलामे कां पुज़तां बालाकेरी ज़ोवरी गल्लां शुनेई। तैनी तैन सेइं ज़ोवं, “अज़ राती तुस इड़ी बिश्शा, ते ज़ै गल यहोवा मीं सेइं ज़ोलो, तैसेरे मुताबिक अवं तुसन जुवाब देलो।” तैखन मोआबेरे हाकिम बिलामेरे कां बिश्शे। तैखन परमेशरे बिलामे कां एइतां पुछ़ू, “तेरे कां एना मड़द कौन आन?” बिलामे परमेशरे सेइं ज़ोवं, “सिप्पोरे मट्ठे मोआबेरे राज़े बालाके मीं कां ऐह समाद भेज़ोरोए, ‘शुन, ज़ै दल मिस्र मुल्खेरां निस्तां एवरोए, तैन सेइं ज़मीन भेरोई जेवरीए, एल्हेरेलेइ तू एइतां मेरे लेई तैन लानत दे; भोइ सकते कि अवं तैन सेइं लड़ाई केरतां आरामे सेइं इट्ठां केढी सकी।’” परमेशरे बिलामे सेइं ज़ोवं, “तू एन सेइं साथी न गेइयां; तैन लोकन लानत न देइयां, किजोकि तैना बरकतरे हिस्सेदार भेवरेन।” होरसां झ़ेझ़ां बिलामे खड़े उठतां बालाकेरे हाकिमन सेइं ज़ोवं, “तुस अपने मुल्खे जो च़ले गाथ; किजोकि यहोवा मीं तुसन सेइं साथी गानेरे लेई हुक्म नईं दित्तोरो।” तैखन मोआबी हाकिम च़ले जे, ते बालाके कां गेइतां ज़ोवं, “बिलामे असन सेइं साथी एजनेरे लेई इन्कार कियोरोए।”
तैसेरे बाद फिरी बालाके होरे हाकिम भेज़े, ज़ैना पेइलन करां जादे मुशूर ते गिनती मां भी हछ्छे थिये। तैनेईं बिलामे कां एइतां ज़ोवं, “सिप्पोरेरू मट्ठू बालाक एन ज़ोते, ‘कि मीं कां एजनेरे लेई कोन्ची भी वजाई सेइं इन्कार न केर; किजोकि अवं सच़्च़े तेरी बड़ी इज़्ज़त केरेलो, ते ज़ैन किछ तू मीं सेइं ज़ोलो, अवं तैन्ने केरेलो, एल्हेरेलेइ तू एई, ते तैन लोकन मेरे लेई लानत दे।’” बिलामे बालाकेरे बिस्तार देनेबालन जुवाब दित्तो, “चाहे बालाक अपनु घर सोन्ने चैंदी सेइं भेरतां मीं दे, तांभी अवं अपने परमेशर यहोवारे हुक्मे बेदली न सेखी, या तैस घटेइतां या बधेइतां मेन्नी। एल्हेरेलेइ अज़ राती तुस लोक इड़ी बिश्शोरे राथ, ताके अवं ज़ैनी कि यहोवा मीं सेइं कुन ज़ोते।” ते परमेशरे राती बिलामे कां एइतां ज़ोवं, “अगर तैना मड़द तीं कुजाने एवरेन, त तू तैन सेइं साथी गा; पन ज़ै गल अवं तीं सेइं ज़ोलो तैसेरे मुताबिक तू केरां।”
बिलाम ते तैसेरी गधी
तैखन बिलाम झ़ेझ़ां खड़ो उठ्ठो, ते एपनी गेधी पुड़ ज़ीन केस्तां मोआबी हाकिमन सेइं साथी च़लो जेव। तैसेरे गानेरे वजाई सेइं परमेशरेरो क्रोध भेड़की जेव, ते यहोवारो दूत तैसेरी खलाफत केरनेरे लेई तैसेरी बत रोकतां खड़ो भोइ जेव। तै त एपनी गेधी पुड़ सुवार भोइतां च़लोरो थियो, ते तैस सेइं साथी तैसेरे दूई सेवक भी थिये। तैखन तैस गेधां यहोवारो दूत हथ्थे मां नग्गी तलवार ट्लेइतां बत्ती मां खड़ो लाव, तैखन गधी अपनि बत छ़ेडतां उडारे मां च़ली जेई, तैखन बिलामे गधी खूब झ़ुस्सी, कि तै फिरी बत्ती मां एज्जे। तैखन यहोवारो दूत दाछ़री बागरी गेली मां ज़ेसेरे च़ेवरे पासन दिवार थी खड़ो भोइ जेव। यहोवारो दूत लेइतां गधी दिवारी सेइं एरी चिपकी कि बिलामेरो पव दिवारी सेइं खूब घूड़ोव, तैखन तैनी तै गधी फिरी झ़ुस्सी। तैखन यहोवारो दूत अग्गर गेइतां एक्की सुन्कड़ी बत्ती पुड़ खड़ो भोव, ज़ैड़ी न त देइने पासे गानेरे लेई जगाह थी न बांए पासे। तैड़ी यहोवारो दूत लेइतां गधी बिलामे सने बिश्शी जेई; फिरी त बिलामे मना जादे सरक अई, ते तैनी गधी फिरी सोटी सेइं खूब झ़ुस्सी। तैखन यहोवाए गेधरी ज़बान खोल्ली, ते तै बिलामे सेइं ज़ोने लगी, “मीं तेरू कुन बिगाड़ेरूए, ज़ै तीं अवं ट्लेइ फेरेईं एत्री झ़ुस्सी?” बिलामे गेधी सेइं ज़ोवं, “तीं अवं बेवकूफ बनेवरोइं, अगर मेरे हथ्थे मां तलवार भोथी त तू मीं हुन्ना मारनी थी।” गधी बिलामे सेइं ज़ोने लगी, “कुन अवं तेरी तैए गधी नईं, ज़ैस पुड़ तू अज़ तगर सुवारी केरतो एवरोस? कुन अवं तीं सेइं कधी एरू केरती थी?” तैनी ज़ोवं, “नईं।” तैखन यहोवाए बिलामेरी एछ़्छ़ी खोल्ली, तैखन तैनी यहोवारो दूत हथ्थे मां नग्गी तलवार ट्लेइतां खड़ो लाव; तैखन तै झुकी जेव, ते तुत्तरेरे भारे तल्ले मां झुकतां मिन्नत लगो मगने। यहोवारे दूते तैस सेइं ज़ोवं, “तीं अपनि गधी ट्लेइ फेरेईं किजो झ़ुस्सी? शुन, तेरी खलाफत केरने अव्वें एवरोईं, किजोकि तेरी चाल मेरी नज़री मां ठीक नईं। ते ऐह गधी मीं लेइतां ट्लाई बार मेरे सामनेरां हेटी जेई। अगर तै मेरे सामनेरां हेटी न गाथी, त मीं तू ज़रूर मारोरो भोथो, पन तै ज़ींती रखनी थी।” तैखन बिलामे यहोवारे दूते सेइं ज़ोवं, “मीं पाप कियोरोए; मीं न थियो पतो कि तू मेरो सामनो केरनेरे लेई बत्ती मां खड़ोस, एल्हेरेलेइ हुनी अगर तीं बुरू लगोरूए त अवं वापस च़लो गाताईं।” यहोवारे दूते बिलामे सेइं ज़ोवं, “एन मड़दन सेइं साथी तू च़लो गा; पन तैए गल ज़ोइयां ज़ै अवं तीं सेइं ज़ोलो” तैखन बिलाम बालाकेरे हाकिमन सेइं साथी च़लो जेव।
एन शुन्तां कि बिलाम एज्जी राहोरोए, बालाक तैस सेइं मुलाकात केरनेरे लेई मोआबेरे तैस नगरे तगर ज़ै तैस मुल्खेरे अर्नोन बालेरी सरहद्दी पुड़े, तैड़ी तगर जेव। बालाके बिलामे सेइं ज़ोवं, “कुन मीं बेड़ि उमीदी सेइं तींजो समाद न थियो भेज़ोरो? फिरी तू मीं कां किजो न अव? कुन अवं सच़्च़े तेरी उजर्त देनेरे काबल न थियो?” बिलामे बालाके सेइं ज़ोवं, “हेर, अवं तीं कां एवरो त आईं! पन हुनी कुन अवं अपने इच्छाई सेइं किछ केरी सकताईं? मीं तैन्ने ज़ोनूए ज़ैन परमेशर मेरे ऐशी मां छ़डेलो।” तैखन बिलाम बालाके सेइं साथी-साथी च़लो, ते तैना किर्यथूसोते तगर आए। ते बालाके दांत ते भैड्डां-छ़ेल्ली केरी बलि दित्ती, ते बिलाम ते तैसेरे सैथी केरे हाकिमन कां भेज़े। झ़ेझ़ां बालाक बिलामे बाल देबतेरे उच्ची ठैरी1 घिन्तां जेव, ते तैट्ठां तैस सारे इस्राएली लोक लेइहोने लगे।
Source notes (1)
- Footnote उच्ची ठैरी बमोत बाल नगरेरी उच्ची ठारां
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.