Bhadrawahi Bible
गिनती 20
मिर्यामरी मौत
पेइले महीने मां सारे इस्राएली लोकां केरी मेण्डलरे लोक सीन नव्वेंरे सुनसान ठैरी मां पुज़्ज़े, ते कादेश नगरे मां राने लगे, तैड़ी मिर्याम मेरि जेई, ते तैड़ी तै दब्बी जेई।
मूसेरो ते हारूनेरो पाप
तैड़ी मेण्डलरे लोकां केरे लेई पानी न मैल्हू; एल्हेरेलेइ तैना मूसे ते हारूनेरे खलाफ अकोट्ठे भोए। ते लोक एन ज़ोइतां मूसे सेइं बेंस केरतां ज़ोने लगे, “रोड़ू भोथू कि असां तैखने मुओरे भोथे, ज़ैखन इश्शे साथी ढ्ला यहोवारे सामने मेरि जेवरे थिये। ते तुसेईं यहोवारी मण्डली इस जंगले मां किजो आनोरीए, कि अस अपने जानबरन समेत इड़ी मेरि गाम? ते तीं असां मिस्र मुल्खे मरां किजो केढतां इस बुरी ठारी पुड़ आनोरेम? इड़ी त अन्न, या फैगू, या दाछ़री बाग, या अनार, किछ भी नईं, इड़ी तगर कि पीने जो पानी भी नईं।” तैखन मूसो ते हारून मेण्डलरे सामनेरां मिलापे बाले तेम्बेरे दारे पुड़ गेइतां तुत्तरेरे भारे तल्ले झुके। ते यहोवारी लौ तैनेईं लाही। तैखन यहोवाए मूसे सेइं ज़ोवं, “तै सोटी ने, ते तू अपने ढ्लाए हारूने समेत सारी मण्डली अकोट्ठी केरतां तैन केरे सामने तैस चट्टानी सेइं गल्लां केर, तैखन तै चट्टान अपनु पानी देली, एस तरीके सेइं तू चट्टानी मरां तैन केरे लेई पानी केढतां मेण्डलरे लोकां केरे लेई ते तैन केरे जानबरन पीया।” यहोवारे एस हुक्मेरे मुताबिक मूसे तैन केरे सामने तै सोटी नी।
फिरी मूसे ते हारूने मेण्डलरे सारे लोक चट्टानरे सामने अकोट्ठे किये, तैखन मूसे तैन लोकन सेइं ज़ोवं, “हे खलाफत केरने बालाव, शुना; कुन असेईं इस चट्टानी मरां तुश्शे लेई पीने जो पानी कढनूए?” तैखन मूसे हथ खड़ो केरतां सोटी सेइं चट्टानी पुड़ दूई फेरेईं बाई; तैखन तैस मरां खूब पानी बगने लगू, ते मेण्डलरे सारे लोक ते जानबर तैस पैनी पीने लगे। पन यहोवा मूसे ते हारूने सेइं ज़ोवं, “तुसेईं ज़ै मीं पुड़ विश्वास न कियो, ते अवं इस्राएली लोकां केरी नज़री मां पवित्र न ठहराव, एल्हेरेलेइ तुस इस मेण्डलरे लोकन तैस मुल्खे मां न पुज़ेई बटेले, ज़ै मीं तैन देनेरो वाधो कियोरो थियो।” तैस नागेरू नवं मरीबा 1पेवं, किजोकि इस्राएली लोकेईं यहोवा परमेशरे सेइं झगड़ो कियोरो थियो, ते तै तैन मां पवित्र ठहराव जेव।
एदोमी लोक बत न देन
फिरी मूसे कादेशेरां एदोमेरे राज़े कां बिस्तार देनेबाले दूत भेज़े, “तेरो ढ्ला इस्राएल इन ज़ोते, कि असन पुड़ ज़ै-ज़ै मुसीबत एवरीए, तै तू ज़ानतो भोल्हो; मतलब इन कि इश्शे सियाने लोक मिस्रे मुल्खे मां जेवरे थिये, ते असां मिस्र मुल्खे मां बड़े दिहाड़े राए, ते मिस्री लोकेईं इश्शे सियाने लोकन सेइं ते असन सेइं भी बड़ो बुरो बर्ताव कियो; पन ज़ैखन असेईं यहोवा कां फरियाद की तैखन तैनी इश्शी फरियाद शुनी, ते अक दूत भेज़तां असां मिस्र मुल्खे मरां केढतां आने, एल्हेरेलेइ हुन्ना असां कादेश नगरे मां अहम, ज़ै तेरी सरहद्दी पुड़ आहे। ते असन अपने मुल्खे मांमेइं भोइतां गाने दे, असां कोन्ची उडारे मांमेइं या दाछ़री बागी मांमेइं न च़लमेले, ते खुहां केरू पानी भी न पीमेले; सड़कां-सड़कां निस्तां च़ले गामेले, ते ज़ांतगर तेरे मुल्खे मरां बेइर न पुज़मेले, तांतगर देइने या बांए न मुड़मेले।” पन एदोमी लोकां केरे राज़े तैन जो समाद भेज़ो, “तू मेरे मुल्खे मांमेइं निस्तां न गा, ते अगर तुसेईं गानेरी कोशिश की त अवं तलवार ट्लेइतां तेरो मुकाबलो केरनेरे लेई निसेलो।” इस्राएली लोकेईं जुवाब देइतां तैस कां फिरी समाद भेज़ो, “असां सड़कां-सड़कां निस्तां च़ले गामेले, ते अगर अस ते इश्शे जानबर तेरू पानी पीले, त असां तैसेरी कीमत देमेले, असन होरू किछ नईं, सिर्फ पांवेइं सेइं च़ेलतां निसने दे।” पन राज़े जुवाब दित्तो, “तू एज्जी न सकेलो” ते एदोम बड़ी सेना नेइतां बेड़ि ताकती सेइं तैसेरो मुकाबलो केरनेरे लेई निस्सो। एस तरीके सेइं एदोमेरे राज़े, इस्राएली लोक अपने मुल्खे मांमेइं निस्तां गांनेरे लेई इन्कार कियो, एल्हेरेलेइ इस्राएली लोक तैस बत्तां गाने करां मुड़ी जे।
हारूनेरी मौत
तैखन इस्राएली लोकां केरी सारी मण्डली कादेश नव्वेंरी ठारां सफर केरतां होर नंव्वेरे पहाड़े पुड़ आए। ते एदोम प्रदेशेरी सरहद्दी पुड़ होर पहाड़े पुड़ यहोवाए मूसे ते हारूने सेइं ज़ोवं, “हारून अपने लोकन मां मिली गालो; किजोकि तुसेईं दूईयेईं ज़ै मरीबा नंव्वेरे नागे पुड़ मेरू ज़ोनू न मेनतां मेरी खलाफत कियोरीए, एस्से वजाई सेइं तुस तैस मुल्खे मां न गेई बटेले, ज़ै मीं इस्राएली लोकन दित्तोरोए। एल्हेरेलेइ तू हारूने ते तैसेरे मट्ठे एलीआजरे होर पहाड़े पुड़ ने; ते हारूनेरां लिगड़ां खोलेइतां तैसेरे मट्ठे एलीआजरे लुआ, किजोकि तैखन हारून मेरतां अपने लोकन मां मिली गालो।” यहोवारे एस हुक्मेरे मुताबिक मूसे तैन्ने कियूं, तै सैरी मेण्डलरे सामने होर पहाड़े पुड़ जो च़लो जेव। तैखन मूसे हारूनेरां लिगड़ां खोलेइतां तैसेरे मट्ठे एलीआजरे लुआं, ते हारून तैड़ी पहाड़ेरी च़ोटी पुड़ मेरि जेव, तैखन मूसे ते एलीआजरे हारून छ़ुइतां पहाड़े पुड़ेरां उन्ढो आनो। ते ज़ैखन इस्राएली लोकां केरी सैरी मेण्डलरे लोकेईं लावं कि हारून मेरि जेवरोए, तैखन इस्राएलेरे सारे घराना केरे लोक तैसेरेलेइ 30 दिहाड़न तगर लेरां देंते ते मातम केरते राए।
Source notes (1)
- Footnote मरीबा मतलब शिकायत या बेंस केनि
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.