Bhadrawahi Bible
विलापगीत 4
सिय्योने पुड़ हमलेरो डर
सोन्नू केन्च़रे खोट्टू भोइ जेवं, खालिस सोन्नू केन्च़रे बेदलोव?
पवित्र ठारारे कीमती घोड़ त हर एक्की सड़करे बन्ने पुड़ शारे गातन।
सिय्योनेरां कीमती मट्ठां ज़ैना कुन्देरां ज़ेरां थियां,
तैना कुम्हारेरे बनेवरे मित्तरे घड़ां केरे ज़ेरे केरहे घटिया गने जेवरन।
गिदनी भी अपने बच्चन दुद्ध पियातीए,
पन मेरे लोकां केरि कुई जंगलेरे शुतुर्मुर्गां केरि ज़ेरि बेरहम भोवरीए।
दुद्ध पीते बच्चां केरि ज़िभ ट्लिशारे मारे तैलू सेइं खतोरीए;
बाल बच्चे रोट्टी मघन, पन कोई तैन न दे।
ज़ैना सुवादे बाली रोट्टी खाते थिये, तैना हुनी सड़कन मां परेशान फिरतन;
ज़ैना मखमलेरे लिगड़न मां पलोरे थिये हुनी कूड़ेरे ढेरन पुड़ लेटतन।
मेरे लोकां केरि नेगरारो पाप सदोमेरे पापे करां भी जादे भोइ जेव
ज़ै केन्चेरे हथ लानेरे बगैर एक्की पले मां उलटोरो थियो।1
यरूशलेम नगरेरे राजकुमार हिंवेरे करां साफ ते दुद्धे करां भी छ़ित्ते थिये;
तैन केरि जान मूँगन करां लाल, ते तैन केरि खूबसूरती नीलमणि केरि ज़ेरि थी।
पन हुनी केरू रूप आंधरे करां भी कालू आहे, तैन केरि सड़कन मां पिशान न एज्जे;
तैनी केरि चमड़ी हेड्डन सेइं खत्ती, ते लेकड़री ज़ेरि शुक्की जेई।
जंगी मां तलवारारे मारे ढ्लोखोरन करां जादे रोड़े राए
ज़ैन केरे प्राण ऊडारां केरि फसलरे बगैर ढ्लुखी सेइं शुक्की गातन।
दया केरनेबैली कौन्शेइं अपने हथ्थन सेइं अपने बच्चे पकाए:
मेरे लोकां केरे विनाशेरे वक्ते तैन केरि खूराक बेनि जे।
यहोवा अपनो पूरो क्रोध बांदो कियोरोए,
तैने अपनि सरक बड़ी बधाई;
ते सिय्योने मां एरी अग लाई ज़ैस सेइं
तैसेरी बुनीयाद भी भस्म भोइ जेवरीए।
धेरतरो कोई राज़ो या दुनियारो कोई रानेबालो
इसेरो कोई भी विश्वास न थियो केरि सकतो,
कि बगावत केरनेबाले ते दुश्मन यरूशलेम नगरेरे फाटकां केरे अन्तर एज्जी सकेले।
इन तैसेरे नेबी केरे पापां ते तैसेरे याजकां केरे अधर्मेरे कम्मां केरे वजाई सेइं भोवरूए;
किजोकि तैना तैसेरे मझ़ाटे धेर्मी केरो कत्ल केरते एवरेन।
तैना हुनी सड़कन मां काना केरे ज़ेरे दरबदर फिरतन।
ते ज़ेन्च़रे खूनेरी छ़िड़कन सेइं इड़ी तगर अशुद्ध आन
कि कोई तैन केरे लिगड़न सेइं हुरी न सके।
लोक तैन जो हक देइतां ज़ोतन, “हे अशुद्ध लोकव, दूर भोथ! दूर भोथ! असन सेइं न हुरा।”
ज़ैखन तैना नेशतां दरबदर फिरने लगे,
तैखन गैर कौमां केरे लोकेईं ज़ोवं, “एजने बाले वक्ते मां इड़ी रुकी न बटेले।”
यहोवा अपने क्रोधे सेइं तैना तितर-बितर किये, तै फिरी तैन पुड़ सिद्धी नज़र न केरेलो;
न त याजकां केरि आदर भोइ, ते न बुज़ुर्गन पुड़ किछ दया कीजेई।
इश्शी एछ़्छ़ी बेकारे मां मद्दत मगते-मगते कैनी भोइ जेवरिन,
अस लगातार अक एरी कौमरे पासे तकते राए ज़ै बच़ेइ न सके।
लोकन असन पत्ती एरे पे कि अस अपने नगरेरे चौकन मां भी च़ेलि न सके;
इश्शो अन्त नेड़े एवरोए; इश्शी उमर पूरी भोइ; किजोकि इश्शो अन्त एज्जी जेवरोए थियो।
असन निशान्ने बाले अम्बरे मां उडरने बाले उकाबन करां भी जादे तेज़ च़लते थिये।
तैना पहाड़न पुड़ असन पत्ती पे ते जंगले मां असन मारनेरे लेई बिश्शे।
यहोवारो अभिषिक्त राज़ो ज़ै इश्शो प्राण थियो,
ते ज़ेसेरे बारे मां असेईं सोचोरू थियूं कि गैर कौमां केरे दरमियान अस तैसेरे शरणी मां ज़ींते रामेले,
तै तैन केरे घड़ोरे गत्तन मां ट्लाव जेव।
हे एदोमेरी कुई, तू ज़ै ऊस मुल्खे मां रातिस, खुश ते मघन भो;
पन ई दुखेरो कुटोरो तीं तगर भी पुज़ेलो, ते तू मसत भोइतां अपने आपे नग्गी केरेली।
हे सिय्योनेरी कुई, तेरे अधर्मेरी सज़ाह खतम भोइ, तै फिरी तीं गुलैमी मां न नेलो।
पन हे एदोमेरी कुई, तेरे अधर्मेरी सज़ाह तै तीं देलो, तै तेरे पाप बांदे केरेलो।
Source notes (1)
- Cross-reference उत्प. 19:24-25.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.