Bhadrawahi Bible
नहेम्याह 4
यहूदी केरे दुश्मन बगावत केरतन
ज़ैखन सम्बल्लते शुनू, ज़ै सामरियारो हाकिम थियो कि यहूदी शहरपनाहरी मरम्मत केरि राहोरेन, तैखन तैस बड़ी बुरी लग्गी, ते यहूदी लोकां केरो मज़ाक बनाने लगो। तै अपने लोकां ते सामरियारे सेनारे सामने एन ज़ोने लगो, “तैना कमज़ोर यहूदी कुन केरनू चातन? कुन तैना तैन कम एपनी ताकती सेइं केरि सकेले? कुन तैना अपनि ठार मज़बूत केरेले? कुन तैना अज़ बलिदान केरेले? कुन तैना अपनु कम अज़्ज़े खतम केरेले? कुन मित्तरे ढेरे मां फुकोरे घोड़ फिरी नंव्वे सिरे बनाले?” तैसेरे ड्लखोरां अम्मोनी तोबियाह थियो, ते तै ज़ोने लगो, “ज़ैन किछ तैना बनाने लगोरेन, अगर तैस पुड़ कोई गिद च़ैढ़ी गाए, त तैन, तैन केरि बनेवरी घोड़ां केरी शहरपनाह बिछ़ोड़ेलो।” पन मीं परमेशरे कां प्राथना की, हे इश्शे परमेशर शुन, इश्शी बेइज़्ज़ती भोइ राहोरीए। ते तैन केरो बनेवरो मज़ाक तैन्ना केरे दोग्गे पुड़ वापस केरि दे, ते तैन गुलैमरे मुल्खे मांजो भेज़ी दे। ते तैन केरे अधर्म तू माफ़ न केरा, ते न तैन केरे पाप बिसरां। किजोकि तैनेईं तू शहरपनाह बनाने बालां केरे सामने सरकावरोस।
असेईं शहरपनाह बनाई; ते सारी शहरपनाह अधे ऊँचाई तगर ज़ुड़ी जेई। किजोकि लोकां केरो मन तैस कम्मे मां लगोरो राव।
ज़ैखन सम्बल्लत ते तोबियाह ते अरबी, अम्मोनी ते अश्दोद नगरेरे लोकेईं शुनू, कि यरूशलेमेरी शहरपनाहरी मरम्मत भोइ राहोरीए, ते तैसेरे नाके बन्द भोइ राहोरेन, तैखन तैन बड़ी बुरी लग्गी। ते तैनेईं सेभेइं मिलतां यरूशलेम नगरेरे खलाफ जंग लड़नेरी साज़िश की, कि तैन मां खलबली छ़डम। पन असेईं अपने परमेशरे कां प्राथना की, ते तैन करां डेरतां तैन केरे खलाफ रात दिहैड़ी पहरदार रख्खे।
पन यहूदा प्रदेशेरे लोक दुखेरू गीत ज़ोने लगे, “भारो छ़ूने बालां केरो ज़ोर घेटी जेव, ते मित्ती बड़ी जादे, एल्हेरेलेइ हुनी शहरपनाहरी मरम्मत न केरोए।” ते इश्शे दुश्मन एक्की होरि सेइं ज़ोने लगे, “ज़ांतगर असां तैन कां न पुज़म, ते तैन मैरतां असां कम बन्द न केरम, तांतगर तैन कोई पतो न लग्गे, ते न किछ तैन लेइहोए।” फिरी ज़ैना यहूदी तैन केरे आसे-पासे रहते थिये, तैनेईं सैरी पासेरां एइतां बार-बार असन कां एइतां ज़ोवं, “तुसेईं असन कां वापस एवरू लोड़े।” एल्हेरेलेइ मीं लोकन तलवारां, भाले ते धनुष देइतां शहरपनाही पतर बुन खुल्ली ठैरी मां घराने-घरानेरे मुताबिक पहरदार रख्खे। तैखन अवं हेरतां उठ्ठो, ते रईस लोक ते हाकिमन ते सेभी लोकन सेइं ज़ोवं, “तैन करां न डरा। प्रभु ज़ै महाने ते डरेरे काबले, तैस्से याद केरा, अपने भियालन, मट्ठां, कुइयां ते कौन्शां ते घरां केरे लेई जंग केरां।”
ज़ैखन इश्शे दुश्मनेईं शुनू, कि असन एस गल्लरो पतो लेग्गी जेवरोए कि परमेशरे इश्शे दुश्मना केरि योजना बेफल कियोरीए, तैखन असां सब शहरपनाही कां अपने-अपने कम्मे मां लेग्गी जे। ते तैस दिहाड़े करां लेइतां अधे लोक तैस कम्मे मां लग्गोरे राए ते अधे लोक भाले, तलवारां, धनुष ते झिलमां लेइतां रहते थिये। ते यहूदारे सारे घराने पत्ती हाकिम रहते थिये। शहरपनाहरी मरम्मत केरनेबाले ते भारो छ़ूंने बाले दूईये भारो छ़ूते थिये, मतलब एक्की हथ्थे सेइं कम केरते थिये ते होरी हथ्थे सेइं हथियार ट्लेइतां रखते थिये। च़ांनाई केरनेबाले मिस्त्री अपने-अपने लख्खे सेइं तलवार बेन्धतां कम केरते थिये। ते नरशिंगो बज़ाने1 बालो मीं कां रहतो थियो। एल्हेरेलेइ मीं रईस लोकन ते हाकिमन ते सेभी लोकन सेइं ज़ोवं, “कम्मेरो त बड़ो खिलार पेवरोए, ते असां लोक शहरपनाही पुड़ अलग-अलग एक्की होरी करां दूर रहतम। एल्हेरेलेइ ज़ैट्ठां तुसन नरशिंगो शुनोए, तैट्ठी असन कां अकोट्ठे भोइ गेइयथ। इश्शो परमेशर इश्शी तरफां लड़ेलो।”
एन्च़रे सेइं असां कम्मे मां लगोरे राए, ते तैन मरां अधे, एक्की तारे करां होरि तारे तगर भाले ट्लेइतां रहते थिये। फिरी मीं तैस्से दौरान लोकन सेइं एन भी ज़ोवं, “अक-अक मैन्हु अपने दासे सेइं यरूशलेमेरे अन्तर रात बीताए, कि राती तैना इश्शी रखवाली केरन, ते दीसां तैना कम्मे मां लगोरे रान।” एन्च़रां सेइं अवं न त अपना लिगड़ां बदलतो थियो, ते न मेरे भियाल, ते न मेरे सेवक, ते न पहरदार अपना लिगड़ां बदलते थिये ज़ैना मेरी पहरदारी केरते थिये। ते हर कोई अपनो हथियार घिन्तां पैनी कां गातो थियो।
Source notes (1)
- Footnote नरशिंगो बज़ाने जंग केरनेरे लेई खबरदार रानेरे लेई नरशिंगो बज़ाते थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.