Bhadrawahi Bible
यिर्मयाह 52
यरूशलेमेरी हार
ज़ैखन सिदकिय्याह राज़ केरने लगो, तैखन तैसेरी उमर 21 साल थी; ते तैनी यरूशलेम नगरे मां 11 साल राज़ कियूं। तैसेरी अम्मरू नवं हमूतल थियूं ज़ै लिब्ना नगरेरे रानेबाले यिर्मयाहेरी कुई थी। सिदकिय्याह राज़े यहोयाकीमेरे सब कम्मां केरे मुताबिक तैन कियूं ज़ैन यहोवारी नज़री मां बुरूए। सच़्च़े यहोवारे क्रोधेरे वजाई सेइं यरूशलेम ते यहूदारी एरी हालत भोइ कि आखरी मां तैनी तैना अपने सामनेरां दूर किये। ते सिदकिय्याह बाबेलेरे राज़े सेइं बगावत की।
ते बाबेलेरे राज़ेरे राज़ केरनेरे नोवोवं सालेरे दशोवं महीनेरे दशोवं दिहाड़े नबूकदनेस्सर राज़े अपनि सारी सेना नेइतां यरूशलेम नगरे पुड़ चढ़ाई की, ते तैनी तैसेरे कां डेरे लेइतां तैसेरे च़ेवरे पासां किल्लो बनाव। एन्च़रे सेइं नगर घेरू जेवं, ते सिदकिय्याह राज़ेरे राज़ केरनेरे यारोवं साले तगर घिरोरू रावं। च़ेवरोवं महीनेरे नोवोवं दिहाड़े यरूशलेम नगरे मां काल इड़ी तगर पेव, कि लोकां केरे लेई खाने जो किछ न राव। तैखन नगरेरे शहरपनाही मां दर्ज़ बनाई, ते दूईये दिवारां केरे मझ़ाटे ज़ै फाटके राज़ेरी बाग कां नेड़े थियो, तैस मरां सब जंगी सिपाही नेशतां रातो-रात नगरे मरां च़ेलि जे, ते अराबारे बत्तां जे। (तैस मौके कसदी लोकेईं नगर घेरोरू थियूं)। पन तैन केरि सेना राज़ेरो पीछो कियो, ते तै यरीहो नगरेरे नेड़े अराबा मां गेइतां ट्लाव; तैखन तैसेरी सारी सेना तैस करां तितर-बितर भोइ जेई। तैखन तैनेईं सिदकिय्याह राज़ो ट्लेइतां हमात मुल्खेरे रिबला नगरे मां बाबेलेरे राज़े कां नेव, ते तैड़ी तैनी तैसेरे सज़ारो हुक्म दित्तो। बाबेलेरे राज़े सिदकिय्याहेरां मट्ठां तैसेरे सामने मारां, ते यहूदा प्रदेशेरे सारे हाकिम भी रिबला मां मारे। फिरी बाबेलेरे राज़े सिदकिय्याहेरी एछ़्छ़ी कढ़ेई, ते तै बेड़न सेइं च़िकतां बाबेल तगर नेव, ते तै कैदखाने मां छ़डो। तै मरने तगर तैट्ठी राव।
यहोवारो भवन तबाह भोनो
फिरी तैस्से साल यानी बाबेलेरे राज़े नबूकदनेस्सरेरे राज़ केरनेरे उनियों सालेरे पंच़ोंव महीनेरे दशोवं दिहाड़े मां अंगरक्षकां केरो प्रधान नबूजरदान ज़ै बाबेलेरे राज़ेरे सामने खड़ो रहतो थियो यरूशलेम मां अव। तैनी यहोवारे भवने ते राज़ेरे मेहल ते यरूशलेम नगरेरे सब बड्डां-बड्डां घरां अग लुवातां फुकां। ते कसदी केरि सारी सेना ज़ै अंगरक्षकां केरे प्रधाने साथी थी, यरूशलेम नगरेरे च़ेवरे पासन सब शहरपनाह बिछ़ोड़ी छ़डी। अंगरक्षकां केरो प्रधान नबूजरदान कंगाल लोकन मां बड़े, ते ज़ैन लोक यरूशलेम नगरे मां रेई जेवरे थिये, ते ज़ैना लोक बाबेलेरे राज़े कांजो नश्शोरे थिये, ते ज़ैन कारीगिर रेई जेवरे थिये, तैन सब कैदी बनेइतां ने। पन ड्लाव्वां केरे कंगाल लोकन मरां अंगरक्षकां केरे प्रधान नबूजरदाने दाछ़री बागां केरि देखभाल केरनेरे लेई ते ज़मीनदारी केरनेरे लेई छ़ेडी दित्ते।
यहोवारे भवने मां ज़ैना पितलरे खम्भे थिये, ते कुर्सी ते पितलरे कुण्ड ज़ैना यहोवारे भवने मां थिये, तैन सेभेइं कसदी लोक ट्लोड़तां तैन केरे पितल बाबेले जो नीए जे। ते पतीले, फेवड़ी, किन्ची, कुटोरे, धूपदान, ते पितलरे सब भांडां, ज़ैन सेइं लोक सेवा केरते थिये, तैन सब नेव। ते तशले, कड़छ़, कटोरी, पतीले, दीवट, धूपदान ते कटोरन मां ज़ैन किछ सोन्नेरू थियूं, तैन केरू सोन्नू, ज़ैन किछ चैंदरू थियूं तैन केरि चाँदी भी अंगरक्षकां केरो प्रधान घिन्तां जेव। दूईये खम्भे, अक कुण्ड ते पितलरे बारहे दांत ज़ैना पेइड़न हैठ थिये, एन सब त सुलैमान राज़े यहोवारे भवनेरे लेई बनावावरू थियूं, ते एन सेभी केरि पितल तोले करां बेइर थी। ज़ैना खम्भे थिये, तैन मरां हर एक्केरी ऊँचाई 18 हथ थी, ते घेरो 12 हथ थियो, ते मोटाई च़ेवर अंगल थी, ते तैना आन्ट्लेईं खाली थी। हर एक्केरी कंगनी पितलरी थी, ते हर अक कंगनी पंच़ हथ उच्ची थी; ते तैस पुड़ च़ेवरे पासना ज़ै जाली ते अनार बनोरे थिये तैना सब पितलरे थिये। केंगनरे च़ेवरे पासन 96 अनार बनोरे थिये, ते जैली पुड़ च़ेवरे पासन 100 अनार थिये।
इस्राएली लोक बाबेले मां गुलाम भोने
अंगरक्षकां केरे प्रधाने सरायाह महायाजक ते तैसेरे बादेरे दर्जे पुड़ सपन्याह याजक, ते ट्लाईए पहरदार ट्लाए; ते नगरे मरां तैनी अक खोजो ट्लाव, ज़ै जंग लड़नेबाले सिपेहिन पुड़ ठहराव थियो; ते ज़ैना मड़द राज़ेरे सामने रहते थिये, तैन मां सत मैन्हु ज़ैना नगरे मां मैल्हे; ते सेनापति एरहो मुन्शी ज़ै आम लोकन सेना मां भरती केरते थियो; ते आम लोकन मरां ज़ैना 60 मैन्हु नगरे मां मैल्हे, एन सेभन अंगरक्षकां केरो प्रधान नबूजरदान रिबला नगरे मां बाबेलेरे राज़े कां घिन्तां जेव। तैखन बाबेलेरे राज़े तैना हमात मुल्खेरे रिबला नगरे मां तैन पुड़ एन्च़रे हमलो कियो कि तैना मेरि जे। एन्च़रे सेइं यहूदी अपने मुल्खे मरां गुलाम भोइतां च़ले जे।
ज़ैन लोकन नबूकदनेस्सर गुलाम बनेइतां च़लो जेव, तैना इना आन, यानी तैसेरे राज़ केरनेरे सत्तोवं साले मां 3023 यहूदी; फिरी अपने राज़ केरनेरे अठारोवं साले मां नबूकदनेस्सरे यरूशलेम नगरे मां 832 मैन्हु गुलाम बनेइतां ने; फिरी नबूकदनेस्सरेरे राज़ेरे तरेइयोवं साले मां अंगरक्षकां केरो प्रधान नबूजरदाने 745 यहूदी मैन्हु गुलाम बनेइतां ने; सब मैन्हु मिलेइतां 4600 भोए।
यहोयाकीन कैदखाने मरां हथरां छ़डनो
फिरी यहूदा प्रदेशेरे राज़े यहोयाकीनेरे गुलैमरे सितेतियोवं साले मां यानी ज़ैस साल बाबेलेरो राज़ो एवील्मरोदक राज़ो बनो, तैस्सेरे राज़ केरनेरे बारोवं महीनेरे पंजियों दिहाड़े तैनी यहूदारे राज़े यहोयाकीन कैदखाने मरां केढतां तैस बड्डो दर्जो दित्तो; ते तैस सेइं बड़े नेरमी सेइं गल्लां की, ज़ैना राज़े तैस सेइं बाबेले मां थिये, तैसेरो तखत तैन केरे तखते करां उच्चो कियो। तैसेरे कैदखानेरां लिगड़ां बदलां; ते तै ज़िन्दगी भर रोज़ राज़ेरे सामने रोट्टी खातो राव; ते यहोयाकीनेरे रोज़ेरे खर्च़ेरे लेई बाबेलेरे राज़ेरे तरफां किछ मैल्हनेरो इंतज़ाम कियो जेव। ई इंतज़ाम तैसेरी मौतरे दिहाड़न तगर तैसेरे ज़िन्दगी भर लगातार बनोरो राव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.