Bhadrawahi Bible
लैव्यव्यवस्था 2
अन्नेरी बलि च़ाढ़ेरी विधि
“ज़ैखन कोई यहोवारे लेई अन्नेरी बलि च़ढ़तल च़ाढ़नी चाहे, त तै मैदो च़ाढ़े; ते तैस पुड़ तेल1 छ़ेडतां तैस पुड़ लोबान रख्खे; ते तै तैस हारूनेरे मट्ठन कां आने ज़ैना याजकन। तैखन याजक अन्नेरे बेलरे तेल मल्लोरे मैदे मरां एन्च़रां अपनि मुठड़ी भेरतां कढे कि सब लोबान तैस मां एज्जी गाए; ते याजक तैन्न याद करानेबाले हिस्सेरे लेई वेदी पुड़ फुक्के कि इन यहोवाए खुश केरनेबालू खुशबूदार हबन भोल्हु। ते अन्नेरी बेलि मरां ज़ैन बच़ोरू राए तैन हारून ते तैसेरे मट्ठां केरू भोल्हु; ई यहोवारे बलिदान्न मरां परमपवित्र हिस्सो भोल्हो।
“ज़ैखन तू अन्नेरी बेलि मरां तंदूरे मां बनेवरी च़ढ़तल च़ाढ़स, त तै तेले सेइं सन्नोरे अखमीरी अट्टेरे फुलके, या तेले सेइं च़ोपड़ोरि अखमीरी रोट्टी केरि भोए। ते अगर तेरी च़ढ़तल तव्वे पुड़ पकावरी अन्नबलि भोए, त तै तेले सेइं सन्नोरी अखमीरी अट्टेरी भोए; तैस टुक्ड़े-टुक्ड़े केरतां तैस पुड़ तेल छ़डनो, तैखन तै अन्नेरी बलि भोइ गाली। ते अगर तेरी च़ढ़तल कढ़ेई मां तल्लोरे अन्नेरी बलि भोए, त तै अट्टे सेइं तेले मां बनेवरी भोए। ते ज़ै अन्नेरी बलि इन चीज़न मरां कोन्ची चीज़री बनोरी भोए तैस यहोवा कां नेइयथ; ते ज़ैखन तै याजके कां आनी गाए, तैखन याजक तैस वेदी कां ने। ते याजक अन्नेरी बेलि मरां याद करानेबाले हिस्से केढतां वेदी पुड़ फुक्के कि तै यहोवारे लेई खुश केरनेबालू खुशबूदार हबन भोए; ते अन्नेरी बेलि मरां ज़ैन बच़ोरू राए तैन हारून ते तैसेरे मट्ठां केरू भोए; तै यहोवारे हबनन मां परमपवित्र हिस्सो भोल्हो।
“कोई अन्नेरी बलि ज़ैस तुस यहोवारे लेई च़ाढ़थ तै खमीर मिलेइतां बनाई न गाए; तुस कधी हबने मां यहोवारे लेई खमीर ते माछ़ी न फुकथ। तुस इन्न पेइली फसलरी च़ढ़तल केरतां यहोवारे लेई च़ैढ़थ, पन तैन खुश केरनेबाली खुशबूअरे लेई वेदी पुड़ च़ाढ़ू न गाए। फिरी एपनी सब अन्नेरी बेलन लूनी2 बनेइयथ; ते एपनी कोई अन्नेरी बलि अपने परमेशरेरे सेइं कियोरे करारेरे लूने3 बगैर भोने न देइयथ; ते अपने सब च़ढ़तलन साथी लून भी च़ैढ़थ।
“अगर तू यहोवारे लेई पेइली फसलरी अन्नेरी बलि च़ाढ़स, त अपनि पेइली फसलरे अन्नेरी बेलरे लेई अग्गी मां ट्लाड़ोरां नीलां-नीलां शिल्लां, मतलब नीले-नीले शिल्लन ज़ैना हथ्थन सेइं पुच़ोड़तां केढतां ऐन्हां, तैखन अन्न च़ैढ़ां। ते तैस मां तेल छ़डनो, ते तैस पुड़ लोबान रखनू; तैखन तै अन्नेरी बलि भोइ गाली। ते याजक पुच़ोड़ोरे अन्ने, ते तेले, ते सारे लोबाने याद केरनेबालो हिस्सो केरतां फुक्के; तैन यहोवारे लेई हबन भोल्हु।”
Source notes (3)
- Footnote तेल इस्राएली लोक सिर्फ ज़ैतूनेरे तेले ज़ानते थी ते तैस इस्तेमाल केरते थी
- Footnote लूनी लूनेरो इस्तेमाल अभिषेक ते किछ पक्कू बनानेरे निशानेरे लेई कियो गातो थियो।
- Footnote करारेरे लूने अक “लूनेरो करार” एसेरो मतलब अक पक्को समझोतो थियो (हेरा गिनती 18.19 ते 2 इतिहास 13.5) ज़ै ट्लोड़ो या तैस मां कोई बदलाव न थियो केरोई सकतो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.