Bhadrawahi Bible
लैव्यव्यवस्था 1
होमबलि च़ाढ़नेरि विधि
यहोवाए मूसो कुजेइतां तैस सेइं मिलापे बाले तेम्बु मरां एन्च़रे ज़ोवं, “इस्राएली लोकन सेइं ज़ो कि तुसन मरां कोई मैन्हु यहोवारे लेई जानबरां केरू बलिदान केरनेरे लेई आने, त तैसेरो बलि देनेरो जानबर बेछ़ी-दांतन या भैड्डां-छ़ेल्लन मरां अक भोए।
“अगर तै बेछ़ी-दांतन मरां होमबलि केरे, त बगैर नुक्से नर मिलापे बाले तेम्बेरे दारे पुड़ च़ाढ़े कि यहोवा तैस कबूल केरे। तै अपनो हथ होमबलि देनेरे जानबरेरे क्रोड़ी पुड़ रख्खे, ते तै तैसेरेलेइ प्रायश्चित केरनेरे लेई कबूल कियो गालो। तैखन तै तैस बछ़ड़े यहोवारे सामने बलि केरे; ते हारूनेरां मट्ठां ज़ैना याजकन तैना खून नेड़े नेइतां तैस वेदरे च़ेवरे पासन छ़िड़कन ज़ै मिलापे बाले तेम्बेरे दारे पुड़े। फिरी तै होमबलि देनेरे जानबरेरी खाड़ी केढतां तैस जानबरेरे टुक्ड़े केरे; तैखन हारून याजकेरां मट्ठां वेदी पुड़ अग रखन, ते अग्गी पुड़ कैड़ु सही तरीके रखन; ते हारूनेरां मट्ठां ज़ैना याजकन तैना क्रोड़ी ते चेर्भी समेत जानबरेरे टुक्ड़न तैन कैड़न पुड़ ज़ैना वेदरे अग्गी पुड़ भोल्हां रोड़ेच़ारे रखन; ते तै मैन्हु तैसेरी आंट्लां ते खुरैड़न पैनी सेइं धोए। तैखन याजक सेब्भन वेदी पुड़ फुक्के कि तै होमबलि यहोवारे लेई खुश केरनेबालू खुशबूदार हबन भोए।
“अगर तै गब्बां केरि होमबलि च़ाढ़े, त बगैर नुक्से नर च़ाढ़े। ते तै तैस यहोवा कां वेदी पुड़ उत्तरेरे पासे बलि केरे; ते हारूनेरां मट्ठां ज़ैना याजकन तैना तैसेरे खूने वेदरे च़ेवरे पासे छ़िड़कन। ते तै तैस क्रोड़ी ते चर्भी समेत टुक्ड़े-टुक्ड़े केरे, ते याजक इन सेब्भन तैन कैड़न पुड़ रोड़ेच़ारे रख्खे ज़ैना वेदरे अग्गी पुड़ भोल्हां; तै तैसेरी आंट्लां ते खुरैड़न पैनी सेइं धोए। ते याजक वेदी पुड़ फुक्के कि तै होमबलि भोए ते यहोवा खुश केरनेबालू खुशबूदार हबन भोए।
“अगर तै यहोवारे लेई च़ुड़ोलू केरि होमबलि च़ाढ़े, त घुग्गू या कबूतरां केरि बलि च़ाढ़े। याजक तैस वेदी कां नेड़े नेइतां तैस मुन्डू बड़ देइतां क्रोड़ी धड़े करां अलग केरे, ते तैसेरो सारो खून तैस वेदरे ड्लेखी पुड़ छक्को गाए ते फिरी तैस वेदी पुड़ फुक्के; ते तै तैसेरे मल्ले1 ते फंघन केढतां वेदरे पूरबेरे पासे मांज़न छ़डनेरे ठारी पुड़ शैरी छ़डे; ते तै तैस फंघां केरे मझ़ाटेरां छ़िन्दे, पन अलग न केरे। तैखन याजक तैस वेदी पुड़ तैन कैड़न पुड़ रेखतां ज़ैना अग्गी पुड़ भोल्हां फुक्के, कि तैन होमबलि ते यहोवारे लेई बड़ू खुशबूदार हबन भोए।”
Source notes (1)
- Footnote मल्ले ज़ैन किछ तैने खेवरूए
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.