Bhadrawahi Bible
नहेम्याह 5
गरीबन पुड़ ज़ुलम
तैखन किछ लोक ते तैन केरि कौन्शां ते तैन केरे भियाल यहूदी केरे खलाफ बड़ी शिकायत भोइ। किछ लोक त ज़ोते थिये, “असां अपने मट्ठन-कुइयन समेत बड़े लोकम, एल्हेरेलेइ असन अन्न मैल्होरू लोड़ते कि असां खेइतां ज़ींते रहम।” किछ लोक त ज़ोते थिये, “असां अपना-अपना ऊडारां ते दाछ़री बागां ते घरां काल पेनेरे वजाई सेइं बन्धे रखतम, कि असन अन्न मैल्हे।” फिरी किछ लोक त इन ज़ोते थिये, “कि असेईं राज़े जो लगान देनेरे लेई अपना-अपना ऊडारां ते दाछ़री बागां देइतां ओधार रुपेइयो आने। पन इश्शो ते इश्शे भियालां केरि जान ते इश्शे ते तैन केरे बच्चे अक्कां ज़ेरे आन, त फिर भी असां अपना मट्ठां कुइयां गुलाम बनातम। बल्के किछ कुइयां भी गुलाम भोइ जेवरिन। ते इश्शो कोई ज़ोर न च़ले, किजोकि इश्शां ऊडारां ते इश्शी दाछ़री बागां होरि केरे कब्ज़े मां च़ेलि जेवरिन।”
ऐह शिकायत ते एना गल्लां शुन्तां मीं बड़ो क्रोध अव। तैखन मीं अपने मने मां सोच विचार केरतां मीं रईसन ते हाकिमन झ़िड़कतां ज़ोवं, “तुसां अपने-अपने भियालन करां सूत नेतथ।” तैखन मीं तैन केरे खलाफ अक बड़ी सभा रखी। ते मीं तैन सेइं ज़ोवं, “असेईं त एपनी ताकती सेइं अपने यहूदी ढ्ला ज़ैना गैर कौमन मां बिकी जेवरे थिये, कीमत देइतां छुटेवरन, फिरी कुन तुसां अपने भियालन बेच़ेले? कुन तैना इश्शे हथ्थे बिकेले?” तैखन तैना च़ुप राए ते अपने बचावेरे लेई किछ न ज़ोई बटे। फिरी अवं ज़ोतो जेव, “ज़ैन कम तुसां केरतथ तैन ठीक नईं। कुन तुसन एस वजाई सेइं इश्शे परमेशरेरो डर मेनतां च़लेरू न लोड़े कि इश्शे दुश्मन ज़ैना गैर कौमां केरे आन, तैना असन बदनाम न केरेले? अवं ते मेरे भियाल तेरे सेवक तैन रुपेइये ते अन्न ओधार देतम, पन अस इसेरू सूत शारम। अज़्ज़े तैन केरां ऊडारां, ते दाछ़री बागां, ते ज़ैतूनेरी बागां ते घरां वापस देथ। ते ज़ैना रुपेइये, अन्न, ते नंव्वो दाछ़रो रस, ते तेल तुस तैन करां आनतथ, तैस वापस देथ?” तैनेईं ज़ोवं, “असां तैन वापस देमेले, ते तैन करां किछ न नेमेले। ज़ेन्च़रे तू ज़ोतस, तेन्च़रे असां केरमेले।” तैखन मीं याजक कुजेइतां तैन लोकन कसम दित्ती, कि तैना तैस वाधेरे मुताबिक केरन। फिरी मीं अपना लिगड़ेरो अक कूनो ठुड़कतां ज़ोवं, “एस तरीके सेइं ज़ै ऐह वाधो पूरे न केरे, तैस परमेशर ठुड़कतां, तैसेरू घर ते तैसेरी कमाई तैस करां छुटाए, ते एन्च़रे सेइं तै ठुड़को गाए, ते कंगाल भोइ गाए।” तैखन सैरी सभारे लोक ज़ोने लगे, “आमीन!” ते यहोवारी तारीफ़ की। ते लोकेईं एस वाधेरे मुताबिक कम कियूं।
नहेम्याहरी सेवा
फिरी ज़ैखनेरो देंतो अवं यहूदा प्रदेशेरो हाकिम ठहराव जेव, राज़े अर्तक्षत्रेरे राज़ केरनेरे बिहोवं साले करां लेइतां बेत्रीयोवं साले तगर, मतलब 12 सालन तगर मीं ते मेरे भियाल हाकिमां केरे हक्केरी रोट्टी नईं खेवरी। पन ज़ैना हाकिम मीं करां पेइले थिये, तैना लोकन पुड़ भार छ़डते थिये, ते तैन करां रोट्टी ते दाछ़रो रस, ते तैन करां 40 शेकेल 1चाँदी आनते थिये, बल्के तैन केरे सेवक भी तैन पुड़ अधिकार रखते थिये। पन अवं एन न थियो केरतो, किजोकि अवं यहोवारो डर मनतो थियो। फिरी अवं शहरपनाहरे कम्मे मां लग्गोरो राव, ते असेईं कोई ज़मीन न घिन्नी। ते मेरे सारे सेवक कम केरनेरे लेई इड़ी अकोट्ठे रहते थिये। फिरी मेरे मेज़े पुड़ रोट्टी खानेबाले 150 यहूदी ते हाकिम ते तैना भी थिये, ज़ैना च़ेवरे पासां केरे गैर कौमन मरां असन कां एवरे थिये। ज़ै रोट्टी रोज़ेरे लेई तियार भोती थी तैस मां अक दांत, शा रोड़ी-रोड़ी भैड्डां ते छ़ेल्ली थी, ते मेरे लेई च़ुड़ोलू केरू मास भी तियार केरते थिये। ते दश-दश दिहाड़ना बाद किसमे-किसमेरो दाछ़रो रस भी तियार कियो गातो थियो। पन फिरी भी मीं हाकिमेरे हक्केरी रोट्टी नईं खेवरी। किजोकि कम्मेरो भार लोकन पुड़ भारी थियो। हे मेरे परमेशर! अवं प्राथना केरताईं, ज़ैन किछ मीं एन लोकां केरे लेई कियोरूए, तैस तू मीं पुड़ महरबान भोइतां याद रेखां।
Source notes (1)
- Footnote 40 शेकेल लगभग 11.3 ग्राम।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.