Bhadrawahi Bible
नहूम 1:7
Verse 7 is marked below, with the whole chapter around it. Read from the start
यहोवा अपने दुश्मन पुड़ क्रोध केरते
नीनवे नगरेरे बारे मां नबूवत। एल्कोश नगरेरे रानेबाले नहूमेरे दर्शनेरी किताब।
यहोवा जलन रखनेबालो ते बदलो घिन्ने बालो परमेशरे। यहोवा बदलो घिन्ने बालो ते जलजलाहट केरनेबालोए। यहोवा अपने दुश्मन्न करां बदलो घिन्ते, ते अपने दुश्मना केरो पाप न बिसरे। यहोवा क्रोध केरने मां च़िर लानेबालो ते बड़ो शक्तिमाने, तै दोषी बगैर सज़ाह देने न छ़डेलो। यहोवा बवंडरे ते ऐंधी मांमेइं भोइतां च़लते, ते बिदलार तैसेरे पव्वां केरि धूड़ आहे।
यहोवा समुन्दरे हुक्म देते ते तै समुन्दर शुक्की गाते; तै सब दरियान शुकाते। बाशान ते कर्मेल पहाड़ शुक्की गातन, ते लबानोन पहाड़ेरी हरियाली भी शुक्की गातीए। तैसेरे सामने पहाड़ भी हिल्ली गातन ते पहैड़ी भी गेली गैतिन। तैसेरे प्रतापे सेइं धरती बल्के सारे संसारेरे रानेबालन थरकतन।
तैसेरे क्रोधेरो मुकाबलो कौन केरि सखते? ते ज़ैखन तैसेरो क्रोध भड़कते, तैखन कौन रेई सखते? तैसेरी जलजलाहट अग्गरी ज़ेरि भेड़की गातीए, ते तैसेरे सामने चट्टानां ट्लुटी गैतिन।1 यहोवा भलोए, ते मुसीबतरे वक्त मज़बूत ठार ठहरते, ते ज़ैना तैस कां शरण नेतन तैन केरो खियाल केरते। पन तै बगते पैनेरी गड्डी सेइं तैसेरे ठारारो अन्त केरते, ते अपने दुश्मन्न केढतां आंधरे मां निशानते। तुसां यहोवारे खलाफ कुन योजना बनेई राहोरेथ? तै तुश्शो अन्त केरि देलो; आफत दूइयोवं न पेली। किजोकि चाए तैसेरे दुश्मन कंटन मां फसोरो भोन, ते शराबरे नशे मां मसत भोन, फिरी भी तैना शुकोरे भूंसेरे ज़ेरे भस्म किये गाले। हे नीनवे तीं मरां अक निस्सेलो, ज़ै यहोवारे खलाफ बुरे खियाल केरते ते बुरी योजना केरते।
यहोवा अपने इस्राएली लोकन सेइं एन ज़ोते, “चाहे तैना हर किसमे सामर्थी कि न भोन, ते हछे भी भोन, फिरी भी पूरे तरीके सेइं कट्टे गाले, ते नाश भोल्हे। मीं तीं दुख दित्तोरोए, पन फिरी न देइलो। किजोकि हुनी अवं तैसेरू जियूं तेरे मेट्टू पुड़ेरां ट्लोड़ी छ़डेलो, ते तेरी बेड़ी केरे टुक्ड़े-टुक्ड़े केरतां छ़डेलो।”
हे नीनवे यहोवाए तेरे बारे मां ऐह हुक्म दित्तोरोए, “अग्रोवं जो तेरू खानदान न च़ले, अवं तेरे मन्दरन मरां बनेवरी मूरती ते घड़ाई कियोरी मूरती केट्टी छ़डेलो, अवं तेरे लेई कब्र घड़ेलो, किजोकि तू घटिया आस।”
हेरा, पहाड़न पुड़ खुशरी खबर शुनाने बालो ते शैन्तरो प्रचार केरनेबालो एज्जी राहोरोए! हुनी हे यहूदा, अपना तिहारां मना, ते एपनी मिन्नतां पूरी केर, किजोकि तै दुष्ट फिरी कधे तीं मांमेइं निस्तां न च़ेलि बटेलो, तै पूरे तरीके सेइं नाश भोवरोए।2
Source notes (2)
- Cross-reference प्रका. 6:17.
- Cross-reference प्रेरित. 10:36;रोम. 10:15;इफि. 6:15.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.