Bhadrawahi Bible
मीका 7
इस्राएली लोकां केरि गिरावट
अफ़सोस मीं पुड़! किजोकि अवं तैस मैन्हेरे ज़ेरो भोइ जेवरोईं ज़ै रितरे फल ट्लोड़ने पुड़, या राहोरी दाछ़ ट्लोड़नेरे वक्तेरे आखरी एज्जी गाए, मीं त पकोरे फैगू केरि इच्छा थी, पन खानेरे लेई कोई घोन्छ़ न राव। भक्त मुल्खे मरां नाश भोइ जेवरेन, ते मैन्हन मरां अक भी सही न राव; तैना सब मारनेरे ताकी मां रहतन, ते जाल लेइतां अपने-अपने भियालेरो शिकार केरतन। तैना अपने दूईये हथ्थन सेइं मन लेइतां बुराई केरतन; हाकिम रिश्पत खातन, ते न्यायी रिश्पत खानेरे लेई तियार रहते, ते रईस अपने मनेरी बुराई बियान केरतो रहते; एन्च़रे सेइं तैना सब मिलतां साज़िश केरतन। तैन मरां ज़ै सेभन करां रोड़ोए, तै कंटन बाले झ़ैल्लां केरो ज़ेरो दुख देनेबालोए, ज़ै सेभन करां सिद्धोए, तै कंटन बाले बाड़े करां भी बुरोए। तेरे पहरदार नेबी केरि ज़ोवरी दिहाड़ी, मतलब तेरी सज़ारी दिहाड़ी एज्जी जेवरीए। हुनी तैना जल्दी भ्रमित भोइ गाले। पड़ोसी पुड़ विश्वास न केरा, ते खास दोस्ते पुड़ भी भरोसो न केरा, इड़ी तगर एपनी लैड़ी सेइं भी ध्याने सेइं गल केरथ। किजोकि मट्ठू बाजी केरि अनादर केरते, कुई अम्मरी, ते नुश शिखरे खलाफ खड़ी भोतीए, मैन्हेरे दुश्मन तैसेरे घरेरे लोक भोतन।1 पन अवं मद्दतरे लेई यहोवारे पासे तकतो रेइलो, ते अवं अपने मुक्ति देनेबाले परमेशरे बलगतो रेइलो; मेरो परमेशर मेरी प्राथना शुनेलो।
यरूशलेम नगरेरे लोक ज़ोतन, हे मेरे दुश्मन, मीं पुड़ खुशी न भो; किजोकि अवं ज़ेरो बिछ़ड़ेलो, तेरहो खड़ो उठेलो। ते ज़ेरो अवं आंधरे मां पेइलो तेरहो यहोवा मेरे लेई लौ बनालो। मीं यहोवारे खलाफ पाप कियोरोए, एल्हेरेलेइ अवं तैसेरे क्रोधे बरदाशत केरेलो; ज़ांतगर तै मेरो मुकदमो न लड़े, ते मेरो न्याय न केरे, तै मीं लोई मां आनेलो; अवं तैसेरी धार्मिकता हेरेलो। तैखन मेरी दुश्मन ज़ै मीं सेइं एन ज़ोतीए कि तेरो परमेशर यहोवा कोड़िए, तै भी तैस हेरेली ते शरमिन्दा भोल्ही। अवं अपने एछ़्छ़न सेइं तैस हेरेलो; तैखन तै सड़कां केरि च़िकरारी ज़ेरि ढ्लन्च़ी गाली।
हे यरूशलेम तेरे बाड़ां केरे बन्धनेरे दिहाड़े तैसेरी हद बधाई गाली। तैस दिहाड़े अश्शूरे सेइं, ते मिस्र मुल्खेरे नगरन सेइं ते मिस्र ते समुन्दरेरे दरमियानेरे, ते समुन्दर-समुन्दरेरे ते पहाड़-पहाड़ेरे दरमियानेरे मुल्खन मरां लोक तीं कां एज्जेले। फिरी भी ऐह मुल्ख अपने रानेबालां केरे कम्मां केरि वजाई सेइं उज़ड़ी गालो।
हे यहोवा, तू लट्ठ ट्लेइतां अपने लोकां केरि पुहाली केर, मतलब अपने हिस्सेरी भैड्डां-छ़ेल्ली केरि, ज़ैना कर्मलेरे जंगले मां अलग बिश्शां केरतिन; तैन पुराने वक्तेरी ज़ेरि बाशाने मां ते गिलादे मां च़रन।
यहोवा ज़ोते, ज़ेन्च़रे कि मिस्र मुल्खे मरां तेरे निसनेरे दिहाड़न मां, तेन्च़रे हुना अवं तैस चमत्कारी कम हरेइलो। गैर कौमां हेरतां अपने सारे शेक्तरे बारे मां शरमिन्दा भोल्हे; तैना अपने तुत्तरे हथ्थन सेइं छ़ुपाले, ते तैन केरे कन टोंने भोइ गाले। तैना सप्पेरी ज़ेरि धूड़ च़टेले, ते ज़मीनी पुड़ पेटेरे भारे जीपां केरि किसम अपने गत्तन मरां थर्कती निसेली; तैना इश्शे परमेशर यहोवा कां थरकते एज्जेले, ते तैना तीं करां डरेले।
हे यहोवा, तेरो ज़ेरो एरहो परमेशर कोड़िए ज़ै पाप माफ़ केरे, ते अपने हिस्सेरे बच़ोरे लोकां केरे पाप माफ़ केरते? तै अपनो क्रोध हमेशारे लेई न रख्खे, किजोकि तै दयाई सेइं प्यार केरते। तै फिरी असन पुड़ दया केरेलो, ते इश्शां बुरां कम्मां ढ्लेन्च़ेलो। तू तैन केरे सेभी पापन डुग्घे समुन्दरे मां छ़डेलो। तू इश्शे पूर्वज याकूबेरे बारे मां तै सच़्च़ाई, ते इश्शे पूर्वज अब्राहमेरे बारे मां तै दया पूरी केरेलो, ज़ेसेरो वाधो तीं पुराने ज़मानेरे दिहाड़न करां लेइतां हुन्ना तगर इश्शे दादे-पड़दादन सेइं केरतो एवरोस।2
Source notes (2)
- Cross-reference मत. 10:21-35;मरक. 13:12;लूक. 12:53.
- Cross-reference लूक. 1:54-55;रोम. 15:8-9.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.