Bhadrawahi Bible
लैव्यव्यवस्था 3
मेलबेलरी विधि
“अगर तैसेरी च़ढ़तल मेलबेलरी1भोए, ते अगर तै बेछ़ी-दांतन मरां कोन्ची च़ाढ़े, त चाहे तै जानबर नर भोए या मादा, पन तै बगैर नुक्से भोए तैस्से तै यहोवा कां च़ाढ़े। ते तै अपनो हथ अपने बलिदान देनेरे जानबरेरे क्रोड़ी पुड़ रख्खे ते तैस मिलापे बाले तेम्बेरे दारे पुड़ बलि केरे; ते फिरी हारूनेरां मट्ठां ज़ैना याजकन तैना तैसेरे खूने वेदरे च़ेवरे पासन छ़िड़कन। तै मेलबेलि मरां यहोवारे लेई हबन केरे, मतलब ज़ैस चेर्भी सेइं आंट्लां ढेकोरी रैतिन, ते ज़ै चर्भी तैन सेइं पलैटोरी रहतीए तै भी, ते दूईये गुर्दे ते तैन पुड़ेरी चर्भी ज़ै कमरी कां रहतीए, ते गुर्दे सने कलैज़े करां बेइयीं झिल्ली, इन सेब्भन तै अलग केरे। तैखन हारूनेरां मट्ठां इन्न वेदी पुड़ तैस होमबेलि पुड़ फुक्कन, ज़ै तैन कैड़न पुड़ भोल्ही ज़ै अग्गरे बह आहे, कि इन यहोवारे लेई खुश केरनेबालू खुशबूदार हबन भोए।
“अगर यहोवारी मेलबेलरे लेई तैसेरी च़ढ़तल भैड्डां-छ़ेल्लन मरां भोए, त चाहे तै नर भोए या मादा, पन ज़ै बगैर नुक्से भोए तैस्से तै च़ाढ़े। अगर तै भैड्डरो बच्चो च़ाढ़ते, त तैस यहोवारे सामने च़ाढ़े, ते तै अपने च़ढ़तलरे जानबरेरे क्रोड़ी पुड़ हथ रख्खे ते तैस मिलापे बाले तेम्बेरे सामने बलि केरे; ते हारूनेरां मट्ठां तैसेरे खूने वेदरे च़ेवरे पासन छ़िड़कन। तैखन मेलबेलि यहोवारे लेई हबन केरे, ते तैसेरी चेर्भी सेइं भेरतां मोट्टे पौंछ़ड़े तै ट्लिगे करां अलग केरे, ते ज़ैस चेर्भी सेइं आंट्लां ढेकोरी रैतिन, ते ज़ै चर्भी तैन मां पलैटोरी रहतीए, ते दूईये गुर्दे, ते ज़ै चर्भी तैन पुड़ ट्लिगे कां रहतीए, ते गुर्दे सने कलैज़े करां बेइयीं झिल्ली, इन सेब्भन तै अलग केरे। ते अक याजक इन्न वेदी पुड़ फुक्के; ई यहोवारे लेई हबनेरे रूपे मां खूराक भोल्ही।
“अगर तै थाव्वो या छ़ेल्ली च़ाढ़े, त तैस यहोवारे सामने च़ाढ़े। ते तै अपनो हथ तैसेरे क्रोड़ी पुड़ रख्खे, ते तैस मिलापे बाले तेम्बेरे सामने बलि केरे; ते हारूनेरां मट्ठां तैसेरे खूने वेदरे च़ेवरे पासन छ़िड़कन। तैखन तै तैस मरां अपनि च़ढ़तल यहोवारे लेई हबन केरतां च़ाढ़े, ते ज़ैस चेर्भी सेइं आंट्लां ढेकोरी रैतिन, ते ज़ै चर्भी तैन मां पलैटोरी रहतीए तै भी, ते दूईये गुर्दे ते ज़ै चर्भी तैन पुड़ ट्लिगे कां रहतीए, ते गुर्दे सने कलैज़े करां बेइयीं झिल्ली, इन सेब्भन तै अलग केरे। ते याजक इन्न वेदी पुड़ फुक्के; ऐह हबनेरे रूपे मां खूराके ज़ैन खुश केरनेबैली खुशबूअरे लेई भोते; किजोकि सारी चर्भी यहोवारी आहे। ई तुश्शे रानेरी ठारन मां तुश्शी पीढ़ी-पीढ़ी केरे लेई हमेशारी विधि भोल्ही कि तुस चर्भी ते खून कधी न खेइयथ।”
Source notes (1)
- Cross-reference मेलबेलरी निर्ग. 20:24.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.