Bhadrawahi Bible
नहेम्याह 6
नहेम्याहरे खलाफ साज़िश
ज़ैखन सम्बल्लत, तोबियाह ते अरबी गेशेम ते इश्शे बाकी दुश्मन्न ई पतो लग्गो, कि मीं शहरपनाहरी मरम्मत की। ते हेजू तगर भी मीं फाटकन मां पल्ले न थी लेवरे, त फिरी भी शहरपनाही कोई दर्ज़ न थी रेवरी। तैखन सम्बल्लत ते गेशेमे मींजो ई समाद भेज़ो, “एई, असां ओनोरे मैइदाने मां कोन्ची ड्लाव्वें मां मुलाकात केरम।” पन तैना मेरो नुकसान केरनो चाते थिये। पन मीं तैन कांजो मैन्हु केरे ज़िरिये ई समाद भेज़ो, “अवं त एक्की ज़रूरी कम्मे मां लगोरोइं, अवं तैड़ी न एज्जी सेखी। अवं तैन कम शैरतां तुसन कां एज्जी ते तैन कम किजो बन्द राए?” फिरी तैनेईं मीं कांजो च़ेवर बार एस गल्लरो समाद भेज़ो, ते मीं तैन तैए जुवाब दित्तो। फिरी पंच़ोंव फेरे सम्बल्लते अपने सेवके कां बगैर मोर लेइतां चिट्ठी मीं कां भेज़ी, तैस मां एन लिखोरू थियूं, “कौमां-कौमां केरे लोकन मां एन ज़ोतन, ते गेशेम भी एन ज़ोते, कि तू ते यहूदी बगावत केरनी चातथ, ते एस वजाई सेइं तू तैस शहरपनाही बनावातस। ते तू एन गल्लां केरे मुताबिक तैन केरो राज़ो बन्नो चातस। ते तीं यरूशलेम नगरे मां नबी ठहरावरेन, ज़ैना एन ज़ोइतां तेरे बारे मां प्रचार केरन, कि यहूदी लोकन मां अक राज़ोए। ते हुनी ऐह खबर अर्तक्षत्र राज़े दित्ती गाली। ते हुनी एई, असां एप्पु मांमेइं इस बारे मां गलबात केरम।” तैखन मीं तैस जो समाद भेज़ो, “ज़ैन तू ज़ोतस, तैन त किछ भी नईं भोवरू, तू एना गल्लां अपने मने सेइं बनातस।” तैना सब लोक एन सोचतां असन डराने चाते थिये, कि “तैन केरे हथ ढिल्ले भोइ गान ते कम बन्द भोइ गाए।” पन मीं प्राथना की हे मेरे परमेशर तू मीं हिम्मत दे।
फिरी अवं शमायाहेरे घरे जेव, ज़ैन दलायाहेरू मट्ठू ते महेतबेलेरू पोट्लड़ू थियूं, तै त बन्द घरे मां थियो। तैनी ज़ोवं, “एई असां परमेशरेरे भवने मां मतलब मन्दरे मां मुलाकात केरम, ते भवनेरू दार बन्द केरम। किजोकि तैना लोक तीं राती मारने एज्जेले।” पन मीं ज़ोवं, “कुन मेरो ज़ेरो मैन्हु नश्शे? या मेरो ज़ेरो मैन्हु मन्दरे मां जान बच़ानेरे लेई छ़ेपतां बिश्शे? अवं न गेइलो।” फिरी मीं समझ़ू कि तै परमेशरेरो भेज़ोरो नईं पन तैनी हर गल परमेशरेरे वचन ज़ोइतां मेरे नुक्सानेरे लेई ज़ोई, किजोकि तोबियाह ते सम्बल्लते तै रिश्पत देइतां भेज़ोरो थियो। तैनेईं तैस एस वजाई सेइं रिश्पत दित्तोरे थिये कि अवं डेरि गेईं, ते तैन कम केरतां अवं पापी बेनि, ते तैन्न दोष लानेरो मौको मैल्हे ते मेरी बदनामी केरि सखन। मीं प्राथना की, हे मेरा परमेशर! तोबियाह सम्बल्लत, ते नोअद्याह नबिया ते बाकी होरे नबी मीं डराने चाते थिये, तैन सेभी केरे एरे ज़ेरे कम्मां केरि खबर रख।
मरम्मत केरनेरू कम पूरू भोनू
एलूल1 महीनेरे पंजियों दिहाड़े मतलब 52 दिहाड़न मां शहरपनाहरी मरम्मत भोइ जेई। ज़ैखन इश्शे सेभी दुश्मनेईं एन शुनू, तैखन इश्शे च़ेवरे पासन रानेबाले गैर कौमां केरे लोक डेरि जे, ते बड़े शरमिन्दा भोइ जे। किजोकि तैनेईं समझ़ू कि एन कम इश्शे परमेशरेरी तरफां भोवरूए। तैन दिहाड़न मां भी यहूदी रईस ते तोबियाहेरे दरमियाने मां चिट्ठी एंइती गैती रैती थी। किजोकि तोबियाह आरहेरे मट्ठे शकन्याहेरो ज़माई थियो, ते तैसेरे मट्ठे यहोहानाने बेरेक्याहेरे मट्ठे मशुल्लामेरी कुइये सेइं ड्लाह बनेवरो थियो। एल्हेरेलेइ बड़े यहूदी लोकेईं तैसेरे पासेरे भोनेरी कसम खेवरी थी। लोक मेरे सामने तैसेरे रोड़े कम्मां केरो ज़िक्र केरते थिये, ते ज़ैन किछ अवं ज़ोतो थियो, गेइतां तैस सेइं ज़ोते थिये, तोबियाह मीं डरानेरे लेई चिट्ठी भेज़तो रहतो थियो।
Source notes (1)
- Footnote एलूल बाबेलेरो महीनो
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.