Bhadrawahi Bible
विलापगीत 1
यरूशलेम नगरे पुड़ ज़ुलम
यरूशलेम नगरी ज़ै लोकन सेइं भेरतां थी तै हुनी केन्च़रे खालीए!
तै किजो विधवारी ज़ेरि बेनि जेई?
तै ज़ै कौमां केरे नज़री मां महान ते प्रादेशन मां रानी थी,
हुनी किजो लगान देनेबाली भोइ जेवरीए।
राती तै बेड़ी लेरां देचे, तैसेरां ऐंखरू खैखोड़न पुड़ पेतन।
तैसेरे पेइले यार तैस तसल्ली न देन;
तैसेरे सारे दोस्तेईं तैस धोखो दित्तो,
ते तैसेरे दुश्मन बेनि जेवरेन।
यहूदा दुख ते सखत गुलैमरे वजाई सेइं प्रदेशे जो च़ली जेई,
पन गैर कौमन मां रेइतां तैस चैन न मैल्हे,
तैसेरे सब निशान्ने बालेईं तैसेरे तंग हालती मां तै ट्लाई।
सिय्योनेरे भवनेरे बत्तां मातम केरने लेवरिन,
किजोकि ठहरावरे तिहारन मां कोई न एज्जे;
तैसेरे सब फाटक सुनसान पेवरेन, तैसेरे याजक ट्लासतन;
तैसेरी कुइयां दुखी आन,
ते तै एप्पु बड़े दुख झ़ैलने लगोरीए।
तैसेरे दुश्मन प्रधान भोइ जे, ते तैना तरक्की केरि राहोरेन,
किजोकि तैसेरे बड़े पापां केरि वजाई सेइं यहोवा तैस दुख दित्तोरोए,
दुश्मनेईं तैसेरे बच्चे गुलैमी मां ने।
सिय्योनेरी कुइअरी शान-ओ-शोकत च़ली जेई।
तैसेरे हाकिम एरे हिरनां केरे ज़ेरे भेवरेन ज़ैन कोई चरागा न मैल्हे।
यरूशलेमे इन दुखे सेइं भेरतां दिहाड़न मां,
ज़ैखन तैसेरे लोक दुश्मना केरे हथ्थे मां पे ते तैसेरी कोई मद्दत केरनेबालो न राव,
एपनी सैरी कीमती चीज़ां ज़ैना पुराने ज़माने करां तैसेरी थी, याद कियोरिन।
तैसेरे दुश्मनेईं तै उज़ड़ोरी लेइतां तैसेरो मज़ाक बनेवरोए।
यरूशलेमे बड़ो पाप कियो, एल्हेरेलेइ तै अशुद्ध कौन्शरी ज़ेरि भोवरीए;
ज़ेत्रे तैसेरी आदर केरते थिये तैना तैसेरी निरादर केरतन,
किजोकि तैनेईं तैसेरू नग्गू पन लाहेरूए,
हाँ, तै ट्लसती तुत्तर फिरातीए।
तैसेरी अशुद्धता तैसेरे लिगड़े पुड़े।
तैसां अपनो अन्त याद न रख्खो।
एल्हेरेलेइ तै बड़े बुरे तरीके सेइं बिछ़ोड़ी जेवरीए,
ते कोई तैस तसल्ली न दे।
तै दयारे लेई बिनती केरतीए, हे यहोवा मेरे दुखे पुड़ नज़र केर,
किजोकि दुश्मन मेरे खलाफ कामयाब भोवरोए!
दुश्मनेईं तैसेरी सब कीमती चीज़ां लुटोरिन;
हाँ, गैर कौमन, ज़ैन केरे बारे मां तीं हुक्म दित्तोरो थियो कि तैना तेरे सभाई मां शामल न भोइ सकेले,
तैना तैसां तेरे पवित्र ठैरी मां एवरे लाहोरेन।
तैस मां रानेबाले सारे ट्लासते खानेरी चीज़ां तोप्पने लगोरेन।
तैनेईं अपनो प्राण बच़ानेरे लेई अपनि कीमती चीज़ां बेच़तां खाने जो घिन्नू।
तै मद्दतरे लेई बिनती केरतीए, हे यहोवा, नज़र केर ते ध्यान सेइं तक,
किजोकि अवं घटिया भोइ जेवरीं।
तै ज़ोतीए, हे सब एजने गाने बालव, कुन तुसन इस गल्लरो कोई फिक्र नईं?
नज़र केरतां हेरा, कुन मेरे दुखे करां बेद्धतां होरि कोई तकलीफे ज़ै यहोवा क्रोधेरे दिहाड़े मीं पुड़ छ़डोरीए?
तैने बैंधोरां मेरे हेड्डन मां अग लाई,
ते तैना तैस सेइं भस्म भोइ जे।
तैनी मेरे पव्वां केरे लेई जाल बिछ़ाव, ते अवं उलटव।
तैनी एन्च़रे कियूं कि अवं शारोरी ज़ेरि ते रोगे सेइं लगातार कमज़ोर रहतीं।
तैनी जुऊं एरे रेस्सी केरे ज़ेरे मेरे पाप अपने हथ्थे सेइं कस्सोरेन।
तैनी तैना बेंटतां मेरे मेट्टू पुड़ च़ैढ़ी, ते मेरो ज़ोर घटाव;
ज़ैन केरो अवं मुकाबलो भी न केरि सकेई, यहोवा अवं तैन केरे कब्ज़े मां की।
यहोवा मेरे सब बहादर मड़द घटिया समझ़े।
तैनी ठहरावरे तिहारेरां केरे बारे मां प्रचार केरतां सेना मेरे खलाफ कुजाई कि मेरे जुवानन पीहन;
यहूदा प्रदेशेरी कुई यहोवा ज़ेन्च़रे कुण्डे मां ढ्लेन्च़ोरी भोए।1
इन गल्लां केरे वजाई सेइं अवं लेरां देती।
ते मेरी एछ़्छ़न सेइं पैनेरी गड्डां बेगती रैतिन।
किजोकि ज़ैस तसल्ली देनेबालेरे वजाई सेइं मेरे दिले तसल्ली मैलती थी, तै मीं करां दूर भोव;
मेरे लोक अकैल्ले भोइ जे, किजोकि दुश्मन प्रबल भोइ जे।
सिय्योने हथ फैलावरेन, तैस कोई तसल्ली न दे,
यहोवा याकूबेरे बारे मां ई हुक्म दित्तोरोए कि तैसेरे च़ेवरे पासेरे रानेबाले दुश्मन भोइ गान;
यरूशलेम तैन केरे दरमियान अशुद्ध कौन्शरी ज़ेरि भोइ जेई।
यहोवा सच़्च़ो, किजोकि मीं तैसेरो हुक्म ट्लोड़ोरोए।
हे सारे लोकव, शुना, मेरी तकलीफ हेरा! मेरां जुवान मट्ठां ते कुइयां गुलैमी मां च़ेलि जेआं।
मीं अपने यारन कां मद्दत मग्गी पन तैनेईं भी मीं धोखो दित्तो।
ज़ैखन मेरे याजक ते बुज़ुर्ग एल्हेरेलेइ खानेरी चीज़ां तोप्पने लगोरे थिये कि तैना ज़ींते रान,
तैखन नगरे मां तैना मेरि जे।
हे यहोवा, ध्यान दे, किजोकि अवं मुसीबती मां आईं,
मेरी आंट्लां शुक्की जेई, मेरो दिल उदास भोइ जेव, किजोकि मीं बड़ी बगावत कियोरीए।
बेइर त अवं त तलवारी सेइं बेऔलाद भोती;
ते घरे मां मौत बास केरतीए।
तैनेईं शुनोरू कि अवं ट्लासतीं,
पन मीं कोई तसल्ली न दे।
मेरे सब दुश्मनेईं मेरी मुसीबतरी खबर शुनोरीए;
तैना इस सेइं खुश भोए कि तींए एन कियोरूए।
पन ज़ैस सज़ारे दिहाड़ेरे बारे मां तीं प्रचार केरतां ज़ोवरूए तैस तू हिरा।
तैखन तैना भी मेरे ज़ेरे दुख झ़ैल्लन।
तैन केरि सारी दुष्टतारे पासे नज़र केर;
ते ज़ेन्च़रे मेरे सारे पापां केरे वजाई सेइं तीं मीं सज़ाह दित्ती, तेन्च़रे तैन भी सज़ाह दे;
किजोकि अवं बड़े मुसीबती मां आईं,
ते मेरो दिल रोगे सेइं कमज़ोर भोइ जेवरोए।
Source notes (1)
- Cross-reference प्रका. 14:20;19:15.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.